– प्राची भारद्वाज
ड्रेसिंग टेबल खोलीतील ते फर्निचर आहे, जे प्रत्येक स्त्रीच्या मनाची भावना समजते, तिला सुंदर दिसण्यात मदत करते. परंतु बऱ्याचवेळा आपण ड्रेसिंग टेबलला इतर टेबलांप्रमाणे वस्तू साठवण्याचे ठिकाण समजतो आणि त्यावर अनावश्यक वस्तू ठेवतो. म्हणून आपले ड्रेसिंग टेबल व्यवस्थित ठेवणे महत्वाचे आहे जेणेकरून जेव्हा आपल्याला मेकअप करायचा असेल, तेव्हा आपणास कामाच्या वस्तू त्वरित मिळू शकतील आणि हे देखील जाणून घ्या की ती कोणती कॉस्मेटिक साधने आहेत, जी मेकअप करताना पूर्णपणे हाताशी असावीत.
सर्वप्रथमदररोज आपल्याला कोणत्या कॉस्मेटिक साधनांची आवश्यकता आहे याचा विचार करा. त्यांना समोर ठेवा. मग आपल्या ड्रेसिंग टेबलच्या रचनेत किती जागा आहे ते पहा. प्रत्येक ड्रॉव्हरमध्ये एक ड्रॉव्हर लाइन ठेवा, जेणेकरून वस्तू इकडे तिकडे सरकणार नाहीत. वरच्या ड्रॉव्हरमध्ये मेकअप अॅक्सेसरीज आणि खालच्या ड्रॉव्हरमध्ये हेअर स्टाईलिंग टूल्स ठेवा. आतल्या ड्राव्हरमध्ये कमी वापरले जाणारी मेकअप उपकरणे आणि अॅक्सेसरीज ठेवा. चला, याबद्दल तपशीलवार माहिती जाणून घेऊया :
कोणत्या वस्तू कुठे ठेवाव्यात
* दररोज त्वचेची देखभाल करणाऱ्या उत्पादनांची आवश्यकता असते – ऑफिससाठी तयार होताना किंवा संध्याकाळी पार्कमध्ये फिरायला जाताना. म्हणून मॉइश्चरायझर, टोनर, परफ्यूम किंवा डिओड्रेन्ट, फेस क्रीम, हँड लोशन, सनस्क्रीन आणि गुलाबजल आपल्या ड्रेसिंग टेबलवर एकत्र ठेवा. या सर्वांसाठी एक खुले बास्केट आणणे चांगले राहील आणि त्यांना ड्रेसिंग टेबलवर सगळयात वरती हाताशी ठेवा.
* ड्रेसिंग टेबलच्या वरील काउंटरवर रात्री वापरले जाणारे अंडर आय जेल, नाईटक्रीम, स्किन लोशन इ. एकत्र ठेवा.
* आता आपल्या मेकअप उत्पादनांचे २ भागांमध्ये विभाजन करा -आपल्याला दररोज आवश्यक असलेल्या वस्तू आणि पार्टी मेकअपसाठी आपल्याला आवश्यक असलेली सौंदर्यप्रसाधने.
* दररोज वापरली जाणारी सौंदर्यप्रसाधने जसे की बीबी क्रीम, कॉम्पॅक्ट, कन्सीलर, आयलाइनर, काजळ, आयब्रो पैंसिल, लिपलाइनर, लिपस्टिक, फेस क्लीनिंग वाइप्स इत्यादींना आपण वरच्या ड्रॉव्हरमध्ये एका जागी ठेवले पाहिजे, जेणेकरुन दररोज सकाळी तयार होताना तुमचा वेळ वाया जाणार नाही.
* केवळ पार्टी लूकसाठी वापरली जाणारी सौंदर्यप्रसाधने जसे की फाउंडेशन, आयशॅडो, लिक्विड आयलाइनर, मस्कारा, ब्लशर, कंन्टूरिंग ब्रश, हायलाइटर इत्यादी एखाद्या व्हॅनिटी पाउचमध्ये एकत्र ठेवले पाहिजेत. आपण त्यांना खालच्या ड्रॉव्हरमध्येदेखील ठेवू शकता, कारण ते अधूनमधूनच वापरले जातील.
* सर्व मेकअप ब्रशेस विशेष करून सांभाळले पाहिजेत, जेणेकरून ते अस्वच्छ होऊ नयेत आणि आरोग्यदायी राहतील. यासाठी स्वतंत्र पाउच आणा. यासह आपण पापण्यांसाठी आयलॅश कर्लर आणि फाउंडेशन लावण्यासाठी ब्यूटी ब्लेंडरदेखील ठेवू शकता. हे केवळ तेव्हाच कामी येईल, जेव्हा आपणास एखाद्या विशेष प्रसंगासाठी तयार व्व्हायचे असेल.
* त्याच अॅक्सेसरीज परिधान केल्या जातात, ज्या सहजतेने उपलब्ध होतात. ज्यांना आपण अधिकच सांभाळून खूप आतमध्ये ठेवतो, ते बहुतेकदा पडूनच राहतात. म्हणून ऑर्गनायजरच्या मदतीने आपले सामान हाताशी ठेवा, जेणेकरून आपण अदलून-बदलून नेकलेस, कर्णफुले आणि बांगडया घालू शकाल.
* एकाच वेळेस वापरले जाणारे सामान एकत्र साठवा जसे की पॅडीक्योर आणि मॅनीक्योरमध्ये वापरली जाणारी साधने एकत्र आणि फेशियलमध्ये कामी येणारे एकत्र.
कसे ऑर्गनाइज करावे
बाजारात अशी अनेक उत्पादने आहेत, ज्यांच्या मदतीने आपण आपले ड्रेसिंग टेबल सहजपणे ऑर्गनाइज करू शकता :
* जर ड्रेसरचा ड्रॉव्हर खोल असेल तर आपण त्यामध्ये अक्रेलिक ऑर्गनायझर ठेवून त्यात असलेल्या कप्प्यांमध्ये विविध वस्तू ठेवू शकता. जसे की फणी एकत्र, मेकअपचे सर्व ब्रशेस एकत्र, काजळ, आयलाइनर इत्यादी पेन्सिल्स एकत्र, केसांचे क्लच आणि रबर बँड एका कप्प्यात.
* केसांच्या पिनांना चुंबकाला चिकटवून एका ठिकाणी ठेवता येईल.
* लिपस्टिकसाठी लिपस्टिक ऑर्गनायझर आणा. सर्व लिपस्टिक सहज यामध्ये साठवल्या जाऊ शकतात. ऑर्गनायझरमध्ये शेडनुसार लिपस्टिक ठेवा. प्रथम मॅट आणि नंतर ग्लॉसी शेड्स किंवा मग ब्राइटहून लाइट शेड. असे करून जेव्हा आपल्याला ज्या प्रकारचा मेकअप करण्याची आवश्यकता असेल, तेव्हा आपण वेळ न गमावता लगेच आपल्या पसंतीची लिपस्टिक शेड निवडू शकता.
* नेल पेंट्सदेखील त्याचप्रमाणे गडद ते हलक्या शेडमध्ये ठेवा. त्याच ऑर्गनायझरमध्ये नेल पेंट रीमूव्हर आणि कॉटन बॉलदेखील ठेवा. नेल फाइलर आणि बफर वगैरेदेखील येथे ठेवा, जेणेकरून जेव्हा जेव्हा हात आणि नखे सजवायची असतील तेव्हा सर्व गोष्टी सहजपणे एकाच ठिकाणी सापडतील.
* हेअर ड्रायर, हेअर कर्लर इत्यादी केशरचनेची साधने तळाच्या ड्रॉव्हरमध्ये ठेवा आणि केबल क्लिपने त्यांचे तार बांधा.
* खाली असलेल्या ड्रॉव्हरच्या उर्वरित जागेत आपण पाउचमध्ये अतिरिक्त टिकल्या, मेकअप पॅलेट, फाउंडेशन इत्यादी सामान जे कमी वापरले जाते, ठेवू शकता.
* आपण बांगडया ठेवण्यासाठी एक बांगडी स्टँड आणू शकता, जे ड्रेसिंग टेबलच्या आत सहज बसू शकते. बांगडया क्रॅकदेखील होणार नाहीत आणि आपल्याला आरामात मॅचिंग रंगाच्या मिळतील.
* केसांचे ब्रश ठेवण्यासाठी आपण जुने मग किंवा मेणबत्ती होल्डरदेखील वापरू शकता. हे सुंदरदेखील दिसते आणि वापरण्यास सुलभ असते.
* ड्रेसिंग टेबलवर रनरदेखील अंथरू शकता, ज्याच्या दोन्ही बाजूंना खिशे असतील. या खिशांत तुम्ही परफ्युमच्या बाटल्या, टिशू पेपर, नॅपकिन्स इत्यादी ठेवू शकता.
आपल्याकडे ड्रेसिंग टेबल नसल्यास कोणत्याही टेबलाच्या वरती, भिंतीवर आरसा टांगून ड्रेसिंग टेबलासारखे उपयोग करू शकता. जवळच कार्ट, ऑर्गनाइझर ठेवू शकतात, ज्यात भरपूर जागा असते.
योग्य प्रकाश असू द्या
मेकअप करत असताना चेहऱ्यावर योग्य प्रकाश पडणे फार महत्वाचे आहे, म्हणून आपल्या ड्रेसिंग टेबलवर योग्य प्रकाशाची व्यवस्था ठेवा, नाहीतर असे व्हायला नको की जेव्हा आपण मेकअप केल्यानंतर बाहेर पडाल तेव्हा चेहऱ्याचा काही वेगळा अवतार दिसू लागेल.
या चुका करु नका
* आपले ड्रेसिंग टेबल व्यवस्थित करताना आपल्या सौंदर्यप्रसाधनांच्या कालबाह्यतेची तारखादेखील तपासा. कालबाह्य सौंदर्यप्रसाधनांना जतन करण्यात कोणताही लाभ नाही.
* कमी वापरले जाणारे आणि दररोज वापरले जाणारे मेकअप आयटम मिसळू नका, अन्यथा जेव्हा तुम्हाला मेकअप करायचा असेल तेव्हा तुम्ही बराच वेळ वाया घालवाल. या दोघांना वेगळे ठेवणे शहाणपणाचे आहे.
* ऑर्गनाईज करताना फॅन्सी सजावट करण्याऐवजी उपयुक्त पद्धतीकडे लक्ष द्या.
* फक्त ड्रेसिंग टेबल सजवण्यासाठी व्यर्थ सामग्री खरेदी करू नका, कारण ड्रेसिंग टेबल एक उपयुक्त फर्निचर आहे, ड्रॉईंग रूममध्ये सजावटीची वस्तू नाही.
* एकदा ऑर्गनाईज करणे सोपे आहे परंतु ते टिकवून ठेवणे अवघड आहे. ज्या वस्तुंसाठी आपण आपल्या ड्रेसिंग टेबलवर जागा बनविली आहे, त्या वस्तू त्याच ठिकाणी ठेवत जा, अन्यथा तुमची मेहनत वाया जाईल.
आपले ड्रेसिंग टेबल ऑर्गनाईज करणे केवळ हाच उद्देश नाही, तर ते वापरण्यास सुलभ असणे हाच योग्य उद्देश आहे.