– प्रतिभा
पूर्वीच्या तुलनेत आज आपण सर्वजण केवळ घरासाठीच नाही तर स्वयंपाकघरासाठीही चांगलाच पैसा खर्च करतो, जेणेकरून घरासोबतच स्वयंपाकघरही आधुनिक दिसेल. अनेकवेळा आपण स्वयंपाकघराला वरकरणी आधुनिक बनवतो, पण तिथे वापरण्यासाठी कोणती भांडी घ्यावीत, जेणेकरून स्वयंपाकघरदेखील आधुनिक दिसेल, हेच आपल्याला समजत नाही.
आजकाल बाजारात विविध प्रकारचे कूकवेअर उपलब्ध आहेत, ज्यांच्या मदतीने स्वयंपाकघराला आधुनिक लूक देता येऊ शकतो. सध्या बाजारात उपलब्ध असलेल्या कूकवेअरचे सर्वात मोठे वैशिष्ट्य म्हणजे ती आपल्या आरोग्यासाठी खूप चांगली आहेत आणि त्यांना हाताळणे देखील खूप सोपं आहे. काही काळापर्यंत स्वयंपाकघरात स्टील आणि नॉन-स्टिक भांड्यांचा बोलबाला असायचा, पण आता अनेक प्रकारची स्वयंपाकाची भांडी स्वयंपाकघराचे सौंदर्य वाढवत आहेत. चला तर मग, आजच्या काही आधुनिक कुकवेअरबद्दल जाणून घेऊया :
दगडाची भांडी
नावावरून स्पष्ट आहे की, ही भांडी दगडाची आहेत. पिझ्झा बेस, ब्रेड, केक आणि पास्ता बनवण्यासोबतच ती सूप आणि स्टू बनवण्यासाठीही वापरली जातात. या भांड्यांमध्ये अन्न शिजवणे आरोग्यासाठी खूप चांगले ठरते, कारण ती दगडापासून बनवलेली असतात, अन्न शिजवताना यातून कोणतेही विषारी आणि रासायनिक घटक बाहेर पडत नाहीत.
या भांड्यांना स्वच्छ करणे देखील खूप सोपं आहे. भांड्याच्या भोवती एकसारखी ज्वाळा पसरते, त्यामुळे अन्न एकसारखे शिजते, सोबतच ही भांडी जड असल्याने अन्न जळण्याची भीती नसते.
तांब्याची भांडी
तांब्याच्या भांड्यांमध्ये शिजवलेले अन्न आरोग्यासाठी चांगले ठरते, परंतु यात जास्त वेळ अन्न ठेवल्यास तांब्याचे रासायनिक घटक अन्नात मिसळतात. दुसरे म्हणजे, त्यांना साफ करणे खूप कठीण होते. तरीही आजकाल तांब्याची भांडी त्यांच्या आधुनिक स्वरूपात पुन्हा एकदा आपल्या स्वयंपाकघरचे सौंदर्य वाढवत आहेत.
आजकाल तांब्याच्या भांड्यांमध्ये बाहेरील थर तांब्याचा आणि आतील थर स्टीलचा असतो. ही भांडी खूप लोकप्रिय आहेत, पण ती फक्त शोभेसाठी असतात. तांब्याच्या शुद्ध भांड्यात अन्न शिजवल्याने तांब्याचे क्षारीय घटक अन्नात मिसळतात आणि शरीराला अनेक पोषक तत्वे मिळतात, परंतु ती बरेच महाग असल्याने ती विकत घेणे प्रत्येकालाच परवडत नाही.
मातीची भांडी
आजकाल मातीची भांडी खूप लोकप्रिय आहेत. यामध्ये अन्न मंद आचेवर शिजवता येते. यामध्ये फारच कमी तेल वापरले जाते, त्यामुळे अन्नाची चव चांगली पकडली जाते. यामध्ये अन्न शिजवल्यास तुम्हाला अन्नातील सर्व पौष्टिक घटक मिळू शकतात. या भांड्यांमध्ये आम्लयुक्त अन्न जरी शिजवले तरी मातीतील अल्कधर्मी गुणधर्म अन्नातील गुणधर्म संतुलित करतात.
ही भांडी वापरण्यापूर्वी, ती १५-२० मिनिटे पाण्यात भिजवावीत, सोबतच स्वयंपाक सुरू करण्यापूर्वी, ती चांगली गरम करणे आवश्यक असते, जेणेकरून संपूर्ण भांड्यात तापमान एकसारखे राहील.
कास्ट आयर्न कुकवेअर
कास्ट आयर्न कूकवेअरचा वापर ब्रेझिंग, तळण्यासाठी, मांस मंद आचेवर शिजवण्यासाठी तसेच ब्रेड, इतर भाजलेले पदार्थ बनवण्यासाठी केला जातो. यामध्ये मंद आचेवरील जेवण सहज करता येते.
या भांड्यांमध्ये अन्न कमीत कमी तेलात शिजवता येते. ते एकसारखे शिजले जाते आणि चवदेखील टिकून राहते, सोबतच आयर्न म्हणजे लोह असल्यामुळे अन्न शिजताना, त्यात लोहासारखे पौष्टिक घटक आपोआप मिसळले जातात, जे मानवी शरीरातील हिमोग्लोबिन वाढवण्यास खूप उपयुक्त असतात. ही भांडी स्टोव्हपासून मायक्रोवेव्ह ओव्हनपर्यंत वापरून अन्न शिजवता येते.
पोर्सिलिन कुकवेअर
मेल्टिंग चॉकलेट, क्रीमी सूप आणि सॉस हे असे खाद्यपदार्थ आहेत, जे अगदी मंद आचेवर शिजवले जातात. पोर्सिलिनची भांडी यासाठी अतिशय योग्य आहेत. ती वजनाने खूप हलकी असतात आणि वेगवेगळ्या रंगात उपलब्ध आहेत. ती स्क्रॅच प्रतिरोधक आणि इन्सुलेटेडदेखील आहेत, सोबतच मायक्रोवेव्ह आणि ओव्हनमध्येदेखील सहजपणे वापरली जाऊ शकतात.
पितळेची भांडी
तांब्याच्या भांड्यांप्रमाणेच पितळेची भांडीही आजकाल ट्रेंडमध्ये आहेत. आजकाल फक्त जड स्टीलच्या भांड्यांना पितळेचा लूक देण्यासाठी पितळेचा लेप लावला जातो, जो खूप छान दिसतो. या लेपला कोणत्याही अतिरिक्त साफसफाईची आवश्यकता नसते. त्यामुळे ही भांडी अगदी सहजपणे हाताळता येतात. खऱ्या पितळेच्या तुलनेत ती स्वस्त देखील आहेत.
