* दीपा पांडे
नेहमीच दोन-अडीच वर्षांनी होणाऱ्या बदलीमुळे सीमा एवढया देश-प्रदेशात फिरली होती की नेहमीच ती काय घालावे आणि काय नाही, अशा विचारात पडत असे. तुमच्यासोबतही असेच घडते का? आपण जर मोठया शहरात राहात असाल, तर आपण निर्धास्तपणे कोणताही पेहराव घालू शकता, पण आपण जर छोटया शहरात राहात असाल, तर हे पाहणे आवश्यक आहे की, तेथील वातावरण कसे आहे. अजूनही तिथे चेहऱ्यावर घुंगट घेण्याचा रिवाज आहे का किंवा मग डोक्यावर पदर घेण्याचा रिवाज आहे का? तेथील वातावरणानुसार तुम्हालाही तुमचा वार्डरोब तयार करावा लागेल, अन्यथा सर्वांमध्ये तुम्हाला अवघडल्यासारखे होईल.
२००४ मध्ये सीमाची बदली हरदोई, उत्तर प्रदेशात झाली होती, तेव्हा तिथे तिने पाहिले की सर्व महिला साडी नेसत आणि घुंगट चेहऱ्यावर ओढून घेत असत, तर मुली पंजाबी ड्रेस वापरत असत. खूप कमी मुली जीन्स घालत होत्या, तीही कधीतरी. आज मात्र एवढया वर्षांत खूप बदल झाला आहे. आज त्याच महिला कुर्ती-लेगिंग्ज वापरू लागल्या आहेत, तर मुली जीन्स आणि टॉप. आज अशीच स्थिती अनूपपूर मध्य प्रदेशमध्येही आहे. आता कोणी हरदोईवरून फोन करून खुशाली विचारली की सीमा सांगते, इथे आजही १२ वर्षांपूर्वी हरदोई होतं, मग प्रश्न विचारणारीही हसू लागते.
काय वापराल?
‘जसा देश तसा वेश’ ही म्हण खरी असली, तरी याचा अर्थ असा नाही की सर्व महिला साडी नेसतात, त्यामुळे तुम्हीही साडीशिवाय दुसरे काही वापरायचेच नाहीत. उलट साडीबरोबरच सलवार-कमीज, चुडीदार, लेगिंग, पॅरलल इ. पेहराव कुठलाही संकोच न बाळगता वापरा. एकमेकांचे पाहून आजूबाजूच्या महिलांनाही अशा प्रकारचे कपडे वापरण्याची इच्छा होईल.
आपण जर एखाद्या लग्नाला जात असाल, तर मात्र साडीच सर्वात उत्तम पेहराव ठरेल. अशा वेळी पारंपरिक पद्धतीने तयार होऊन सर्वांच्या आकर्षणाचा केंद्रबिंदू ठरू शकता. रोज साडी, चूडीदार परिधान करणाऱ्या महिला तुमचं पारंपरिक रूप पाहून दंग राहतील. त्याचप्रमाणे, अशाच भेटीगाठींच्या प्रसंगी पॅरलल, लेगिंग किंवा सलवार सूटसोबत छान ओढणी घेऊ शकता. जर तुम्हाला मोठा दीर किंवा सासऱ्यांसमोर चेहरा दाखवायचा नसेल, तर आपला दुपट्टा डोक्यावर चांगल्याप्रकारे घेऊन पिनअप करा. असे केल्याने आपल्या डोक्यावरील पदरही सरकणार नाही आणि कोणी तुमच्या फॅशनला नावही ठेवणार नाही.
जर साडी नेसून कंटाळा आला असेल, तर आपल्या आवडीनुसार गुजराती वर्क मिरर आणि गोंडयांनी सजलेली, राजस्थानी बांधणीच्या किंवा नक्षीकाम केलेल्या राजसी दिसणारी लहंगा-चोली घालून मिरवा. रेडीमेड लेहंगा-साडीही आपल्या सोईनुसार वापरू शकता.
तरुणी जीन्स किंवा पँटसोबत गुडघ्यांपर्यंत कुर्ती व स्टोल वापरून आपली हौस भागवू शकतात. हा पेहराव लांबून कुर्ती व लेगिंगचा लुक देईल. त्यामुळे तुम्ही इतरांपेक्षा वेगळयाही दिसणार नाही. जर कमी वयाच्या तरुणी असाल तर लाँग स्कर्ट आणि शॉर्ट कुर्तीवर स्टोल घेऊन सणासुदीला आपला हटके लुक मिळवू शकता.
जर तुम्हाला मिनी मिडी किंवा हॉट पँट घालायची इच्छा असेल आणि तुम्ही एकत्र कुटुंबात राहत असाल, तर आपण पतीसोबत एकांतात आपल्या बेडरूममध्ये अशा प्रकारचा पेहराव करून मिरवू शकता. त्याचप्रमाणे दुसऱ्या शहरात फिरायला जाताना तिथे आपला मनपसंद ड्रेस वापरू शकता. मात्र आपला फोटो सोशल मीडीया उदा. फेसबुक, व्हॉट्सअपवर पोस्ट करू नका. कारण तुम्हाला परत त्याच कुटुंबात परतायचे आहे.
काय वापरणे टाळाल?
आता काही अतिउत्साही महिला विचित्र कपडे वापरतात किंवा मग हास्याला पात्र ठरतात. उदा. नेटची साडी नेसून डोक्यावर पदर घेऊन फिरणे. अशा वेळी त्यांना काय झाकायचे आहे अन् काय दाखवायचे आहे तेच कळत नाही. काही महिला स्किन टाइट लेगिंगसोबत कुर्ता वापरतात. अशा वेळी वाटते की केवळ कुर्ताच घातला आहे. हे दिसायला खूप वाईट दिसते. म्हणूनच बाहेर जाताना आपल्या वेशभूषेची विशेष काळजी घ्या.
साडी खरोखरच संपूर्ण पोशाख आहे, पण तीही नेसण्याच्या अनेक पद्धती आहेत. साडी सरळ पदर, उलटा पदर अशा कुठल्याही पद्धतीने नेसलेली असेल, तरी त्याच्यासोबत मॅचिंग ब्लाउज व परकर नसेल, तर ती खुलून दिसत नाही. त्याचप्रमाणे ती व्यवस्थित नेसलेली नसेल, वरती उचलली गेली असेल, फॉल निघाला असेल, पदर पसरलेला असेल, तरीही खराब दिसते.
जर जीन्स किंवा पँट घालायची असेल, तर शॉर्ट टॉप किंवा स्किन टाइट जीन्स वापरणे टाळा. लाँग स्कर्टसोबत टाइट शर्ट किंवा टीशर्ट वापरू नका. छोटया शहरांमध्ये असे कपडे परिधान केलेल्या तरुणींकडे लोक असे काही वळून पाहतात की जणू काही प्राणिसंग्रहालयातून एखादा प्राणी बाहेर येऊन रस्त्यावर फिरतोय.
पेहराव कुठलाही असो, तो योग्य प्रकारे केलेला नसेल, तर तो आपले रूप खुलविण्याऐवजी घटवितो. काही महिलांना वाटते की महागडे ड्रेसेसच शोभून दिसतात, पण असे नाहीए. रोजच्या पोशाखांमध्येही त्यांच्या किंमतीपेक्षा रंगांचे संयोजन, डिझाइन जास्त महत्त्वाची असते. म्हणूनच जो पेहराव कराल, तो शोभण्यासारखा असावा. त्याच्या रंगांशी मिळत्याजुळत्या बांगडया, कडे, ब्रेसलेट, आर्टिफिशिअल ज्वेलरी वापरून तुम्ही तुमचे सौंदर्य खुलवू शकता.
