* पाककृती सहकार्य : लतिका बत्रा
चीज चाट कटोरी
साहित्य
* ४-५ ब्रेड स्लाईस
* १ उकडलेला बटाटा
* १ मोठा चमचा उकडलेले मटार
* १ मोठा चमचा भाजलेले शेंगदाणे
* १ मोठा चमचा बारीक शेव
* १ मोठा चमचा मसालेदार भाजलेले चणे
* १ मोठा चमचा भुजिया
* १ मोठा चमचा रोस्टेड चिवडा
* १ मोठा चमचा मिक्स सुकामेवा
* १ मोठा चमचा बारीक चिरलेला कांदा
* १ चिरलेला टोमॅटो
* २ मोठे चमचे फेटलेले दही
* १ मोठा चमचा आंबट-गोड चिंचेची चटणी
* १ मोठा चमचा चटपटीत हिरवी चटणी
* १ छोटा चमचा लिंबाचा रस
* १ छोटा चमचा चाट मसाला
* १ छोटा चमचा भाजलेलं जिरं
* तेल गरजेपुरतं
* मीठ चवीनुसार.
कृती
ब्रेडस्लाईस लाटण्याने लाटून पातळ करा. ते कटर वा वाटीच्या मदतीने गोल कापून घ्या. गोल ब्रेडला सूरीने एका बाजूला कट द्या. यावर ब्रशच्या मदतीने तेल लावा आणि मग छोटया आकाराच्या वाटीच्या मदतीने व्यवस्थित गोल करून घ्या. एका कढईत तेल गरम करून घ्या आणि ब्रेड लावलेल्या वाटीसकट ब्रेड सोनेरी होईपर्यंत तळून घ्या. अशाप्रकारे ब्रेडच्या सर्व कटोऱ्या तयार करून त्या थंड झाल्यावर ब्रेडमधून वाटी काढून घ्या. चाट सेट करण्यासाठी सर्व ब्रेडचा कटोऱ्या तयार आहेत. आता चाट बनविण्याचं सर्व साहित्य एकत्र करून घ्या आणि ब्रेड कटोऱ्यामध्ये भरा. वरून दही, चटण्या टाकून जिरे पावडर टाका. कोथिंबीर आणि किसलेल्या चीजने सजवून सर्व्ह करा
गार्लिक वडा पाव
साहित्य
* ६ पाव
* २ मोठे चमचे आले-लसूण पेस्ट
* २ मोठे चमचे पावभाजी मसाला
* १ मोठा चमचा लाल तिखट
* १ मोठा चमचा चिली फ्लेक्स
* २ मोठे चमचे कोथिंबीर हिरवी मिरची पेस्ट
* १ मोठा चमचा बारीक चिरलेली सिमला मिरची
* १ मोठा चमचा बारीक चिरलेली लालपिवळी सिमला मिरची
* १ चमचा किसलेलं गाजर
* १ चमचा उकडलेले मटार
* १ मोठा चमचा बारीक कापलेला बटाटा
* १ मोठा चमचा बारीक चिरलेला कांदा
* १ हिरवी मिरची बारीक चिरलेली
* १ मोठा चमचा उकडलेला मका.
कृती
दोन मोठे चमचे लोण्यात थोडी आले-लसूण पेस्ट, कोथिंबीर हिरवी मिरची पेस्ट, चिली फ्लेक्स आणि पावभाजी मसाला एकत्रित करून घ्या. एका पॅनमध्ये दोन मोठे चमचे लोणी गरम करून त्यात सर्व भाज्या परतून घ्या. सर्व मसाले व आले-लसूण पेस्ट टाका आणि भाज्या थोडया परतून घ्या. नॉनस्टिक पॅनवर मसाला मिक्स केलेलं लोणी टाका आणि सर्व पाव मधोमध कापून आत-बाहेर लोण्यामध्ये व्यवस्थित शेका. तयार पावांवर भाज्यांचं मिश्रण लावा. चीज पसरवून पावाचा वरचा भाग त्यावर ठेवून थोडं लोणी आणि मसाला लावून, गरमागरम द्या.
नाचोज प्लॅटर
साहित्य
* १ मोठा चमचा उकडलेला राजमा
* १ मोठा चमचा उकडलेले पांढरे चणे
* १ मोठा चमचा बारीक चिरलेला हिरवा कांदा
* १ मोठा चमचा बारीक चिरलेलं गाजर
* १ मोठा चमचा उकडलेले मटार
* ४-५ उकडलेले मशरूम
* एक चतुर्थांश कप लाल पिवळी-हिरवी सिमला मिरची बारीक चिरलेली
* १ मोठा चमचा रेड चिली सॉस
* १ मोठा चमचा ग्रीन चिली सॉस
* अर्धा कप कुस्करलेल चीज
* १ छोटा चमचा चीली फ्लेक्स
* १ मोठा चमचा टोमॅटो केचप
* १ मोठा चमचा मेयॉनीज
* १ पॅकेट नाचोज
* गार्लिक सॉल्ट चवीनुसार.
कृती
सर्व भाज्या, राजमा, चणे, सर्व सॉस, थोडंसं मीठ, चीज आणि मेयोनिज टाकून सर्व साहित्य व्यवस्थित एकत्रित करून घ्या. एका प्लॅटरमध्ये हे एकत्रित सलाड टाका. बाजूने नाचोजने सजवा, वरून चीज आणि सीजनिंग टाकून खायला द्या.
