– सोमा घोष
संघर्ष प्रत्येकालाच करावा लागतो आणि मलाही तो करावा लागत आहे. संघर्षापासून पळ काढून कोणीही यशस्वी होऊ शकत नाही. संघर्षातून मिळालेली कुठलीही गोष्ट अनमोलच असते. असेच काहीसे सांगत आहे मुंबईतील २२ वर्षीय मराठी अभिनेत्री तन्वी बर्वे, जिला लहानपणापासूनच काही वेगळे आणि आव्हानात्मक काम करायला आवडायचे. यासाठी तिला नेहमीच आईवडिलांचे सहकार्य मिळाले. किशोरवयात तन्वीला जत्रेला जायला खूप आवडायचे. सुंदर चेहरा, नम्र स्वभाव आणि हसतमुख तन्वी सध्या स्टार प्रवाहवरील ‘ठिपक्यांची रांगोळी’ या मालिकेच्या चित्रिकरणामध्ये व्यस्त आहे. यात ती प्राची कानिटकरची भूमिका साकारत आहे. वेळात वेळ काढून तिने आमच्यासोबत फोनवर संवाद साधला. चला, तिच्या प्रवासाबाबत तिच्याकडूनच जाणून घेऊया.
तुला अभिनयाची प्रेरणा कुठून मिळाली?
मला अभिनयाची आवड नव्हती. माझी मोठी बहीण शाळेत असताना नाटकात काम करायची. तिचे शालेय शिक्षण पूर्ण झाल्यानंतर एके दिवशी तिच्या शिक्षिकेला तिची आठवण झाली. त्यांचा नाटकाचा ग्रुप होता. त्यांनी माझ्या बहिणीसोबत मलाही त्यांच्या ग्रुपमध्ये घेतले. तिथूनच माझ्यामध्ये अभिनयाची आवड वाढू लागली. मी मोनो अॅक्ट, आंतरराज्य शालेय स्पर्धेत भाग घेऊ लागले. तिथूनच मला अभिनयाची प्रेरणा मिळाली. महाविद्यालयात असताना मी अनेक नाटकांमध्ये अभिनय केला आणि पुरस्कारही मिळवले. त्यानंतर काही प्रायोगिक नाटकंही केली. यातून मला खूप काही शिकायला मिळाले.
महाविद्यालयात असतानाच मला पहिली टीव्ही मालिका मिळाली. त्यामुळे सर्वजण मला ओळखू लागले आणि मला आणखी काम मिळत गेले. ही माझी तिसरी मालिका आहे.
अभिनय क्षेत्रात करियर करण्यासंदर्भात पहिल्यांदाच तू घरी सांगितलेस तेव्हा पालकांची प्रतिक्रिया काय होती?
माझे वडील एका मंगल कार्यालयाचे व्यवस्थापक आणि आई गृहिणी आहे. आई घरूनच दागिन्यांचा व्यवसायही करते. अभिनय क्षेत्रात करिअर करायचे की नाही, हे ठरवायला मला बराच वेळ लागला, कारण त्यावेळी मी महाविद्यालयात शिकत होते. मला कधी मुख्य भूमिका तर कधी छोटया भूमिका मिळायच्या. घरून मला कधीच विरोध होत नव्हता, पण मला कधी घरी यायला उशीर व्हायचा तर कधी मी घरी जाऊच शकायचे नाही, कारण रिहर्सल अर्थात तालमी सुरूच असायच्या. त्यामुळे माझ्या आईवडिलांना माझी काळजी वाटायची. त्यांना या क्षेत्राबद्दल काहीच माहित नव्हते. हळूहळू त्यांनी माझे काही शो पाहिले, माझा अभिनय बघितला. यामुळे त्यांना माझ्या कामाची माहिती झाली आणि त्यांनी मला परवानगी दिली. आईची मला खूपच मदत मिळते. मी काहीही केले तरी ते तिला आवडते, पण माझे वडील खूप मोठे टीकाकार आहेत. माझे प्रत्येक काम ते अतिशय बारकाईने पाहातात आणि मला सल्ला देतात.
तुला पहिला ब्रेक कधी आणि कसा मिळाला?
मी अकरावीत असताना मला मराठी दिग्दर्शक सतीश राजवाडे यांच्यासोबत ‘ती सध्या काय करते’ या मराठी चित्रपटात काम करण्याची संधी मिळाली. त्यांचे आमच्या कुटुंबाशी मैत्रीचे नाते आहे आणि मी छोटेमोठे कामे करते, हे त्यांना माहीत होते. त्यांनी मला या चित्रपटातील एका छोटया भूमिकेसाठी काम करण्याची संधी दिली. महाविद्यालयात असताना मला पहिला मोठा ब्रेक मिळाला होता. टीव्ही मालिकांसोबतच मी चित्रपटही करते. मला मराठी चित्रपटातील भूमिकांसाठी अनेक पुरस्कार मिळाले आहेत. माझा ‘फनरल’ हा मराठी चित्रपट यावर्षी प्रदर्शित होणार आहे.
या मालिकेत काम करण्यामागील तुझं खास कारण काय आहे?
हे एक पारंपारिक, एकत्र राहणारे कुटुंब आहे, जिथे आधुनिक विचारसरणी असलेल्या माझ्या मैत्रिणीचे माझ्याच भावासोबत लग्न होते आणि ती आमच्या घरची सून होते. या मालिकेत मी कुटुंबातील सर्व भावंडांमध्ये सर्वात लहान बहिणीची भूमिका साकारत आहे. कुटुंबात माझा भाऊ आणि त्याची बायको नेहमी छोटयाशा गोष्टीवरूनही भांडतात. त्यांचा राग घालवण्यासाठी माझे वडील आणि घरातील सर्व तरुण काहीतरी युक्ती शोधून काढतात.
ही भूमिका तुझ्या जीवनाशी किती मिळतीजुळती आहे?
वास्तविक जीवनातील माझे कुटुंब खूपच छोटे आहे, पण मालिकेतील मोठया कुटुंबासोबत चित्रिकरण आणि त्यांच्यासोबत मजा करायला मला आवडते. वास्तव जीवनात मला एक विवाहित बहीण आहे. तिला भेटायला मला क्वचितच वेळ मिळतो.
अभिनयाव्यतिरिक्त तुला काय करायला आवडते?
मी पत्रकारितेचा अभ्यास केला आहे. पहिल्या लॉकडाऊननंतर, मी बराच वेळ घरी होते. त्यानंतर मी काही दिवस टीव्ही वाहिनीवरील एका काल्पनिक कथानक असलेल्या मालिकेसाठी सहाय्यक क्रिएटिव्हिटी म्हणून काम केले. हा माझ्यासाठी एक अनुभव होता आणि असे काम करण्याची माझी इच्छाही होती. ज्या क्षेत्रात मी पडद्यावर काम करते त्याच क्षेत्रात पडद्यामागे काम करण्याची संधी मला मिळाली. ज्या गोष्टी अभिनय क्षेत्रात शिकता येत नाहीत त्या मला येथे शिकायला मिळाल्या.
तुला काही संघर्ष करावा लागला का?
मला पहिले काम काहीही संघर्ष न करताच मिळाले, मात्र काम टिकवून ठेण्यासाठी खूप संघर्ष करावा लागत आहे. पहिले काम मला एका ओळखीतल्या दिग्दर्शकाने दिले होते. त्यामुळे काही लोकांना वाटते की, मला संघर्ष करावा लागत नाही आणि आरामात काम मिळाले आहे. म्हणूनच माझ्या अभिनयाचे ते कौतुक करत नाहीत. हा शिक्का पुसून काढण्यासाठी मला खूप संघर्ष करावा लागत आहे.
कोणत्या मालिकेमुळे तुझे आयुष्य बदलले?
‘मोलकरीण बाई’ ही माझी पहिली मालिका होती. त्याआधी मी इतक्या मोठया स्तरावर काम केले नव्हते. या मालिकेमुळे लोक मला ओळखू लागले. या मालिकेमुळे मी खूप काही शिकले. त्याचा उपयोग मला आता होत आहे.
हिंदी चित्रपट किंवा वेब सिरीजमध्ये काम करण्याची इच्छा आहे का?
मी प्रयत्न करत आहे, जिथे ऑडिशन्स होतात तिथे मी ऑडिशन देत आहे. हाही माझ्यासाठी एक संघर्ष आहे, ज्याद्वारे मी मराठीतून हिंदी चित्रपटसृष्टीत पदार्पण करण्याचा प्रयत्न करत आहे. येत्या काही दिवसांत ही संधी मला मिळेल, अशी आशा आहे.
अंतर्गत दृश्य तू सहजतेने करू शकतेस का?
मी ते कधीच केले नाही, पण जर कथेची मागणी असेल तर ते मी करू शकते. माझी सहकलाकार आणि मी त्या दृश्यावर जर चर्चा करू शकलो तर असे दृश्य करायला मला काहीच अडचण नसेल.
कोणत्या दिग्दर्शक आणि सहकलाकारांसोबत तुला हिंदी चित्रपटात काम करायला आवडेल?
मी दिग्दर्शक संजय लीला भन्साळी यांच्यासोबत काम करण्यास उत्सुक आहे, कारण त्यांनी चित्रपटातील नायिकेला इतक्या उंचीवर नेले आहे, जे खरोखरच कौतुकास्पद आहे. मराठी इंडस्ट्रीत नायक नेहमीच वैभवात जगणारे दाखवले जातात आणि नायिका एखाद्या सर्वसामान्य कुटुंबातली असते. असे पूर्वी हिंदी चित्रपटांमध्येही दाखवले जायचे, पण आता हे चित्र बदलत आहे. संजय लीला भन्साळींनी नायक कितीही मोठा केला तरी तो नायिकेपेक्षा मोठा होऊ शकत नाही. त्यांच्यासोबत काम करणे हा माझ्यासाठी स्वर्गीय अनुभव असेल. याशिवाय मला अभिनेता विकी कौशलसोबत काम करायचे आहे.
तू खवय्यी, फॅशनेबल आहेस का?
मला सर्व काही खायला आणि बनवायला आवडते. सुट्टीच्या दिवशी मी घरीच काहीतरी बनवते आणि सेटवरही घेऊन जाते. सगळे एकत्र जेवतात. मला स्वयंपाक कसा करायचा हे माहीत आहे. मला माझ्या आईच्या हातची डाळ-ढोकळी खूप आवडते. गोड पदार्थांमध्ये माझी आई लापशी खूपच छान बनवते.
फॅशनबद्दल मी फारशी जागरूक नाही, पण इंडस्ट्रीत राहायचे तर काहीतरी वेगळे करावेच लागते. मला पारंपरिक कपडे जास्त आवडतात. मी पारंपरिक छापील कापड विकत घेऊन स्वत:साठी ड्रेस शिवते. मला कपडयांच्या डिझाईनबाबत थोडेफार समजते. मला फॅशन आणि शॉपिंग खूप आवडते.
आवडता रंग – निळा.
आवडता ड्रेस – पाश्चिमात्य कपडे.
आवडते पुस्तक – कृष्णकिनार (अरुणा ढेरे).
आवडते परफ्यूम – अत्तर.
जीवनातील आदर्श – परिस्थिती कशीही असो, आईवडिलांचा आदर करणे.
वेळ मिळाल्यास – बाहेर फिरायला जाणे.
स्वप्नातला राजकुमार – माझ्या क्षेत्रातील असावा, सहनशील आणि कर्तव्यदक्ष असावा.
सामाजिक कार्य – गरजूंना मदत करणे.
