पाककृती * नीरा कुमार
- सरसोंची (मोहरी) भाजी
साहित्य
* २५० ग्रॅम सरसों साग (मोहरीची भाजी) जाडसर चिरलेली
* १०० ग्रॅम फ्रोजन कॉर्न
* १ मोठा चमचा उभी चिरलेली लसूण
* २ अख्ख्या लाल मिरच्या
* १ मोठा चमचा मस्टर्ड ऑइल
* मीठ चवीनुसार.
कृती
एका कढईत तेल गरम करून लसूण व लाल मिरच्यांचे तुकडे परता. यामध्ये भाजी व मक्याचे दाणे टाका. जर फ्रोजन कॉर्न नसतील तर मक्याचे दाणे उकडून टाका. आता मीठ टाका. ६-७ मिनिटांत भाजी शिजेल. ही भाजी मक्याची वा बाजरीची भाकरी अथवा पराठ्यांसोबत खूप छान लागते.
- मूगडाळ-मुळ्याची भाजी
साहित्य
* ५ कप पानांसहित चिरलेली मुळ्याची भाजी
* अर्धा कप भिजवलेली मूगडाळ
* १ लहान चमचा बारीक चिरलेलं आलं व हिरवी मिरची
* १ लहान चमचा ओवा
* २ अख्ख्या लाल मिरच्या
* पाव लहान चमचा हळद पावडर
* १ मोठा चमचा राईचं तेल
* मीठ चवीनुसार
कृती
एका कढईत तेल गरम करून ओवा व लाल मिरचीची फोडणी घाला आणि त्यामध्ये मुळ्याची भाजी व मूगडाळ टाका. मग हळद पावडर, आलं, मिरची आणि मीठ टाका. भाजीवर झाकण ठेवून ७-८ मिनिटं शिजू द्या. मग मुळा व डाळ शिजली की भाजी सर्व्हिंग बाउलमध्ये काढा.
- पालक कबाब
साहित्य
* २५० ग्रॅम ब्लांच केलेला पालक
* पाव कप चण्याची डाळ अर्धा तास पाण्यात भिजवलेली
* पाव लहान चमचा गरममसाला
* १ मोठा चमचा तांदळाचं पीठ
* १०० ग्रॅम कुस्करलेलं पनीर
* २० मनुका
* पाव लहान चमचा काळीमिरी पावडर
* २ लहान चमचे चिरलेली कोथिंबीर
* कबाब शेकवायला पुरेसं तेल
* मीठ चवीनुसार.
कृती
भिजलेल्या चण्याच्या डाळीत पाव कप पाणी आणि पाव लहान चमचा मीठ घालून प्रेशरकुकरमध्ये मऊ होईपर्यंत शिजवा. डाळ कोरडी होऊ द्या. डाळ थंड करून मॅशरने मॅश करा. ब्लांच केलेल्या पालकमधील पाणी काढून टाका आणि पालक मिक्सरमध्ये बारीक करा. मग यामध्ये मॅश केलेली डाळ, गरममसाला, पाव लहान चमचा मीठ आणि तांदळाचं पीठ व्यवस्थित मिसळून घ्या. यानंतर पनीरमध्ये काळीमिरी पावडर, मनुका, कोथिंबीर आणि चिमूटभर मीठ मिसळा. आता पालकचं थोडं थोडं मिश्रण घेऊन हातावर पसरवा. त्यामध्ये पनीरचं मिश्रण भरून बंद करा. जेव्हा सर्व कबाब बनवून तयार होतील तेव्हा नॉनस्टिक तव्यावर तेल टाकून कबाब शेकवा. दोन्ही बाजूंनी परतून लालसर रंग येऊ द्या. स्वादिष्ट कबाब तयार आहेत.
