* स्नेहा सिंह
आजकाल जिथे जावे तिथे हेच ऐकायला मिळते की हे माहिती-तंत्रज्ञानाचे युग आहे. तुमच्याकडे जितकी जास्त माहिती असेल तितके अधिक यश तुम्ही कुठल्याही कामात अगदी सहज मिळवू शकता.
इन्फॉर्मेशन म्हणजे माहिती. सरळ सोप्या शब्दात सांगायचे झाल्यास आपल्या आजूबाजूच्या परिसरापासून ते अगदी शहर, राज्य आणि देश तसेच जगात काय सुरू आहे या सर्वांची माहिती करून घेणे. फॅशनपासून ते व्यसनांपर्यंत आणि नोकरी-व्यवसायापासून ते शिक्षणापर्यंत प्रत्येक क्षेत्राची माहिती करून घेणे.
या सर्व क्षेत्रांमध्ये काय नवीन सुरू आहे, याची दररोजची माहिती असणे आजच्या युगात अत्यंत आवश्यक आहे.
आपल्या विषयाचे सखोल ज्ञान असणे हे तुम्हाला तुमच्या क्षेत्रात यश मिळवून देते, पण याव्यतिरिक्त जर तुम्हाला अवतीभवतीच्या जगाची संपूर्ण माहिती असेल तर सोन्याहून पिवळे.
तुम्ही ज्या क्षेत्रात काम करत आहात त्या व्यतिरिक्त अन्य सर्व विषयांचे असलेले ज्ञान जीवनातील इतर आघाडयांवरही यश मिळवून देऊ शकते.
प्रत्येक विषयाची माहिती
नोकरदार महिला असो किंवा गृहिणी, जर तुम्हाला जगभरात काय सुरू आहे याची माहिती असेल तर ती सक्षम निर्णय घेण्यासाठी अत्यंत महत्त्वपूर्ण ठरते.
जीवनात छोटया-छोटया गोष्टींची माहिती तुम्हाला परिपूर्ण बनवण्यासाठी उपयुक्त ठरते. आपल्या आवडीशिवायच्या अन्य क्षेत्रांची माहिती करून घेणे महिलांना विशेष आवडत नाही. पण आज जेव्हा माहिती हीच ताकद समजली जात आहे तेव्हा सर्व प्रकारच्या माहितीपासून दूर राहून चालणार नाही.
सर्व विषयांची माहिती असणाऱ्या महिलांना सर्वत्र आदर मिळतो. त्यांचे भरपूर कौतुक होते.
समजा एका कुटुंबात २ महिला आहेत. त्यातील एकीला फक्त खाणे, मजेत रहायला आवडते. आपल्या कुटुंबाव्यतिरिक्त बाहेरच्या जगाशी तिला काही देणेघेणे नसते. कुटुंबाची चांगली काळजी घेत असल्याबद्दल तिला आदर मिळू शकतो, पण कुटुंबाबाहेरील एखादे काम असल्यास किंवा बाहेरच्या एखाद्या विषयावर बोलणे सुरू असल्यास तिला सहभागी करून घेतले जात नाही.
याउलट जी दुसरी महिला घरातील कामाव्यतिरिक्त बँक, औषधे, विमा यासह नवीन गॅझेट्स आणि तंत्रज्ञानाची माहिती करून घेते, संपूर्ण जगात घडणाऱ्या घटनांची जिला माहिती असते तिला जास्त महत्त्व मिळते. तिला सर्व विषयांची माहिती असल्यामुळे तिच्या पतीलही तिचे सर्व म्हणणे व्यवस्थित ऐकून घ्यावे लागते.
सोशल मीडिया विश्वासार्ह नाही
आजूबाजूच्या सर्व विषयांची जास्तीत जास्त माहिती करून घेण्याविषयी आपण बोलत आहोत. त्यामुळे येथे एक खुलासा करणे गरजेचे आहे की, आजकालच्या बहुसंख्य महिला व्हॉट्सअप, फेसबूकवरून जी माहिती मिळते तीच प्रमाण मानतात. त्यांना वाटते की, त्या माहितीमुळे त्यांना सर्व विषयांचे भरपूर ज्ञान मिळाले आहे. पण प्रत्यक्षात असे मुळीच नसते. व्हॉट्सअप, फेसबूक इत्यादी सोशल मीडियावरून वाटण्यात येणारे ज्ञान विश्वासार्ह नसते. ते अर्धवट आणि वरवरचे असते.
या माहितीची सत्यता पडताळून तिच्या उपयोग केला तर काही हरकत नाही. अन्यथा अशा प्रकारची अर्धवट माहिती तुम्हाला चुकीच्या दिशेने घेऊन जाईल. म्हणूनच यापासून दूर रहाणेच योग्य ठरेल.
बऱ्याच महिला अजूनही जेवण बनवायलाच प्राधान्य देतात. मात्र आरोग्यासाठी कोणती गोष्ट चांगली आहे, कोणत्या पदार्थांपासून किती जीवनसत्त्वे आणि प्रथिने मिळतात, कोणत्या ऋतूत कोणते पदार्थ खाणे चांगले असते, कोणत्या ऋतूत कोणत्या पदार्थांमध्ये कुठले मसाले घालावे, या सर्वांची माहिती करून घेणे तुम्हाला आदर्श गृहिणी बनवेल.
परंतु, अजूनही बऱ्याच महिलांना याची माहिती नाही. प्रत्यक्षात चवीसोबतच आरोग्य राखणे, ही आजच्या काळाची गरज आहे आणि त्यासाठी तुम्हाला अपडेट रहावेच लागेल.
हे आहे गरजेचे
वित्त हे एक असे क्षेत्र आहे ज्याची माहिती असणे गरजेचे असते. यात बँक, गुंतवणूक, बचत किंवा विमा यासारखे अनेक घटक येतात. अजूनही १०० पैकी ५० महिलांना त्यांच्या बँक खात्याची माहिती नसते.
गृहिणीचे बँक खाते शक्यतो तिचा नवराच हाताळत असतो. गुंतवणूक, बचतीसाठी कोणता पर्याय सर्वोत्तम आहे, ही फार लांबची गोष्ट झाली, पण कुटुंबाची एकूण गुंतवणूक किती आहे, याबाबतही तिला काहीच माहिती नसते. विम्याबाबतही तिची काहीशी अशीच गत असते.
३५ वर्षांच्या अंजलीच्या पतीचा अपघात झाला. तिच्या पतीने मागील २ वर्षांपासून जीवन विम्याचे हप्ते भरले नव्हते. पतीच्या मृत्यूनंतर तिला २० लाख मिळाले. अंजली घर कामात अशी काही अडकून गेली होती की, या सर्वांची माहिती करून घ्यायचे विसरून गेली होती.
पतीच्या लाखो रूपयांच्या शेअर्सचा हिशोब ठेवणे तिला जमत नव्हते, कारण तिच्याकडे काहीच माहिती नव्हती. म्हणूनच घराच्या बजेटपासून ते बचतीपर्यंतची सर्व माहिती करून घ्यायला हवी.
आरोग्याची माहिती
अशाच प्रकारे औषधे आणि औषधांच्या दुकानांबाबत माहिती असणे गरजेचे असते. जर याबाबत तुम्हाला काहीच माहिती नसेल तर तुम्ही चुकीचा निर्णय घेऊ शकता.
घाबरल्यामुळे त्रास अधिक वाढतो. सर्वसाधारणपणे महिलांना आजारांबाबत माहिती असायलाच हवी. कोणते आजार साधे असतात आणि कोणत्या आजारांकडे गांभीर्याने पाहायला हवे, याचा निर्णय त्या आजारांबाबत अधिकची माहिती असल्यास सहज घेता येतो.
बऱ्याच महिला थायरॉइडला घाबरून तणावात येतात तर बऱ्याच महिला कर्करोग होऊनही चांगले जीवन जगू शकतात. तुमचा संयम आणि तुमच्याकडे या आजारांसंदर्भात असलेली परिपूर्ण माहिती, ही यामागचे महत्त्वपूर्ण कारण आहे. छोटया-मोठया रोगांवर उपचार करण्यासाठीची अद्ययावत माहिती मिळवणे आणि यासंदर्भातील तुमचे ज्ञानच तुम्हाला बळ देते.
तंत्रज्ञानाची माहिती मिळवताना काय असते गरजेचे?
आज तंत्रज्ञान सर्वात महत्त्वाचे समजले जाते. तुम्हाला जर फेसबूक किंवा इन्स्टाग्रामचा वापर करायला येत असेल तर याचा अर्थ तुम्ही तंत्रज्ञानातील तज्ज्ञ झालात, असा होत नाही. टायपिंग, एडिटिंग, फोटो एडिटिंग, बेसिक अकाउंटिंग, ई मेल करणे, ऑनलाईन पेमेंट, नेट बँकिंग, ऑनलाईन बुकिंग किंवा जीपीएस तंत्रज्ञानाचा वापर इत्यादी सर्व माहिती असणे आज अत्यंत गरजेचे आहे.
एका स्मार्टफोनद्वारे तुम्ही संपूर्ण जग फिरू शकता, कारण एक बटण दाबून तुम्ही जेवण, तिकिटाचे आरक्षण, जगातील विविध स्थळांची माहिती करून घेणे, पैसे पाठवणे असे सर्व करू शकता. पण जर हे करताना थोडी जरी चूक झाली तरी मोठया संकटात सापडू शकतात. म्हणूनच प्रत्येक गोष्टीचे परिपूर्ण ज्ञान असणे गरजेचे असते. या ज्ञानामुळे जीवन जगणे सोपे होते.
