* गरिमा
जरी एखाद्या स्त्रीच्या सौंदर्याचे मोजमाप गोऱ्या रंगावरून केले जात असले, तरी आजच्या युगात रंगापेक्षा फॅशन, स्मार्टनेस, आत्मविश्वास आणि मेकअपची शैली यांना जास्त महत्व दिले जाते. जर तुमच्या त्वचेचा पोत सावळेपणाकडे झाकणारा असेल, तर तुम्ही आपले अन्य पैलू सक्षम करा. सावळया रंगांबाबत आपल्या मनातील वैषम्य दूर करा आणि आपल्या व्यक्तिमत्त्वाला आकार द्या.
बना स्मार्ट आणि कॉन्फिडंट
धीट बना : आपल्या व्यक्तिमत्वात धीटपणा आणि स्मार्टनेस आणा. कोणत्याही स्पर्धेत भाग घेताना माघार घेऊ नका. आव्हानं स्वीकारा. कोपऱ्यात लपलेली दबलेली मुलगी बनण्यापेक्षा नेहमी पुढे येऊन नेतृत्व करायला तयार राहा. कोणी तुम्हाला पुढे या आणि हे करा असे म्हणणार नाही. स्वत:ची पात्रता आपली आपणच सिद्ध करावी लागेल जेणेकरून प्रत्येक महत्त्वाच्या कामासाठी लोक तुमच्याकडेच पाहतील.
नजरेला नजर भिडवून बोला : कोणाशीही बोलताना नजरेला नजर भिडवून बोला. इकडे तिकडे बघत बोलणाऱ्यांवर कोणी विश्वास ठेवत नाही आणि खाली नजर खिळवणारे नेहमी मागे पडतात. संपूर्ण आत्मविश्वासाने नजर समोर ठेवून बोलायचा सराव करा.
दुसऱ्याशी आपली तुलना करू नका : दुसऱ्याशी आपली तुलना करण्याची सवय असेल, तुमचा विश्वास डळमळू शकतो. समोरचा तुमच्यापेक्षा हुशार आहे असा विचार करण्याऐवजी आपल्यातील गुणवत्तेचा विचार करा. स्वत:ला कधीच कमी समजू नका. यशस्वी होणारच असा विश्वास बाळगून काम करता राहा.
भीतीवर विजय मिळवण्याचा प्रयत्न करा : घाबरत राहण्यापेक्षा ज्या गोष्टीची भीती वाटते ती पुन्हा पुन्हा करून भीतिला पळवून लावणे आवश्यक आहे. काही लोकांना स्टेजवर जायची भीती वाटते, काहींना पोहण्याची, काहींना उंचीची, काहींना एकटा प्रवास करण्याची तर काहींना प्रेझेंटेशन देण्याची भीती वाटते. तुम्ही तुमच्या भीतिवर विजय मिळवा. यामुळे तुमचा आत्मविश्वास वाढेल आणि तुम्ही बोल्ड आणि कॉन्फिडंट दिसाल.
आपल्या बलस्थानांवर लक्ष केंद्रित करा : जीवनाने सगळयांनाच काहीतरी खास देऊ केले आहे. कोणी सुंदर असते, कोणी छान गाते, कोणाची तार्किक क्षमता चांगली असते, कोणी नृत्य छान करते, तर कोणी छान लिहिते. तुमचा रंग सावळा आहे असा न्यूनगंड मनात येऊ देण्यापेक्षा आपल्यातील अन्य गुणांना आकार द्या. जी गुणवत्ता तुमच्यात आहे ती इतर कोणात असू शकत नाही. आपला स्मार्टनेस, क्षमता आणि चांगली वागणूक यामुळे तुम्ही इतरांच्या नजरेत भरता.
