– प्राची भारद्वाज
केवळ सौंदर्यासाठीच नाही तर आरोग्याच्या दृष्टिकोनातूनही तुम्हाला आपल्या पायांची योग्य काळजी घेणे गरजेचे असते. डॉक्टरांच्या मते पायांची घेतलेली काळजी आपल्याला अनेक समस्यांपासून मुक्तता देण्यात सहाय्यक ठरू शकते. यासाठी तुम्हाला फक्त इतकेच करायचे आहे :
पायांना मोकळा श्वास घेऊ द्या
* अंघोळीनंतर ओल्या पायांना संपूर्ण कोरडे करूनच चपला किंवा सँडल्स घालावेत, कारण ओलसरपणामुळे तिथे सहज बॅक्टेरिया उत्पन्न होऊ शकतात. अनेकदा पायांच्या बोटांमध्ये चीर पडते किंवा खाज येते, हे फंगस असल्याचे लक्षण आहे.
* ऑफिस किंवा पार्टीवरून घरी आल्यावर ताबडतोब पायातले शूज काढून पायांना मोकळा श्वास घेऊ द्यावा. सुती मोजे घालावेत, पण काही वेळातच पाय सुती मोज्यातही घामाने भिजू लागतात.
ब्लड सर्क्युलेशनही तेवढेच आवश्यक
* बराच वेळ पाय खाली अधांतरी ठेवू नका. काही वेळ पाय वर घेऊन बसावे, जेणेकरून त्यांच्यात रक्तप्रवाह सुरळीत सुरू राहील.
* आपल्या पायाचे अंगठे आणि इतर बोटे दिवसातून २-३ वेळा ५ मिनिटे मागेपुढे करून हलवावेत. टाचासुद्धा वरखाली फिरवल्या पाहिजेत.
काही चांगल्या सवयी लावा
* अंघोळ करताना प्युमिक स्टोन, फूट स्क्रब किंवा फाइलरने पाय स्वच्छ करायची सवय करून घ्या. यामुळे पायाच्या मळासोबत मृत त्वचाही निघून जाते.
* दररोज झोपण्यापूर्वी पायांना मॉइश्चरायझर जरूर लावावे. पायांवर शीया बटर, कोको बटर लावून सुती मोजे घालावेत.
* जर तुम्हाला मासग्रंथीच्या गाठीची समस्या असेल तर मसाज क्रीम विकत घेताना सॅलिसिलिक अॅसिड किंवा युरिया असलेले क्रीम घ्यावे, ज्यामुळे पायाच्या गाठी गळून जायला मदत होईल.
* पाय फुटण्याच्या समस्येसाठी पेट्रोलॅटम किंवा लॅक्टिक असिड असलेले क्रीम वापरा.
* जर तुमच्या पायांना घाम येण्याची समस्या असेल तर कॅलेंडुला किंवा क्लोट्रिमाजोलसारखी औषधी पावडर शिंपडू शकता.
* नखांना क्युटिकल क्रीम, व्हिटॅमिन ई किंवा पेट्रोलियम जेली लावून मसाज करावा.
या गोष्टीही विसरू नका
* आपल्या पायांची नखे वेळोवेळी कापत जा. वाकडी तिकडी, तुटलेली नखे खराब तर दिसतातच पण चपला घातल्यावर त्रासही देतात.
* नेलपॉलिश फार वेळ लावून ठेवू नये. काही वेळ नखे विना नेलपॉलिश ठेवली तर त्यांच्यात फ्रेशनेस येतो.
* जुन्या नेलपॉलिशवर कधीही नवा थर चढवू नका, आधी जुने नेलपॉलिश काढून टाका.
* जर तुमची नखे बेरंग, जाडी, तुटलेली असतील तर त्यांना लपवण्यासाठी नेलपॉलिश लावू नका. परिस्थिती बिघडण्याआधी डॉक्टरला दाखवा.
फुटवेअर
* दररोज उंच टाचेच्या चपला घातल्याने पायांच्या हाडांचे नुकसान होऊ शकते. त्यामुळे हाय हील्स हे कधीतरीच वापराव्यात.
* जर तुम्हाला खूप घाम येत असेल तर तुम्ही कापडी किंवा चामडयाचे शूज वापरा.
* सँण्डल किंवा शूज यांची योग्य फिटिंग असणे फार महत्वाचे आहे. दिवसभर टाइट सँडल्स किंवा शूज घालून पायांना सूज येऊ शकते तर शिवाय सँडल किंवा शूज घातल्याने पाय लचकण्याचीही शक्यता असते.
