* प्रतिनिधी
भारतात फक्त १२ टक्के महिलाच पर्सनल हायजीन म्हणजे पॅड्सचा वापर करतात, हा आश्चर्यचकित करणारा आकडा आहे, कारण खासगी स्वछतेकडे लक्ष न दिल्यास ती आपल्याला अनेक आजारांच्या जाळयात ओढते. तर युटीआय, कॅन्सरसारख्या गंभीर आजारांचेही आपण शिकार ठरतो.
केंद्र सरकारच्या ‘आरोग्य आणि कुटुंब कल्याण मंत्रालयाचे राष्ट्रीय आरोग्य अभियान’ तसेच स्वच्छ भारत अभियान मिळून मासिक पाळीदरम्यानची स्वच्छता व सॅनिटरी पॅड्सबाबत जनजागृती वाढविण्याचे काम करत आहे. देश दीर्घ काळापासून प्रदूषणविरोधी लढाई लढत आहे, ज्यात प्लास्टिकचे प्रदूषण सर्वाधिक आहे आणि यास सॅनिटरी पॅड्सही कारणीभूत ठरत आहेत. कारण भारतात दर वर्षी ११,३०० प्लास्टिक वाया जाते. प्लास्टिक विघटनशील नाही. म्हणूनच पर्यावरणाला घातक ठरणार नाही अशा विघटनशील सॅनिटरी पॅड्सचा वापर करण्याची गरज आहे.
खासगी स्वछतेशी तडजोड नको
ग्रामीण भागात आजही महिला मासिक पाळीदरम्यान सॅनिटरी पॅड्सऐवजी कपडा, वर्तमानपत्र, झाडाची पाने, वाळू किंवा राख वापरतात. यामुळे इन्फेक्शनसह गर्भाशयाचा कॅन्सरही होऊ शकतो. म्हणून सरकार आता स्वस्त पॅड्स बनवत आहेत, जेणेकरून मासिक पाळीदरम्यान प्रत्येक महिलेची कपडा आदी गोष्टींपासून सुटका होईल आणि त्या सुरक्षित सॅनिटरी पॅड्स वापरू शकतील.
इको फ्रेंडली पॅड्स म्हणजे काय
तसे तर तुम्हाला मार्केटमध्ये स्वस्तात स्वस्त आणि महागात महाग पॅड्स मिळतात, पण फरक फक्त एवढाच आहे की सिन्थेटिक पॅड्समध्ये ९० टक्के प्लास्टिक, पॉलिमर्स, परफ्युम आणि अनेक प्रकारचे केमिकल्स असतात, जे महिलांच्या संवेदनशील त्वचेसाठी घातक असतात, मात्र इको फ्रेंडली सॅनिटरी पॅड्स विविध नॅचरल विघटनशील गोष्टींपासून तयार होतात, जे पर्यावरणाचे कुठल्याही प्रकारचे नुकसान करीत नाहीत आणि त्यांची शोषून घेण्याची क्षमताही खूप जास्त असते. अतिशय मऊ असल्याने महिलांच्या योनी भागातील संवेदनशील त्वचेसाठी पूर्णपणे सुरक्षित आहेत.
आता वेळ आलीय अशा सॅनिटरी नॅपकिनचा वापर करण्याची जे त्या दिवसात तुमच्या खासगी स्वछतेची काळजी घेण्यासोबतच पर्यावरणाचेही नुकसान करणार नाहीत.
विघटनशील पॅड्स
हे पॅड्स झाडांच्या फायबरपासून बनवले जातात. ते डिस्पोज केल्यानंतर ६ महिन्यांपासून ते दोन वर्षांपर्यंतच्या कालावधीत विरघळून जातात. त्यामुळे ते पर्यावरणासाठी धोकादायक नाहीत.
पुनर्वापर करता येणारे पॅड्स
हे पॅड्स धुवून तुम्ही अनेकदा वापरू शकता. हे हायजिनिक तर असतातच, शिवाय त्वचेला जळजळ आणि रॅशेजपासूनही दूर ठेवतात.
जर तुम्ही प्रवासाला जात असाल तर सॅनिटरी पॅड्स फेकण्यासाठी पॉलिथिन बॅग किंवा टिश्यू पेपरही घेऊन जावे लागेल असे टेन्शन घेऊ नका, कारण आता मार्केटमध्ये असे पॅड्सही तयार होऊ लागले आहेत, जे डिस्पोजल बॅगसह येतात जेणेकरून तुम्ही पॅड वापरल्यानंतर सहजपणे त्यात फेकून देऊ शकता.
मासिक पाळी ही कोणतीही समस्या नाही तर एक सामान्य शारीरिक प्रक्रिया आहे. या काळात स्वत:ला बंधनात बांधून घेण्याऐवजी सुरक्षित सॅनिटरी नॅपकिनचा वापर करा आणि मोकळेपणाने जगा.
