* भावना खाकर ‘भावू’
‘‘सुंदर मुली, तुझ्या लावण्यावरील मरगळ दूर सार, तुझे सौंदर्य घायाळ करणारे आहे, तू स्वत:ला सावर, अशी कशीही फिरू नकोस, नीटनेटका साजशृंगार करून तुझे सौंदर्य खुलव.’’
यात काहीच शंका नाही की, मेकअप करून स्वत:ला सुंदर ठेवल्याने तुमची प्रतिमा, तुमचे व्यक्तिमत्त्व आणि तुमचा आत्मविश्वास वाढतो. जास्त काही करू नका, फक्त पार्लरमध्ये जा आणि भुवया तसेच केस कापून घ्या आणि मग घरी येऊन आरशात स्वत:ला पाहा. तुम्ही स्वत:च्याच प्रेमात पडाल. तुम्हाला बाहेर जायचे असेल तर खूप नटून – थटून जाण्याऐवजी फक्त गडद रंगाची लिपस्टिक आणि काजळ लावा तसेच केस मोकळे सोडा.
सुंदर आणि आत्मविश्वासू
सौम्य मेकअप आणि महिन्यातून एकदा पार्लरला गेल्याने सर्वसामान्य दिसणारी महिलाही सुंदर आणि आत्मविश्वासू बनते. असे असेल तर नीटनेटके राहून आकर्षणाचा केंद्र बिंदू बनण्यात काय नुकसान आहे? हे देखील तितकंच खरं आहे की, पार्लरमध्ये जाण्याऐवजी घरगुती उपाय करूनही तुम्ही तुमचे सौंदर्य वाढवू शकता.
महिलेने सौंदर्याप्रती जागरूक असणे, हे सुखी वैवाहिक जीवनाचे कारण ठरू शकते. संध्याकाळी पती थकून घरी परततो, तेव्हा त्याची नीटनेटकी, साजशृंगार केलेली पत्नी पाहून त्याचा सगळा थकवा निघून जातो. विचार करा, कंबरेला पदर खोचून, केसांचा घट्ट अंबाडा, मिरच्या, मसाले, फिनाईल आणि घामाचा वास घेऊन समोर उभी असलेली पत्नी पाहून पतीला बरे वाटेल का?
या कामासाठी फक्त 2 मिनिटे लागतात. आपले हात आणि चेहरा धुवा, केस विचरा. टिकली आणि डोळ्यांना काजळ लावा. बस, तुमचा साजशृंगार पूर्ण झाला. जेव्हा तुम्ही दररोज असा साजशृंगार करून तुमच्या पतीची मैत्रीण बनाल, जेव्हा सर्वजण तुमच्या अशा सुंदर राहणीमानाचे, साजशृंगाराचे कौतुक करतील तेव्हा तुमच्या पतीला तुमचा नक्कीच अभिमान वाटेल.
मुले काही कमी नाहीत
‘मिस्टर इंडिया’ ते ‘मिस्टर युनिव्हर्स’पर्यंत आता पुरुषही अशा स्पर्धांमध्ये उत्साहाने सहभागी होतात. त्यामुळेच सध्याच्या काळातील ब्युटी पार्लरची वाढती संख्या आणि पुरुषांसाठी जीमची वाढती संख्या हे दर्शविते की, ते देखील स्वत:ला आकर्षक दिसण्याच्या प्रयत्नात मागे राहू इच्छित नाहीत, कारण आता मुलींनाही तीच मुलं आवडतात जी स्वत:ला सुंदर ठेवतात.
दाढीची स्टाईल, केशरचना, केसांचा रंग, कानात घालणे, पोनीटेल ठेवणे, कपड्यांमध्ये स्टाईल इ. इतकेच काय, आता मुलांना मॉइश्चरायझर्स, पौष्टिक क्रीम, आफ्टर शेव्ह क्रीम्स, लोशन, लिप बाम, सनस्क्रीन, हेअर क्रोम्स आणि हेअर जेलबद्दल माहिती आहे आणि ते हे सर्व वापरतात.
तुमच्या शरीरातील नको असलेले केस काढून टाकण्यासाठी वॅक्सिंग करणे, यामध्ये हात, पाय, काख आणि छातीच्या वॅक्सिंगचाही समावेश आहे. मुलांची त्वचा लक्षात घेऊन विविध प्रकारचे क्लीनअप आणि फेशियल केले जात आहे. त्यांचे हात-पाय स्वच्छ ठेवण्यासाठी काही महिन्यांच्या अंतराने ते मॅनिक्युअर आणि पेडीक्योर करून घेत आहेत.
असे असेल तर मग आम्हा महिलांनीही सुंदर दिसायलाच हवं. तर मग तुम्ही कशाची वाट पाहात आहात? आपण आपला मोबाईलदेखील अपडेट करतो. हा तर आपल्या व्यक्तिमत्व विकासाचा भाग आहे.
