* प्रतिनिधी
‘‘रूठे रुठे पिया मनाऊ कैसे’ नाराज पतीराजांकडे एक प्रेमभरा कटाक्ष टाका आणि प्रेमाने त्यांना आपल्या बाहुपाशात येण्याचं निमंत्रण द्या. मग पहा मनातल्या निरगाठी कशा उकलतात ते. प्रेमाने आसुसून त्यांनी बाहुपाशात घेतलं की सुरुवातीच्या रोमॅण्टिक दिवसांतल्या मधुर क्षणांच्या आठवणी ताज्यातवान्या होतील. या विचारात हरवून गेलेली सजणी रुसलेल्या प्रियतमाचा रुसवा काढण्यासाठी काही ना काही अल्लड आणि खट्याळ खोड्या करण्यात गुंतून जाते.
तसं तर रुसणं हा तर स्त्रियांचा स्वभावधर्म. पण पतीराज नाराज झाले तर त्यांचा रुसवा काढायचं कसब तिच्याकडे नक्कीच आहे. निसर्गाने स्त्रिला अनेक कौशल्य प्रदान केली आहेत. त्यांपैकी एक म्हणजे त्या प्रेमाने आणि आपलेपणाने सर्वांचं मन जिंकून घेतात. याच कौशल्यामुळे त्यांचे वैवाहिक संबंधही मधुर बनतात. पण पतीराजांची नाराजी जास्तच वाढलेली असेल तर त्यांचा रुसवा काढण्याच्या सर्व युक्त्या असफल होतात. अशा वेळी सणासुदीच्याप्रसंगी एकमेकांना बांधून ठेवणाऱ्या प्रेमाची जाणीव पतीराजाना करून द्या. मग पहा, ते आपणहून तुमच्या जवळ कसे येतात ते.
रम्य सकाळ तुमच्यासाठी
सकाळी डोळे उघडण्यापूर्वी तुमचा प्रेमळ स्पर्श आणि मग तुमच्या नुकत्याच न्हायलेल्या केसांतून पाण्याचे थेंब त्यांच्या चेहऱ्यावर पडणं आणि डोळे उघडत असतानाच कपाळावर उमटलेली तुमच्या प्रेमाची मोहर या सर्वांमुळे त्यांच्या दिवसाची सुरुवात कशी प्रसन्न होते ते पहा. सणासुदीच्या उत्साहाने आणि उल्हासाने त्यांचं मन आनंदाने भरून जाईल.
ते बेडवरून उठताक्षणी अशा नखऱ्याने त्यांना गुलाबाचं फूल द्या जणू काही एखादी प्रेमिका पहिल्यांदाच आपलं प्रेम व्यक्त करत आहे. अशा प्रकारे सकाळी लवकर त्यांना दिवाळीच्या शुभेच्छा द्या. शयनगृहाच्या भिंतीवर लावलेल्या रंगीत कागदावर मोठ्या अक्षरात काही प्रेमळ ओळी लिहा. जसं की, ‘दिवाळीच्या पहिल्या शुभकामना माझ्या प्रिय पतीराजाना किंवा ‘सणासुदीच्या या रम्य सकाळी माझ्या प्रियतमाला मन:पूर्वक शुभेच्छा.’ तुमच्या या प्रेमळ शब्दांमुळे त्यांना जाणीव होईल की, त्यांच्या मनात सर्वप्रथम स्थान त्यांच्या पतीराजांना आहे, त्यानंतर अन्य नात्यांना.
उत्सवाची शोभा
दिवाळीच्या दिवशी सकाळी दारासमोर काढलेल्या रांगोळीत प्रेमाचे रंग अशा प्रकारे भरा की, तुमच्या प्रियतमाला रांगोळी पाहताक्षणी त्याची जाणीव होईल. घराच्या मुख्य प्रवेशद्वारापाशी आणि दिवाणखान्याच्या मध्यावर सुंदर नक्षीकामाची रांगोळी काढा. बेडरूममध्येही प्रेमाचा संकेत देणारी दोन पक्ष्यांची जोडी किंवा दोन एकत्र जोडलेल्या हृदयाच्या आकाराची रांगोळी काढा. एकाबाजूला तुमचं नाव लिहा आणि दुसऱ्या बाजूला त्यांचं. तेव्हा ते तुमची कलाकुसर पाहतील. तुमची कल्पना पाहतील तेव्हा तुमचं कौतुक केल्यावाचून ते राहूच शकणार नाहीत.
सणासुदीचं मिष्टान्न बनवताना त्यांच्या आवडीनिवडीची संपूर्ण काळजी घ्या. नाश्त्यापासून ते जेवणापर्यंत तऱ्हतऱ्हेचे असे पदार्थ बनवा की, पाहूनच त्यांच्या तोंडाला पाणी सुटेल आणि त्यांचा मनमोरही थुईथुई नाचू लागेल.
उत्सवाचा आनंद तुमच्याचमुळे तुम्ही स्वत: त्यांच्या आणि त्यांना तुमच्या प्रत्येक सुखदु:खात सामील करण्याचं वचन द्या. आपला प्रत्येक आनंद पतीसोबत वाटून घेण्याचा तुमचा निर्णय तुमच्या प्रत्येक कामातून आणि लहानमोठ्या निर्णयातून दिसून यायला हवा.
सणासुदीच्या काळात सर्व कुटुंबियांनी जर एकत्र बाहेर जायचा कार्यक्रम बनवला असेल आणि त्यांनी यायला नकार दिला तर तुम्हीही इतर कुटुंबियांसोबत न जाता त्यांच्यासोबत थांबा. साहजिकच ते विचार करायला विवश होतील की तुमचा आनंद त्यांच्याशिवाय अर्थहीन आहे.
जर यावेळी पतीराजांनी सणासाठी खास बजेट बनवलं असेल आणि मर्यादित रक्कमच खर्च करायची ठरवलं असेल तर फालतू खर्च न करता त्यांपेक्षाही कमी पैशात सण साजरा करून दाखवा.
जर दिवाळीनिमित्त घरात पूर्वनियोजित मेजवानी ठरली असेल आणि जर अचानक एखाद्या महत्वाच्या कामासाठी त्यांना मोठी रक्कम खर्च करावी लागली असेल तर घराचा मानमरातब जपण्यासाठी तुम्ही तुमच्या बचतीपैकी काही रक्कम आपल्या पतीला दया. यामुळे त्यांना अंधाऱ्या रात्री दीप उजळल्याचा भास होईल. सासुसासऱ्यांचा मानसन्मान आणि कुटुंबियांसोबत योग्य ताळमेळ राखत आपलेपणाने घरातल्या सर्व जबाबदाऱ्या सांभाळा आणि उत्सवाचंही उत्तम नियोजन करा. मग तेही मनातल्या मनात आपल्या पत्नीचं कौतुक करून भांडणाकडे दुर्लक्ष करण्याचा प्रयत्न करतील.
चमचमती संध्याकाळ तुमच्याच नावे
तसं तर तुमची प्रत्येकच संध्याकाळ पतीराजांच्या सानिध्यातच असते. तुमच्या केवळ अस्तित्वामुळे त्यांचा दिवसभराचा त्रास आणि ताणतणाव दूर पळतो आणि त्यांना आराम वाटतो.
परंतु दिवाळीच्या संध्याकाळी जर ते उत्सवाच्या आनंदापासून दूर आपल्या खोलीत बसून राहिले असतील, ऑफिसच्या कामात, पुस्तक वाचण्यात किंवा टीव्ही पाहण्यात मग्न असतील. तर तुमच्या नखऱ्यांनी त्यांना असं काही घायाळ करा की ते आपोआपच तुमच्याकडे ओढले जातील.
दिवाळीचं आनंदी वातावरण, दिव्यांचा झगमगाट आणि फटाक्यांची आतषबाजी यासर्वांमध्ये सामील होण्यासाठी तुम्ही त्यांची मनपसंत साडी नेसा, ज्यांमध्ये तुम्ही सर्वात सुंदर दिसता.
तयार होताना त्यांना तुमच्या केसात फुलं माळायला सांगा आणि ते जवळ येताच त्यांच्या कपड्यावर अत्तर शिंपडून फुलांचा वर्षाव करा. मग पहा, तुमच्या या प्रेमळ नखऱ्याने ते कसे घायाळ होतात ते. त्यांच्या आवडीच्या साडीमध्ये उजळलेलं तुमचं रूप पहायला ते उत्सुक होतील.
दिव्यांच्या झगमगाटात नववधूसारख्या सजलेल्या संध्याकाळी रात्र होता होता तुमच्या नजरेने काही बोलत बेडरूमध्ये एकांतात म्युझिक सिस्टिमवर एखादं रोमॅण्टिक गाणं लावा. मग सगळा रुसवा, नाराजी विसरून तेही तुम्हाला आपल्या बाहुपाशात घेतील.
