– प्राची भारद्वाज
मेकअप परफेक्ट करणे ही एक कला आहे. अशी कोणती स्त्री असेल जिला मेकअपमध्ये पारंगत व्हायचे नसेल? जसा योग्य मेकअपमुळे चेहरा आकर्षक करता येतो तसेच चुकीच्या मेकअपमुळे चांगला चेहराही खराब दिसू शकतो.
मेकअपच्या कलेत नैपुण्य मिळवणे सोपे नाही. कालानुरूप मेकअप करण्याच्या पद्धतींमध्ये खूपच बदल झालेत आणि लेटेस्ट मेकअपच्या ट्रेंडमध्ये नाव येते ते एअरब्रश मेकअपचे. आजकाल एअरब्रश मेकअप खूपच हिट आहे. चला, माहिती करून घेऊया एअरब्रश मेकअपची.
काय आहे एअरब्रश मेकअप
आतापर्यंत सौंदर्य विशेषज्ञांच्या बोटांद्वारेच मेकअपची जादू पाहायला मिळायची. त्यांची साथ द्यायचे स्पंज आणि विविध प्रकारचे ब्रश. मात्र आता एअरब्रश मेकअप एक युनिक पद्धत आहे, ज्याद्वारे मेकअप चेहऱ्याच्या त्वचेवर स्प्रे केला जातो. याचा प्रयोग जास्त करून नववधू, मॉडेल्स किंवा अभिनेत्रींवर केला जातो. पारंपरिक मेकअपच्या विरुद्ध असलेल्या एअरब्रश मेकअपद्वारे नॅचरल लुक कायम ठेवणे सोपे असते. हे त्वचेशी एकरूप होऊन एकसारख्या त्वचेची अनुभूती देते.
कसा करतात
एअरब्रश मेकअपसाठी तुम्हाला योग्य प्रकारचे टूल्स आणि सोबतच खूप प्रॅक्टिसही गरजेची असते.
एअरब्रश मेकअपचे टूल्स किंवा किट ऑनलाइनही मिळते तेही वॉरंटीसह. टूल्समध्ये एक छोटा कंप्रेसर, एक एअरब्रश गन, स्वच्छ करण्यासाठी ब्रश, हौज पाइप आणि फाउंडेशन कलर व हायलायटरच्या बॉटल्सही येतात.
तुम्हाला एअरब्रश करायला येत नसले तरी मेकअपची बेसिक समज गरजेची आहे. त्यानंतर किटसोबतची माहिती पुस्तिका वाचून किंवा ऑनलाइन व्हिडिओ पाहून शिकता येते.
मेकअपची पद्धत
एअरब्रश मेकअपसाठी हात सरावाचे लागतात. एअरब्रश गन चेहऱ्यापासून किती दूर ठेवायची, किती प्रेशर गरजेचा आहे, हे सर्व सराव आणि मेकअप कसा हवा यावर अवलंबून असते. मेकअपचा कोणता इफेक्ट द्यायचा आहे, संपूर्ण चेहऱ्यावर द्यायचा आहे की काही भागच हायलाइट करायचा आहे, न्यूड लुक हवा की कंटूरिंग, हेवी मेकअप हवाय की लाइट, या सर्व गोष्टींवर लक्ष देणे गरजेचे आहे. मेकअप करताना लुकनुसार एअर प्रेशर संतुलित ठेवणे आवश्यक आहे.
एअरब्रश मेकअप तुम्ही स्वत:हून शिकू शकता. गरज आहे ती फक्त सराव करत राहण्याची. एअरब्रश मेकअपद्वारे चेहऱ्याला चमकदार लुक मिळतो. पण सोबतच हेदेखील लक्षात ठेवा की ज्यांच्या चेहऱ्यावर लव आहे त्यांनी ती आधी साफ करून घ्यावी जेणेकरून एअरब्रश मेकअप केल्यानंतर चेहऱ्यावरील केस फोटोत चमकणार नाहीत.
नववधूच्या मेकअपमध्ये याचे तोटे
नववधूच्या मेकअपसाठी आजकाल एअरब्रश मेकअपची बरीच चलती आहे. चला, जाणून घेऊया याचे तोटे काय आहेत :
* वॉटरप्रुफ असल्यामुळे हा त्या नववधूंसाठी सूट होत नाही, ज्यांची त्वचा गरजेपेक्षा जास्त ड्राय असते.
* शेड्स आणि ब्रँड्सचे यात खूपच कमी पर्याय असतात.
* बजेटमध्येच मेकअप करू इच्छिणाऱ्या नववधूंसाठी हा महाग ठरू शकतो.
एअरब्रश मेकअपचे फायदे
* एअरब्रश मेकअपमुळे फाईन लुक मिळवणे शक्य आहे. हात, स्पंज आणि ब्रशने केलेल्या मेकअपमध्ये त्वचेवरील छिद्रे आणि सुरकुत्या दिसण्याची शक्यता अधिक असतात. एअरब्रश मेकअप एकसारख्या स्किन टोनची अनुभूती देतो.
* एअरब्रश मेकअपमुळे डोळे, ओठ आणि चीक बोन्सना उभारी देणे सोपे होते. सोबतच ट्रेडिशनल मेकअपप्रमाणेच यात कंटूरिंग करणेही शक्य आहे.
* एअरब्रश मेकअपमुळे त्वचा एकसारखी, मुलायम आणि नॅचरल दिसते.
* एअरब्रश मेकअप बराच वेळ टिकून राहतो. भारतीय हवामान आणि तासनतास चालणाऱ्या आपल्या सणसमारंभांमध्ये दीर्घकाळ टिकणारा मेकअपच आपल्या आवडीचा ठरतो. खासकरून नववधूसाठी, जिला लग्नाच्या प्रदीर्घ विधि मेकअपमध्ये राहूनच करायच्या असतात.
* वॉटरप्रूफ मेकअपमध्येही एअरब्रश मेकअप उत्तम असल्याचे सिद्ध होते.
* हायजीन आणि स्वच्छतेच्या दृष्टीनेही एअरब्रश मेकअप उत्तम आहे, कारण यात हातांऐवजी टूल्सचा वापर केला जातो.
