* सोमा घोष
अक्षया गुरव ही मराठीतली एक प्रसिद्ध अभिनेत्री आहे जी मुंबईत लहानाची मोठी झाली. ‘मेंदीच्या पानावर’ या मराठी मालिकेत प्रमुख भूमिका साकारून तिने अभिनय क्षेत्रातील कारकिर्दीला सुरुवात केली. या मालिकेतील तिच्या अभिनयाचे कौतुक झाले आणि त्यामुळेच ती घरघरात पोहोचली. मुंबईत मॅनेजमेंटचा अभ्यासक्रम पूर्ण केल्यानंतर तिने मॉडेलिंग सुरू केले आणि पुढे मराठी इंडस्ट्रीत पाऊल ठेवले. मध्यमवर्गीय कुटुंबात लहानाची मोठी झालेल्या अक्षयाच्या वडिलांनी पोलीस दलात काम केले आहे, तर आई गृहिणी आहे. कुटुंबातील कोणीही मनोरंजन क्षेत्रात नसल्यामुळे अभिनय क्षेत्रात प्रवेश करणे अक्षयासाठी सोपे नव्हते. अक्षयाला जेवण बनवायला प्रचंड आवडते. मेथीचे पराठे बनवायचे काम अर्धवटच सोडून तिने माझ्याशी गप्पा मारल्या, ज्या खूपच मनोरंजक होत्या. चला, तिचा प्रवास तिच्याच तोंडून जाणून घेऊया.
तुला या क्षेत्रात येण्याची प्रेरणा कुठून मिळाली?
माझ्या कुटुंबातील कोणीही या क्षेत्रात नाही, पण माझ्या आजोबांना विविध वाद्ये वाजवायची आवड होती. तबला, वीणा, सतार, हार्मोनियम इत्यादी वाद्ये त्यांच्याकडे होती. गावात कुठलाही उत्सव असला की ते वाद्य वाजवून गायचे. याव्यतिरिक्त त्यांनी ‘एकच प्याला’ या मराठी नाटकात काम केले होते, हे मला माझ्या आत्येकडून समजले. हा त्यांचा छंद होता. कदाचित त्यांच्यामुळेच आम्हा भावंडांमध्ये अभिनयाची आवड निर्माण झाली असेल. माझे वडील सेवानिवृत्त, आई गृहिणी तर भाऊ इंजिनीअर आहे. मी अभिनय क्षेत्रात भवितव्य घडवावे, असे माझी आत्या मला सतत सांगायची. मला मात्र अभिनयाची आवड नव्हती.
२००९-१० मध्ये मी एका सौंदर्य स्पर्धेत भाग घेतला आणि तेथूनच अभिनय क्षेत्रातील माझा प्रवास खऱ्या अर्थाने सुरू झाला. त्यानंतर मी बरेच ऑडिशन्स दिले आणि अभिनयालाही सुरुवात केली.
तुला अभिनय क्षेत्रात काम करायचेय, असे पहिल्यांदा आईवडिलांना सांगितल्यानंतर त्यांची प्रतिक्रिया काय होती?
माझ्यापेक्षा जास्त उत्साही माझे आईवडील होते. त्यांचे म्हणणे होते की, जे कोणते काम करशील ते उत्तम आणि प्रामाणिकपणे कर, जेणेकरून तुझे नाव होईल. संपूर्ण कुटुंब नेहमी तुझ्यासोबत असेल. गेल्या १० वर्षांपासून मी काम करत आहे. मला कधीच तणाव आला नाही, कारण माझे कुटुंब माझ्यासोबत आहे. अनेकदा वेळेवर काम न मिळाल्यामुळे मला वाईट वाटायचे, पण त्या प्रत्येक वेळी कुटुंबाचा भक्कम आधार मिळाला. फक्त माझ्यासाठीच नाही तर माझ्या बहीण आणि भावाच्या पाठीशीही ते ठामपणे उभे राहतात. प्रत्येक मुलगा आणि मुलीसाठी त्यांचे आईवडील त्यांच्यासोबत असणे गरजेचे असते, जेणेकरून तुम्ही कोणत्याही समस्येचा सहज सामना करू शकता.
तुला पहिला ब्रेक कधी आणि कसा मिळाला?
वर्षभर मी ऑडिशन्स देत होते. पहिला ब्रेक २०१३ मध्ये ‘मेंदीच्या पानावर’ या मराठी मालिकेतून मिळाला. यात मी प्रमुख भूमिका साकारली. मी नेहमीच सकारात्मक भूमिका साकारल्या आहेत. मला नकारात्मक भूमिका आवडत नाहीत. मी महिला प्रधान चित्रपट जास्त केले आहेत. सुरुवातीला मी मराठी नाटकांमधूनही काम केले, ज्यामुळे मी मराठी भाषेतील अचूक, स्पष्ट उच्चार, बोलण्याची पद्धत, शब्दफेक, इत्यादी शिकले. माझ्या मते, रंगभूमीच कलाकाराला घडवते. पहिल्या दोन मालिकांदरम्यान मी अभिनयातील बारकावे शिकले.
तुला किती नकारांचा सामना करावा लागला?
पहिल्याच मालिकेत मला नकारात्मक भूमिका मिळाली होती, मात्र मी त्याला नकार दिला. त्यानंतर त्याच मालिकेत मला सकारात्मक भूमिका मिळाली. टीव्हीवरील मालिका केल्यानंतर मी मराठी चित्रपटांसाठी ऑडिशन्स द्यायला सुरुवात केली. मोठया पडद्यावर काम करण्याची माझा इच्छा होती, पण त्यात मला यश मिळाले नाही, कारण मी रोज टीव्हीवर दिसत असल्यामुळे मला चित्रपटात काम द्यायला कोणीही तयार नव्हते. त्यामुळे ७-८ वर्षांपर्यंत मी मालिकांमध्येच काम केले. त्यानंतर ब्रेक घेतला आणि नंतर चित्रपटात काम करू लागले. आजकाल बरेच कलाकार टीव्हीसह चित्रपट आणि वेब सीरिज असे सर्व सोबतच करत आहेत.
कोणत्या मालिकेमुळे तुझे जीवन बदलले?
‘मानसीचा चित्रकार’ या मालिकेतील तेजस्विनीच्या भूमिकेमुळे मी घराघरात पोहोचले. ‘दिया और बाती’ या मालिकेचा हा रिमेक होता. या मालिकेने माझे जीवन बदलले. शूटिंगच्यावेळी मला भेटण्यासाठी आजूबाजूचे लोक तेथे यायचे. मी घरी गेल्यानंतरही लोक मला घरी भेटायला यायचे. सर्व जण माझ्या आईवडिलांना माझ्या नावाने ओळखू लागले होते.
नकारात्मक किंवा खलनायिकेची भूमिका न करण्यामागचे तुझे काही खास कारण आहे का?
मला नेहमीच असे वाटत आले आहे की, सकारात्मक भूमिका साकारणाऱ्या कलाकारांकडे आदरपूर्वक पाहिले जाते. त्यांचे फोटो मोठमोठया होर्डिंग्जवर झळकतात. लोक त्यांचे आणि त्यांच्या अभिनयाचे कौतुक करतात. खलनायकाची भूमिका साकारणाऱ्यांना असा मान मिळत नाही. शिवाय माझा चेहराही खलनायिकेसारखा दिसत नाही. बहुसंख्य चित्रपटांचे कथानक हिरोभोवती फिरणारे असते. अभिनेत्री किंवा महिलांवर आधारित फार कमी चित्रपट बनतात. मला मात्र महिलांना केंद्रबिंदू ठेवून तयार केलेले चित्रपट आवडतात.
हिंदी चित्रपटात काम करण्याची तुझी इच्छा आहे का?
मी मागील दोन वर्षांपासून हिंदीत काम करण्यासाठी प्रयत्न करत आहे, कारण मराठीत मी खूप काम केले आहे. हिंदीत वेब सीरिज, चित्रपट किंवा मालिका यापैकी काहीही करायला आवडेल.
हिंदी वेब सीरिजमध्ये अंतर्गत दृश्य बरीच असतात. ती तू सहजपणे करू शकतेस का?
कथानकाची गरज, सहकलाकार, निर्माता, दिग्दर्शक हे सर्व पाहून त्यानुसार अंतर्गत दृश्य करायला काहीच हरकत नाही. मी मात्र स्वत:साठी काही मर्यादा आखून घेतल्या आहेत आणि त्यांचे उल्लंघन करायला मला आवडणार नाही.
पती भूषण वाणीशी तुझी कशी ओळख झाली?
एका चित्रपटासंबंधी बोलायला मी माझ्या फ्रेंडसोबत एका निर्मात्याच्या घरी गेले होते. तिघे भूषणने स्वत:हून आमच्या सर्वांसाठी कॉफी बनवली. ते पाहून मी गमतीने म्हटले की, हा मुलगा खूप चांगला आहे आणि मला आवडला. माझे हेच बोलणे नंतर खरे ठरले. भूषणने ३१ डिसेंबर २०१६ च्या रात्री १२ वाजता लोणावळयातील नवीन वर्षाच्या पार्टीत मला लग्नासाठी मागणी घातली आणि मी होकार दिला. त्यानंतर ६ महिन्यांनी आम्ही लग्न केले.
पतिमधील एखादी खास गोष्ट, ज्यामुळे तो तुला आवडतो?
खूपच शांत, गुणी आणि दयाळू आहे. प्रत्येक समस्येचे उत्तर त्याच्याकडे असते. म्हणूनच मी त्याला सांताक्लॉज किंवा पॅडीमॅन म्हणते.
तू किती फॅशनेबल आहेस? खाण्यावर तुझे किती प्रेम आहे?
मला फॅशन करायला जराही आवडत नाही. माझा छोटा भाऊ गणेश गुरव आणि नवरा भूषण दोघांनाही फॅशन आवडते. खाण्यावर माझे खूप प्रेम आहे. त्यामुळेच डाएट करणे माझ्यासाठी खूपच अवघड होते. मी सर्व प्रकारचे नॉनव्हेज बनवू शकते. आईच्या हातचे वरण भात, तूप आणि भाजी खायला मला खूप आवडते.
काही संकल्प केला आहेस का?
कुठलाच संकल्प नाही, कारण संकल्प मध्येच तुटतात. पण हो, चांगले काम करण्याची माझ्या आपल्या सर्व माणसांसोबत मिळून निरोप देण्याची इच्छा आहे.
आवडीचा रंग – सफेद.
आवडता पेहराव – भारतीय.
आवडते पुस्तक – स्मिता, स्मित आणि मी.
बेस्ट कॉम्प्लिमेंट – मी महान अभिनेत्री स्मिता पाटील यांच्यासारखी दिसते असे अनेकांनी सांगणे.
वेळ मिळाल्यास – व्यायाम, कुटुंबासोबत वेळ घालवणे.
आवडता परफ्युम – बलगरी अक्का.
जीवनातील आदर्श – चांगले आणि मेहनतीने काम करणे.
सामाजिक कार्य – एखाद्या गरजवंताची मदत करणे.
