गुढीपाडवा स्पेशल – मराठी पारंपारिक पदार्थ

* नम्रता विजय पवार

•  पंचामृत

 यादिवशी कडुलिंबाच्या नवीन मोहराचा वापर जेवणात करतात. म्हणजेच कुठल्यातरी पदार्थात शास्त्रापुरती ही फुलं घालायची. पंचामृत हे एक आंबट, तिखट, गोड असं तोंडीलावणं आहे.

साहित्य

• 5-6 हिरव्या मिरच्यांचे तुकडे
• अर्धी वाटी दाण्याचं कूट
• अर्धी वाटी तिळाचं कूट
• अर्धी वाटी चिंचेचा कोळ
• अर्धी वाटी किसलेला गूळ
• पाव वाटी ओल्या खोब-याच्या कातळ्या
• ७-८ कढीपत्त्याची पानं
• मोहरी-हिंग-हळद
• १ टेबलस्पून तेल
• मीठ आणि २ टीस्पून काळा मसाला.

कृती

एका कढईत तेल गरम करून नेहमीसारखी मोहरी-हिंग-हळद अशी फोडणी करा. त्यात कढीपत्ता आणि मिरच्यांचे तुकडे घाला. जरासं परतून त्यात चिंचेचा कोळ आणि गूळ घाला. गूळ वितळून हे सगळं एकजीव झालं की त्यात खोब-याच्या कातळ्या घाला. एक कपभर पाणी घाला. चांगली उकळी आली की मीठ, काळा मसाला, दाण्याचं आणि तिळाचं कूट घाला. नीट हलवून घ्या. जितपत घट्ट-पातळ हवं असेल तितकं पाण्याचं प्रमाण वाढवा. मंद गॅसवर पाच मिनिटं उकळा. गॅस बंद करा. यामध्ये कडुलिंबाची फुले घाला.