* सोमा घोष
लहानपणापासूनच क्रिएटिव्ह क्षेत्रात काम करायचं स्वप्न पाहणारी मराठी अभिनेत्री मोनालिसा बागल ‘झाला बोभाटा’ या मराठी चित्रपटाद्वारे प्रसिद्ध झाली. लहान वयातच तिचे वडील आणि आता वर्षभरापूर्वीच तिची आई मीनाक्षी राजेश बागल यांचं निधन झालं. मोनालिसा आता तिची मोठी बहीण अश्विनी बागलसोबत मुंबईत राहते, तिची बहीणदेखील मराठी चित्रपटात अभिनय करते. अभिनयाव्यतिरिक्त मोनालीसाची एक सिनेवितरक कंपनीदेखील आहे, हा सर्व डोलारा ती स्वत: सांभाळते. तिच्याशी तिच्या एकूण प्रवासाबद्दल बोलणं झालं. सादर आहेत याचे खास अंश :
अभिनयाची प्रेरणा कोणाकडून मिळाली?
माझ्या कुटुंबातील कोणीही व्यक्ती या क्षेत्रात नाहीए. मात्र, माझ्या आईला अगदी लहानपणापासून अभिनयाची आवड होती, मात्र कुटुंबियांच्या दबावामुळे तिला काम करता आलं नाही. तिची ही आवडच मला या क्षेत्रात घेऊन आली आणि आज मी जी काही आहे ती तिच्यामुळेच होऊ शकले.
कुटुंबीयांचं किती सहकार्य मिळालं?
माझा पहिला चित्रपट आल्यानंतरदेखील मी या क्षेत्रात येण्याबद्दल काही ठरवलं नव्हतं. मी माझं शिक्षण लोणावळामध्ये पूर्ण केलं आणि मी अभ्यासात खूप हुशार असल्यामुळे मला चार्टड अकाउंटंट व्हायचं होतं. बारावीला असताना एके दिवशी मला चैतन्य देशमुख भेटले आणि त्यांनी माझा फोन नंबर घेऊन ठेवला. काही दिवसानंतर त्यांनी मला मराठी चित्रपटात अभिनयाची ऑफर दिली. मी अभिनयाचा कोणताही अनुभव नसताना ऑडिशन दिली. त्यात मला सई ताम्हणकरच्या लहानपणीची भूमिका करायची होती. त्यावेळी मी १७ वर्षाची होती. माझी निवड झाली आणि माझ्या कामाचं कौतुकदेखील झालं. त्यानंतर मी अनेक चित्रपट केले, परंतु चित्रपट प्रदर्शित झाले नाहीत.
अभिनयाचा प्रवास पुढे कसा सुरू झाला?
यादरम्यान अनेक मोठया चित्रपटातून मला नकार मिळाला. कारण म्हणजे माझी गावाकडची भाषा आणि माझी शारीरिक सुदृढता. यामुळे मला खूपच नैराश्य आलं होतं. असं वाटू लागलं की हे क्षेत्र माझ्यासाठी नाहीच आहे. परंतु माझी आई आणि मोठया बहिणीने मला समजावलं आणि अधिक प्रयत्न करण्याचा सल्ला दिला. मी पुन्हा अभ्यासात मन रमवलं. मात्र काही दिवसातच मला दिग्दर्शक प्रदीप जगदाळेंचा फोन आला. एक टिनएजर मुलीची भूमिका होती. मी ऑडिशन दिली आणि निवड झाली. चित्रपट प्रदर्शित झाला आणि मी सगळयांच्या नजरेत आली. हळूहळू मी पुढे जात राहिले.
