* चंद्रकला
बदलत्या हवामानामुळे शरीराला अनेक समस्यांना सामोरे जावे लागते. उन्हाळ्यात घाम येणे, पुरळ येणे इत्यादी समस्या वैयक्तिक स्वच्छतेशी संबंधित असतात. म्हणूनच, या काळात तुम्ही तुमच्या अंतर्गत स्वच्छतेकडे विशेष लक्ष देणे गरजेचे असते. विशेषत: महिलाना, वैयक्तिक स्वच्छतेकडे दुर्लक्ष केल्यामुळे अनेक आजार होतात.
स्वयंपाकघरापासून ते कामावरील कामादरम्यान महिला दिवसभरात अनेक कामं पूर्ण करतात. अशा परिस्थितीत त्यांनी वैयक्तिक स्वच्छतेकडे लक्ष देता येत नाही.
इंटिमेट हायजीन म्हणजेच अंतर्गत स्वच्छतेकडे लक्ष न दिल्याने, महिलांना अनेक प्रकारचे संक्रमण जसे की यूटीआय (लघवी करताना जळजळ) आणि इतर समस्यांना सामोरे जावे लागते. उन्हाळ्यात तर घामामुळे या समस्या आणखी वाढतात.
अंतर्गत स्वच्छता का आहे महत्त्वाची?
मासिक पाळीप्रमाणे आजही लोक वैयक्तिक स्वच्छतेबद्दल उघडपणे बोलणे टाळतात. अंतर्गत स्वच्छतेची योग्य काळजी न घेतल्याने, युरिनरी ट्रॅक्ट इन्फेक्शन (यूटीआय) आणि कोरडेपणा यासारख्या समस्या उद्भवतात, बॅक्टेरियांचे म्हणजेच जिवाणूंचे संक्रमणदेखील वाढू शकते, ज्यामुळे पुरळ आणि खाज येते. बऱ्याच प्रकरणांमध्ये न्यूमोनिया किंवा रक्ताचे आजारदेखील होऊ शकतात.
अनेकदा लोक स्वच्छतेची काळजी घेत नाहीत, त्यामुळे मानसिक आणि शारीरिक तणावाचे बळी ठरतात. ते नैराश्याचेही बळी ठरतात.
उन्हाळ्यात घ्या स्वच्छतेची काळजी
उन्हाळ्यात या समस्या अधिक वाढत असल्याने काही गोष्टी लक्षात ठेवून तुम्ही या समस्या टाळू शकता.
काम करताना आणि प्रवास करताना आपल्याला अनेकदा घाम येतो. उन्हाळ्यात काही अंतर प्रवास केल्यावरही घाम येतो. घाम सुकल्यानंतर, जीवाणू आपल्या शरीरावर राहतात, जे आपल्याला त्वरित स्वच्छ करणे आवश्यक असते. आपण त्यांना कोरड्या कापडाने अंतर्गत जागेपासून स्वच्छ करू शकता.
पुरुष असो किंवा महिला, घामामुळे होणारी अँलर्जी टाळण्यासाठी, तुम्ही अंतर्गत शरीर स्वच्छ ठेवा. दररोज अंघोळ करताना ते स्वच्छ धुतले जाईल, याची काळजी घ्या. उन्हाळ्यात अंतर्गत भाग स्वच्छ करणे खूप महत्त्वाचे असते. यासाठी, तुम्ही बाजारात उपलब्ध असलेल्या विविध प्रकारच्या इंटिमेट वॉश उत्पादनांचा वापर करू शकता, जे त्या भागाचे पीएच संतुलन राखून संसर्गाची शक्यता कमी करतात.
ओले अंतर्वस्त्र कधीच घालू नका, कारण यामुळे पुरळ आणि संसर्ग होऊ शकतो. घट्ट अंतर्वस्त्र किंवा घट्ट जीन्सदेखील टाळा. घट्ट कपड्यांमुळे घाम बाहेर येण्यास प्रतिबंध होतो आणि जीवाणू वाढू लागतात.
मासिक पाळी दरम्यान घ्या विशेष काळजी
इतर दिवसांपेक्षा मासिक पाळी दरम्यान, अंतर्गत स्वच्छतेकडे लक्ष देणे जास्त महत्वाचे असते. मासिक पाळी दरम्यान खासगी भाग पूर्णपणे स्वच्छ ठेवा. मासिक पाळी दरम्यान आरामदायक अंतर्वस्त्र घाला. शक्य असल्यास घाम सहज शोषून घेणारे सुती अंतर्वस्त्र वापरा.
सुती कापडापासून बनवलेले चांगले सॅनिटरी नॅपकिन्स वापरा. दर ४ ते ६ तासांनी ते बदला. मासिक पाळी दरम्यान स्वच्छतेकडे दुर्लक्ष केल्यास संसर्ग होऊ शकतो. या काळात वाढणारे जीवाणू शरीरात प्रवेश करतात आणि यूटीआय, योनीमार्गात संसर्ग, त्वचेची जळजळ इत्यादी समस्या निर्माण करतात. त्यामुळे आपल्या स्वच्छतेची विशेष काळजी घेणे गरजेचे आहे. स्वत:ला स्वच्छ ठेवल्याने आपले शरीर अनेक आजारांपासून वाचू शकते.
