* आरती सक्सेना द्य
दिवाळी असेल आणि मुली, महिला साजशृंगार करून तयार झाल्या नसतील असे होणारच नाही, कारण दिवाळी हा असा सण आहे ज्या निमित्ताने प्रत्येकजण आपली हौसमौज पूर्ण करून घेतो. विशेषत: घरातील महिला दिवाळीची वाट पाहात असतात. ज्या निमित्ताने त्या सुंदर कपडे, दागिने आणि मेकअपने त्यांचे सौंदर्य वाढवू शकतात. धनत्रयोदशी, नरक चतुर्दशी, लक्ष्मीपूजन, पाडवा आणि भाऊबीज असे दिवाळीतील खास दिवस असतात, ज्यासाठी महिला वेगवेगळ्या प्रकारे तयारी करून त्यांचे सौंदर्य दाखवू इच्छितात.
सर्व महिलांची साजशृंगाराची हीच हौस लक्षात घेऊन आम्ही यासंदर्भात प्रसिद्ध मेकअप आणि हेअर स्टायलिस्ट, मॉडेल आणि स्टायलिंग तज्ज्ञ ओजस राजानी यांच्याशी संवाद साधला.
दिवाळीच्या खास दिवसांसाठी महिलांनी कोणत्या प्रकारचा मेकअप, दागिने, केशरचना आणि कपडे घालावेत याबद्दल ओजस राजानी यांनी अतिशय उपयुक्त अशी ही माहिती दिली :
दिवाळीसाठी खास फेशियल, मॅनिक्युअर, पेडीक्योर, बॉडी पॉलिशिंग टिप्स : मेकअप आर्टिस्ट ओजस राजानी यांच्या मते, दिवाळीसाठी प्रत्येकजण खूप उत्सुक असतो. दिवाळीच्या आगमनापूर्वी घराची साफसफाई करण्यापासून ते दिवाळीसाठी खरेदी करण्यापर्यंत अनेक गोष्टी कराव्या लागतात, ज्यामुळे त्वचा टॅन होते म्हणजेच खराब होते. चेहऱ्यावर थकवा जाणवू लागतो, चेहरा निस्तेज दिसतो. म्हणूनच, दिवाळीच्या काही दिवस आधी तुम्ही चांगले फेशियल करणे खूप गरजेचे आहे. शक्य असल्यास, बॉडी मसाज, फुल बॉडी पॉलिशिंग, वॅक्सिंग आणि आयब्रो इत्यादी करा, जेणेकरून दिवाळीच्या काळात काम केल्यामुळे तुमच्या चेहऱ्यावर दिसणारा थकवा नाहीसा होईल आणि दिवाळीत तुम्ही फुललेल्या गुलाबासारख्या दिसाल.
फेशियलमध्ये डी १० फेशियल, शहनाजचे फेशियल किट आणि हायड्रा फेशियल हे खूप चांगले फेशियल आहेत. ते चेहऱ्यावरील टॅनिंग काढून टाकतात आणि मेकअपशिवायही चेहरा चमकू लागतो. याचे परिणाम खूप चांगले आहेत.
नरक चतुर्दशीसाठी साजशृंगाराच्या टिप्स : दिवाळीची सुरुवात नरक चतुर्दशी, धनत्रयोदशीने होते. आपण यावेळी जे काही कार्यक्रम करतो ते घरीच होतात. म्हणून, या दिवशी सौम्य रंगाचे कपडे घालणे योग्य ठरेल. उदाहरणार्थ, फिकट पांढरा, फिकट पिवळा, हळदी, फिकट गुलाबी आणि केशरी रंगाचे कपडे सौम्य आणि चांगले दिसतात. जर तुम्ही सकाळच्या वेळी चमकदार रंगाचे कपडे घातले तर ते इतरांना त्रासदायक वाटतात.
या दिवशी फिकट, सौम्य रंगाचे कपडे घाला, साधा मेकअप करा, कपड्याच्या रंगाशी जुळणारी लिपस्टिक लावा, आयशॅडोची हलकी शेड लावा, डोळ्यांवरही हलका मेकअप करा. आजकाल महिला त्यांचे केस अर्धे सोडतात किंवा पोनीटेल बांधतात.
दिवाळीत भरपूर साजशृंगार करा, चमकदार मेकअप करा, गडद रंग वापरा : दिवाळीची रात्र चमकदार असते. कंदील आणि सुंदर दिव्यांनी उजळून निघालेले प्रकाशमान दृश्य सर्वत्र असते. त्यामुळेच अशावेळी, मरून, गडद तपकिरी, गडद गुलाबी, लाल लिपस्टिक, सोनेरी आयशॅडो, मस्कारा, गुलाबी रूज, कपड्यांशी मिळतीजुळती बिंदी, डिझायनर बांगड्या असा गडद मेकअप करा. दागिन्यांबद्दल बोलायचे झाल्यास दिवाळीत डायमंड, रुबी, मोती इत्यादींचे सेट योग्य प्रकारे परिधान केल्याने तुमचे सौंदर्य वाढेल आणि तुमचा लूकही वेगळा दिसेल.
आजकाल महिलांना दिवाळी पार्ट्यांसाठी अनेक ठिकाणी जावे लागते. त्यामुळेच त्यांना साडी नेसायला आवडत नाही, त्याऐवजी त्या बहुतेक इंडो-वेस्टर्न कपडे घालतात. जसे पँट शर्टसह जाकीट, शेरवानी स्टाईल ड्रेस, अनारकली किंवा इंडोवेस्टर्न डिझायनर सलवार कुर्ती, हे सर्व आजकाल फॅशन ट्रेंडमध्ये आहेत, कारण ते सुंदर आणि आरामदायी देखील आहेत.
भाऊबीजेच्या दिवशी करू शकता मनसोक्त तयारी : भाऊबीज हा दिवाळीचा शेवटचा दिवस. हा भाऊ-बहिणींचा सण आहे आणि तो प्रत्येक घरात साजरा केला जातो. या दिवशी तुम्ही मनापासून अगदी मनसोक्त तयारी करू शकता. जर तुम्हाला साडी आवडत असेल तर तुम्ही डिझायनर रेडीमेड साडी किंवा साधी साडी देखील नेसू शकता. तुम्ही भरजरी लेहेंगा देखील घालू शकता. जर तुम्हाला हे दोन्ही घालायचे नसेल तर तुम्ही अनारकली किंवा भरजरी इंडो-वेस्टर्न सूट देखील घालू शकता.
