* सोमा घोष
२०२५ मध्ये आधुनिक रेल्वेच्या २०० व्या वर्धापन दिनानिमित्त ब्रिटनची रेल्वे आणि भारतातील सर्वात मोठी फिल्म प्रोडक्शन कंपनी यशराज फिल्म्स (YRF) एकत्र येत आहेत. रेलवे 200 या ऐतिहासिक सोहळ्याचा एक भाग म्हणून, दोन्ही देशांमधील संस्कृतींना जोडणाऱ्या प्रेमाच्या शक्तीचा उत्सव साजरा करण्यासाठी हा अनोखा उपक्रम आयोजित केला जात आहे.
योगायोग असा की, २०२५ मध्ये वायआरएफच्या सर्वाधिक यशस्वी चित्रपटांपैकी एक, दिलवाले दुल्हनिया ले जायेंगे (DDLJ) याच्या ३० व्या वर्षाचा मोठ्या दिमाखात उत्सव साजरा केला जाणार आहे. हा चित्रपट भारत, भारतीय आणि संपूर्ण दक्षिण आशियाई प्रेक्षकांसाठी एक पॉप कल्चर माईलस्टोन आहे. डीडीएलजेच्या अनेक दृश्यांचे चित्रीकरण ब्रिटनमध्ये झाले होते, ज्यामध्ये किंग्स क्रॉस रेल्वे स्टेशनवरील आयकॉनिक सीनदेखील समाविष्ट आहे. याच ठिकाणी शाहरुख खान आणि काजोल यांचे पात्र प्रथम भेटतात आणि त्यांना त्यांच्या प्रेमाची जाणीव होते.
ब्रिटनची रेल्वे आणि वायआरएफ यांनी रेल्वे प्रवासातील रोमान्सला समर्पित करत व्हॅलेंटाईन डेच्या निमित्ताने त्यांच्या सांस्कृतिक सहकार्याची घोषणा केली आहे. सध्या वायआरएफ कम फॉल इन लव – द डीडीएलजे म्यूजिकल (CFIL) या डीडीएलजे च्या म्युझिकल अॅडॅप्टेशनची स निर्मिती करत आहे. या म्युझिकलचा प्रीमियर २९ मे २०२५ रोजी मँचेस्टर ओपेरा हाऊसमध्ये होणार आहे आणि तो २१ जून २०२५ पर्यंत चालणार आहे.
ब्रिटनची रेल्वे आणि वायआरएफ एकत्र येऊन कम फॉल इन लव – द डीडीएलजे म्यूजिकलच्या माध्यमातून संस्कृतींना जोडणाऱ्या प्रेमाचा उत्सव साजरा करतील. यासाठी मँचेस्टर आणि लंडनच्या प्रमुख रेल्वे स्टेशनवर खास इमर्सिव्ह अॅक्टिव्हेशन्स आयोजित केले जातील.
कम फॉल इन लव – द डीडीएलजे म्यूजिकल या इंग्रजी संगीत नाटकाचे दिग्दर्शन डीडीएलजे चे मूळ दिग्दर्शक आदित्य चोप्रा करत आहेत. ही कथा एका ब्रिटिश-भारतीय मुलीची आहे, जिला तिच्या कुटुंबाने भारतातील एका मित्रासोबत लग्न करण्यास सांगितले आहे. मात्र, परिस्थिती तेव्हा बदलते जेव्हा ती रॉजर नावाच्या एका ब्रिटिश तरुणाच्या प्रेमात पडते.
या भव्य निर्मितीमध्ये एकूण १८ नवीन इंग्रजी गाण्यांचा समावेश आहे. संगीतातील पूर्व-पश्चिम संगम दिसून येतो, कारण संगीत विशाल-शेखर यांनी दिले आहे, तर गीतलेखन आणि कथा नेल बेंजामिन (मीन गर्ल्स, लीगली ब्लॉन्ड) यांनी लिहिली आहे.
क्रिएटिव्ह टीममध्ये आंतरराष्ट्रीय ख्यातीचे तज्ज्ञ आहेत – नृत्यदिग्दर्शक रॉब अशफोर्ड (डिज्नीचा फ्रोजन), भारतीय नृत्यांसाठी सह-नृत्यदिग्दर्शक श्रुती मर्चंट (ताज एक्सप्रेस ), सेट डिझायनर डेरेक मॅकलेन (मौलिन रूज! द म्यूजिकल), आणि कास्टिंग डिरेक्टर डेव्हिड ग्रिनड्रॉड यांचा समावेश आहे.
डीडीएलजे हा भारतीय सिनेमाचा सर्वाधिक काळ चालणारा चित्रपट आहे आणि तो १९९५ पासून आजतागायत मुंबईत सलग प्रदर्शित होत आहे.
रेल्वे २००च्या कार्यकारी संचालिका सुझान डोनेली म्हणतात, “आम्ही यशराज फिल्म्ससोबत भागीदारी करत आहोत, ही आमच्यासाठी आनंदाची बाब आहे. रेल्वेने नेहमीच चित्रपट निर्मात्यांना प्रेरणा दिली आहे आणि जगभरातील संस्कृती जोडण्याचे काम केले आहे. यंदाच्या द्विशतक महोत्सवाच्या निमित्ताने, या आयकॉनिक रेल्वे-आधारित बॉलिवूड ब्लॉकबस्टरच्या ३०व्या वर्धापन दिनाचा आणि याच्या नवीन इंग्रजी म्युझिकलच्या युके प्रीमियरचा एकत्रित उत्सव साजरा करण्याची ही सुवर्णसंधी आहे.”
यशराज फिल्म्सचे सीइओ अक्षय विधानी म्हणाले, “रेल्वेच्या २०० व्या वर्धापन दिनाच्या निमित्ताने ब्रिटनच्या रेल्वेसोबत सहकार्य करताना आम्हाला अभिमान वाटतो. वायआरएफने नेहमीच भारतीय मुळं जपत जागतिक पातळीवर प्रभाव टाकणाऱ्या कथा सांगण्यावर भर दिला आहे आणि डीडीएलजे हे त्याचे उत्तम उदाहरण आहे. डीडीएलजेच्या ३० व्या वर्षाच्या निमित्ताने आम्ही या आयकॉनिक चित्रपटाच्या स्टेज अडॅप्टेशनला युकेमध्ये आणत आहोत! आमच्या म्युझिकलचा प्रीमियर २९ मे रोजी मँचेस्टर ओपेरा हाऊस येथे होणार आहे. डीडीएलजेचा सर्वात आयकॉनिक सीन किंग्स क्रॉस रेल्वे स्टेशनवर शूट करण्यात आला होता आणि तो कम फॉल इन लवमध्ये देखील समाविष्ट करण्यात आला आहे. त्यामुळे रेलवे 200 सोबत भागीदारी करण्यासाठी हा एक परिपूर्ण क्षण आहे. एकत्र येऊन आम्ही प्रेमाच्या एकत्रित शक्तीचा संदेश देऊ इच्छितो आणि विविधता व समावेशकता यांचे महत्त्व अधोरेखित करू इच्छितो.”
२०२५ मध्ये डीडीएलजेची जादू पुन्हा एकदा परदेशी प्रेक्षकांसाठी खुलणार आहे, आणि या सांस्कृतिक सहकार्यामुळे भारत आणि ब्रिटन यांच्यातील प्रेम आणि कलेचा एक नवा सोहळा रंगणार आहे!
