* प्रतिनिधी
आपल्या सर्वांनाच रोजच्या दगदगीतून शांतता मिळावी म्हणून सुट्ट्यांची गरज असते. जिथे आपण शरीराला थोडा आराम देऊ शकू आणि पुन्हा रोजच्या कामासाठी दुप्पट उर्जेने परतू शकू. अशात जर तुमच्या मनाबरोबरच आत्म्याची शांतता ही हवी असेल तर जॉर्डनला नक्की जा.
आपल्यामध्ये बऱ्याच व्यक्ती अशा असतात, ज्या दुसऱ्यांना पोहताना पाहून खूप खूश होतात. त्यांनाही पाण्यात उतरावेसे वाटते. पण कुठल्याशा भीतिमुळे ते पाण्यात जाण्यास घाबरतात. पण आज अशा समुद्राची तुम्हाला ओळख करून देणार आहोत जिथे पोहता न येणारे लोकसुद्धा सहजपणे पोहू शकतात आणि असे करण्यासाठी त्यांना लाइफ जॅकेटचीही गरज नसते.
या समुद्राचे नाव डेड सी. डेडसी जॉर्डन आणि इस्त्रायल यांच्या मधोमध आहे. या समुद्राला सॉल्ट सी असेसुद्धा म्हटले जाते.
यामुळे म्हणतात डेड सी
याचे नाव डेड (मृत) सी पडले आहे, कारण येथील सर्व वस्तू मृत आहेत. इथे ना झाडं झुडुपं आहेत ना गवत. इतकेच नाही तर इथे कोणत्याच प्रकारचे मासेही नाहीत. यामागील कारण असे की येथील समुद्राचे पाणी सरासरीपेक्षा ८ पट जास्त क्षारयुक्त म्हणजे खारट आहे. म्हणून याला खाऱ्या पाण्याचा समुद्र किंवा सरोवर असेही म्हटले जाते. हा समुद्र जॉर्डनच्या पूर्वेला आहे, तर पश्चिमेला इस्त्रायलच्या सीमेजवळ आहे.
यात अनेक विषारी खनिज मीठ जसे मॅग्नीशियम क्लोराइड, कॅल्शियम क्लोराइड, पोटॅशियम क्लोराइड इ. भरपूर प्रमाणात आढळते. या सर्व क्षारांच्या अधिक प्रमाणामुळे इथे समुद्री झुडपे आणि समुद्री जीव राहण्यासाठी अनुकूल वातावरण नाही. या समुद्राचे पाणी ना पिण्यासाठी वापरले जाऊ शकते ना इतर कुठल्या कामासाठी. डेड सी ६७ कि.मी. लांब आणि १८ कि.मी. रूंद आहे. याची खोली ३७७ मीटर (साधारण १२३७ फूट) आहे. हे या विश्वातील सर्वात खोल खाऱ्या पाण्याचे सरोवर आहे.
यामुळे कोणी बुडत नाही
पाण्यामध्ये मिठाचे प्रमाण अधिक असल्याने इथे कोणी बुडत नाही. याचमुळे लोकांना या समुद्रात पोहायला आवडते. इतर समुद्रांपेक्षा हा समुद्र खूप वेगळा आहे. या वैशिष्ट्यामुळे जगभरात हा समुद्र प्रसिद्ध आहे. दूरदुरून लोक इथे येतात आणि आनंद लुटतात.
