* मोनिका अग्रवाल
लग्न एक सुंदर जाणीव आहे. पूर्वी लग्नानंतर एकमेकांना नीट समजून घेण्यासाठी हनिमून ट्रिपला जात असत. परंतु आता डेटिंगचे फॅड वाढल्याने कपल्स लग्नापूर्वीच एकमेकांचा स्वभाव, आवडीनिवडी असे एकमेकांबद्दल बरेच काही माहिती करून घेतात. आता हनिमूनची क्रेझ आहे ती फक्त एवढयाचसाठी की लग्नानंतरचे काही दिवस फक्त दोघांनीच एकमेकांसोबत एकांतात घालवावेत. मात्र हनिमूनसाठी एक चांगले ठिकाण शोधणे आणि फायनल करणे हे प्रत्येक कपलसाठी खूप मोठे काम असते.
त्या ठिकाणाबाबत जास्त माहिती नसल्यास ठिकाण निश्चित करायला बऱ्याच अडचणी येतात. पण आता काळजी करण्याची गरज नाही, कारण आम्ही तुम्हाला अशा काही ठिकाणांची माहिती देणार आहोत, ज्यांना हनिमूनसाठी जास्त पसंती मिळते. ही ठिकाणे तुमच्या खिशावर जास्त भार न टाकता तुमच्यासाठी गोड आठवणी ठरतील. या रोमँटिक आणि सुंदर ठिकाणी तुम्ही तुमची हनिमून ट्रीप अधिकच संस्मरणीय बनवू शकाल.
बर्फाचा कटोरा
बर्फाचा स्वर्ग म्हणून ओळखले जाणारे ऑली हे हनिमूनसाठी एक सुंदर ठिकाण आहे. ते बर्फाचा कटोरा म्हणूनही ओळखले जाते. मस्त वातावरण असलेले हे ठिकाण उत्तराखंडचा श्वास आहे. उन्हाळयात तुम्हाला येथे फुले पाहायला मिळतील. पण हिवाळयात तुम्ही येथे बर्फात खेळल्या जाणाऱ्या प्रत्येक खेळासोबतच स्नोफॉलची मजाही घेऊ शकता. याचे हेच वैशिष्टय तुमच्या हनीमूनची मजा द्विगुणित करेल. अशाच प्रकारचा रोमांचक अनुभव घेण्यासाठी तुम्ही उत्तर पूर्वेलाही जाऊ शकता.
वातावरणात असेल फक्त रोमांस
गोवा हनीमूनसाठी एक चांगला पर्याय आहे. येथील बीच तुम्हाला वेगळयाच वातावरणात घेऊन जातील. गोवा खूपच सुंदर ठिकाण आहे. पोतुर्गीजांच्या काळात बनवलेल्या जंगलात रात्री राहण्याचीही व्यवस्था आहे. शिवाय येथे रोमांस करण्याचा वेगळाच अनुभव घेता येईल.
रोमांसच नाही रोमांचही
रोमांसला रोमांचची फोडणी द्यायची असेल तर कपल्ससाठी कसौलीपेक्षा जास्त चांगले ठिकाण असूच शकत नाही. डोंगरांवर चालण्याची मजा आणि थंडीतील पहाडी जीवन तुम्हाला वेगळा अनुभव देईल. येथील अॅडव्हेंचर आणि रोमांसचे वातावरण तुमच्यासाठी परफेक्ट ठरू शकेल.
कसौली देशातील रोमँटिक डेस्टिनेशनपैकी एक आहे. येथील हिरवळ तुम्हाला आकर्षित करेल. येथे चहूबाजूला पाईन आणि देवनारची उंच झाडे आहेत. कसौली चंदिगड आणि शिमलाच्यामध्ये आहे. येथील अनोखे कॉटेज आणि इंग्रजांच्या काळातील चर्च कुणाचेही लक्ष वेधून घेतील अशीच आहेत.
अॅडव्हेंचर आवडत असेल तर ट्रेकिंग करता येईल. निसर्गप्रेमी असाल तर निसर्गाच्या कुशीत भटकंती करू शकाल. खरेदीची आवड असेल तर शॉपिंग करू शकाल आणि फूडी असाल तर खाण्याच्याही खूप व्हरायटी मिळतील.
जोडीदारासोबत रोमँटिक व्हायचे असेल तर कसौली उत्तम पर्याय आहे, कारण या सुंदर हिल स्टेशनवर आल्यावर तुमचे तन आणि मन दोन्ही प्रसन्न होईल.
वास्तूकलेचे अनोखे उदाहरण
जर तुम्ही पाँडेचरीला गेलात तर समजा की तुम्ही पॅरिसपेक्षाही उत्तम ठिकाणी गेला आहात. फ्रेंच स्टाइलमध्ये सांगायचे झाल्यास, पाँडेचरी तुमची वाट पाहात आहे. फ्रेंच बोलीभाषा, शानदार बीच, मार्केट आदी या ठिकाणाला एका वेगळया सौंदर्यासह सादर करतात.
निसर्गाच्या कुशीत हनिमून
निसर्गाच्या कुशीत हनिमूनचा आनंद घेणे तुमच्यासाठी एक वेगळा अनुभव ठरू शकेल. हो, आम्ही रणथंबोर नॅशनल पार्कबद्दलच बोलत आहोत. येथे तुम्ही वाघांसह असंख्य प्रजातींच्या पक्ष्यांनाही पाहू शकता.
परदेशी बेटापेक्षा कमी नाही
शानदार हनिमूनसाठी यापेक्षा उत्तम ठिकाण क्वचितच दुसरे असू शकेल. तुमचे प्रेम आणि रोमांस समुद्राच्या लाटांप्रमाणे येथे उफाळू द्या. तुम्ही साहसी असाल आणि सुंदर बीचेस तसेच लव बर्ड्ससोबत रोमांच अनुभवायचा असेल तर दमण आणि दीवचे बीच तुम्हाला खुणावत आहेत. हे ठिकाण तुमच्या जोडीदारासोबतच्या तुमच्या क्षणांना जास्तच रोमँटिक बनवेल. हे ठिकाण तुम्हाला एखाद्या परदेशी बेटासारखाच अनुभव देईल.
अल्लेप्पी
केरळमधील योजनाबद्ध पद्धतीने बांधलेल्या शहरांपैकी एक असलेल्या या शहरात जलमार्गाचे अनेक कॉरिडॉर आहेत. शांत रोमांससाठी अल्लेपीहून जास्त चांगले ठिकाण असूच शकत नाही. येथे मनाला शांतता लाभेल आणि जोडीदारात हरवून जाण्यासाठी वेळही मिळेल. खूपच सुंदर असलेल्या अल्लेप्पीत पाण्याच्या मोहक छटा आणि मनमोहक हिरवळही अनुभवता येईल. येथे मार्केट आणि बीचही आहेत.
या गोष्टींकडेही लक्ष द्या
* तुम्ही हवाई प्रवास करत असाल तर काही एअरलाईन्स नवविवाहित दाम्पत्यांसाठी विशेष सवलती देतात. या सवलती किंवा ऑफर्सची माहिती करून घ्या आणि तिकिटे काही महिने आधीच बुक करा.
* हॉटेलसाठी कितीतरी वेबसाईट्स आहेत. यामुळे हॉटेल आधीच बूक करता येईल. हे स्वस्त ठरेल. एकाच परिसरात अनेक दिवसांची ट्रीप असेल तर एका हॉटेलमध्ये एका रात्रीपेक्षा जास्त वेळ राहायचा प्रयत्न करा. कारण अनेकदा असे पाहायला मिळते की बरीच हॉटेल्स एका रात्रीपेक्षा जास्त काळ वास्तव्य केल्यास चांगले डिस्काउंट देतात.
* हॉटेलची बुकिंग करतेवेळीच ब्रेकफास्ट, लंच, डिनरसारख्या सुविधा आहेत की नाहीत, याची संपूर्ण माहिती करून घ्या. बरीच हॉटेल्स ब्रेकफास्ट आणि डिनरचीच सुविधा देतात, कारण लंच टाईमला तुम्ही बाहेर असल्याने बाहेरच लंच करता. तरीही एकदा ऑफर नक्की माहीत करून घ्या.
* खायची ऑर्डर देताना एकदाच सर्व ऑर्डर देण्यापेक्षा थोडे थोडे मागवा. अनेकदा एवढे जास्त ऑर्डर केले जाते की पदार्थ आणि पैसे दोन्ही वाया जातात.
* लक्षात ठेवा की लंच पत्नीच्या आवडीचा असेल तर डिनर पतीच्या आवडीचा असावा. यामुळे खाणे आणि पैसे या दोघांचीही बचत होईल.
* प्रवासात कार्डद्वारे पेमेंट करा. यामुळे डिस्काउंट आणि मनी बॅकचाही फायदा मिळू शकेल.
बऱ्याचदा फिरायला जाताना पूर्ण वेळेसाठी टॅक्सी बूक केली जाते. मात्र, पूर्ण वेळेऐवजी दर दिवशी गरजेनुसारच टॅक्सी बूक करा.
