* प्राची भारद्वाज
किट्टी पार्टी म्हटली की नजरेसमोरून चित्र तरळून जातं ते आपापसात थट्टामस्करी करणाऱ्या गृहिणीवर्गाचं. जिथे गप्पाटप्पा, चविष्ट खाद्यपदार्थांची रेलचेल, गॉसिप, नटलेल्या-सजलेल्या क्रॉकरी इ. चा बडेजाव करणाऱ्या गृहिणी असतात. पण आता किटी पार्टीचं स्वरूप बदलत आहे. आता प्रत्येक किट्टी पार्टी एकसारखीच नसते. तर वेगवेगळे ग्रुप वेगवेगळ्या प्रकारच्या किट्टी पार्टीचे अयोजन करतात. मग वाट कसली बघताय? नवीन वर्षात तुम्हीही बदलून टाका किट्टी पार्टीचं रंगरूप आणि द्या एक नवा लुक.
प्रत्येकवेळी नवी संकल्पना
बंगळुरूमधील शोभा सोसायटीतील महिलांनी किट्टीची थीम ठेवली होती ‘टपोरी’ आणि मग सगळ्या महिला टपोरी असल्यासारख्या आल्या होत्या. कोणी गळ्यात रूमाल बांधला होता तर कोणी गालावर मोठा तीळ काढला होता.
मुंबईतील शारदा हाऊसिंग कॉम्प्लेक्सच्या महिलांनी त्यांच्या पार्टीची थीम ठेवली होती ‘मुगल.’ मग सर्वच महिला छानसा अनारकली सूट घालून आल्या होत्या. यजमानीण बाईंनी मुगल काळातील बैठकीप्रमाणे बैठक सजवली व शेरोशायरीने वातावरण खुलवले.
पुण्यातील एका किट्टीच्या सदस्यांनी वेगवेगळ्या राज्यांची वेशभूषा करून यायचे ठरविले व त्या राज्याची माहिती जसे की त्या राज्याचा इतिहास, तेथील खाद्यसंस्कृती, प्रेक्षणीय स्थळं, तेथील नृत्य वगैरे गोष्टींची माहिती द्यायची आणि जर एखादी महिला तिथे फिरून आली असेल तर तिथे काढलेले फोटो सर्वांना तिने दाखवायचे.
अजूनही अनेक आकर्षक थीम असू शकतात. उदाहरणार्थ, रेट्रो लुक म्हणजे जुन्या काळातील नट्यांसारखे तयार होऊन येणे किंवा मग डिस्को लुक ज्यात तुम्ही कपाळाला सोनेरी दोरी बांधून जाऊ शकता किंवा मग येणाऱ्या सणांनुसार एखादी वेशभूषा. आता आपल्याकडे परदेशी सणदेखील साजरे केले जातात. जसं हॅलोविन, व्हॅलेंनटाईन डेच्या दरम्यान लाल रंगाचा डे्रसकोड, फुगे किंवा बदामाच्या आकाराची सजावट केली जाऊ शकते. तसेच हॅलोविन साजरा करत असताना प्रत्यकाने आपला चेहरा भितिदायक बनवायचा. किट्टीतील सर्व सदस्यांचे मत विचारून प्रत्येक वेळी नव्या संकल्पनेनुसार किट्टी पार्टी करा.
किट्टीच्या निमित्ताने शोधा नवनवी ठिकाणं
बऱ्याचदा किट्टीची वेळ दुपारची किंवा तिसऱ्या प्रहराची असते. सदस्यही अनेक असतात. त्यामुळे सगळ्याजणी मिळून प्रत्येक वेळी नव्या ठिकाणी किंवा रेस्टॉरण्टमध्ये जाऊ शकतात. अशारितीने आयुष्यात भेटीगाठीबरोबरच नव्या ठिकाणी फिरण्याचा आनंदही मिळेल.
नीताची किट्टी पार्टीसुद्धा आधुनिक विचारांनुसार रेस्टॉरन्टमध्ये किंवा मग शुद्ध शाकाहारी जेवण करण्यासाठी आंध्र भवनला केली जाते. किट्टी पार्टी जो सदस्य आयोजित करतो, त्याच्या इच्छेनुसार जागा व थीम निश्चित केली जाते.
मास्टरशेफ किंवा दिलदार यजमान
एखाद्या महिलेला चविष्ट पदार्थ बनवण्यात व नवनवीन पद्धतीने सजवून खिलवण्यात आनंद मिळतो, तर एखाद्याला आयते काही खायला मिळाले तर त्याला खूप आनंद होतो. नवी दिल्लीच्या शेफालीला स्वत:ला मास्टरशेफ म्हणवून घ्यायला आवडते आणि तिच्या मैत्रीणी आनंदाने तिला ही पदवी देतात.
शेफालीची वेळ असली की शेफाली घरीच किट्टी पार्टी आयोजित करते आणि तऱ्हेतऱ्हेचे खाद्यपदार्थ बनवून सर्वांचे मन जिंकून घेते. एकीकडे तिच्याच किट्टीमधली मानसी, जिला जेवण बनवायच्या नावानेही चिड येते.
‘‘पूर्ण दिवसभर घरात सगळ्यांसाठी एवढे जेवण बनवते की किट्टीत जेव्हा माझी वेळ येते तेव्हा मला बाहेर जाण्याचा वहाणा मिळतो,’’ असे मानसी म्हणते.
मानसी तिच्या सर्व मैत्रिणींना रेस्टॉरन्टमध्ये नेऊन आवडीचे जेवण जेवू घालते. ज्येष्ठ महिलांनाही हे सोयीस्कर वाटते म्हणून त्यांनाही रेस्टॉरन्टमध्ये जायला आवडते.
नव्या खेळांनी मनोरंजन
किट्टीमध्ये अंताक्षरी, तंबोला किंवा हाऊजीसारखे खेळ खेळून मन भरले असेल तर इतरही नवे खेळ खेळा. सर्व सदस्यांना फॅशनेबल कपडे घालून यायला सांगा आणि रॅम्पवॉक ठेवा किंवा मग कोणाकडे कॅरिओकेचे सामान असेल तर कॅरिओकेची मजा घ्या. मुलांचे खेळ जसे ल्यूडो, सापशिडी किंवा मग ऊनोमध्येही खूप मजा येते. खळखळून हसा आणि चार तासात ताजेतवाने होऊन जा.
तुमच्या किट्टीमधून साहित्याला द्या उत्तजेन
हल्ली वाचण्याची सवय सुटत चालली आहे. साहित्याला उत्तेजन मिळावे म्हणून किट्टीपार्टीमध्ये कविता वाचनाचा कार्यक्रम करू शकता. सर्व सदस्यांनी आवडती कविता लिहून किंवा पाठ करून यावी व सर्वांना ऐकवावी किंवा मग किट्टीतील सदस्यांना सांगा. आपल्या एखाद्या आवडत्या पुस्तकाची समीक्षा सर्वांना सांगावी. यातून तुमच्या लक्षात येईल की तुम्हा सर्वांमध्ये एक मनस्वी लेखिका लपलेली आहे आणि वाचनाची आवड असणाऱ्या वाचकसुद्धा आहेत. वाचनामुळे फक्त आपले ज्ञानच वाढते असे नाही तर आपण अधिक संवेदनशील बनतो. आपली विचार करण्याची क्षमता वाढते. पंरपरागत विचारप्रक्रियेतून बाहेर पडण्यासाठी सक्षम होतो. नवनव्या विषयांवर चर्चा केल्याने आपली मानसिक चौकट रूंदावते.
फक्त प्रतिस्पर्धकच नाही तर प्रेरणा व प्रोत्साहनसुद्धा
नेहमीच पाहिले जाते की महिलांना नेहमी प्रतिस्पर्धा किंवा एकमेकींचा द्वेष करणे यांच्याशी जोडले जाते. पण महिलासुद्धा एकमेकींना मदत करू इच्छितात. ज्या महिलांमध्ये आत्मविश्वासाची कमतरता असते, त्यांचं मानसिक बळ वाढवू इच्छितात. आपल्या मैत्रीणीचा मेकओव्हर करून तिला स्मार्ट बनवू इच्छितात. किट्टी पार्टीत महिला एकमेकींना प्रोत्साहित करतात. काही नवे करण्याची प्रेरणा देतात.
दिल्लीची सुमेधा सांगते की तिचे वजन वाढल्यानंतर त्यांच्याच किट्टीतील स्मिताने तिला सकाळ संध्याकाळ सोबत फिरावयास घेऊन जाण्यास सुरूवात केली. अशाचरितीने लिखाणाची आवड असणाऱ्या प्रियाला तिच्या कविता सादर करण्यासाठी एक हक्काचा मंच किट्टीद्वारेच मिळाला. जयपूरला राहणाऱ्या पद्माने तिच्या किट्टीतील मैत्रीणींबरोबर शरीर फिट ठेवण्यासाठी झुंबा शिकण्यास सुरूवात केली, जेणेकरून आपल्या आवडीचे कपडे घालता येतील.
