* ब्लॉसम कोचर, सौंदर्य तज्ज्ञ
काळे डाग किंवा त्वचेचा असमान रंग, ही एक सामान्य सौंदर्य समस्या आहे जी अनेक लोकांसाठी त्रासदायक ठरते. ओठांवर, गुडघ्यांवर, कोपरांवर, मानेवर, काखेत आणि अगदी नितंबांवर काळे डाग किंवा असमान त्वचेचा रंग असण्याची अनेक कारणे असू शकतात. यामध्ये सूर्यप्रकाश, प्रदूषण, त्वचेची योग्य काळजी न घेण्याची दिनचर्या आणि हार्मोनल बदल यांचा समावेश असतो. तसे तर ही समस्या दूर करणे फारसे अवघड नाही.
ओठांचा काळपटपणा
ओठांचा काळपटपणा, ही एक सामान्य समस्या आहे, विशेषत: त्या लोकांसाठी जे धूम्रपान करतात किंवा जास्त उन्हात राहातात. याशिवाय, ओठांना नियमितपणे मॉइश्चरायझ न केल्यानेही ओठ कोरडे आणि काळे पडू शकतात.
उपाय
लिंबू आणि मधाचे मिश्रण : लिंबामध्ये असलेले नैसर्गिक ब्लीचिंग गुणधर्म ओठांचा काळेपणा दूर करण्यास मदत करतात. लिंबाच्या रसात थोडे मध मिसळून ओठांवर लावा आणि १०-१५ मिनिटांनी धुवा. याचा वापर दररोज केल्याने ओठांची त्वचा हळूहळू उजळ होईल.
गुलाबजल आणि ग्लिसरीन : गुलाबजल ओठांना ताजेपणा आणि आर्द्रता मिळवून देते तर ग्लिसरीन त्यांना ओलावा मिळवून देते. रात्री झोपण्यापूर्वी गुलाबजल आणि ग्लिसरीन एकत्र मिसळून ओठांवर लावा.
साखरेचे स्क्रब : साखरेचे छोटे कण मृत त्वचा काढून टाकण्यास मदत करतात. साखर आणि खोबरेल तेलाचा स्क्रब बनवा आणि ओठांवर हलक्या हातांनी मालिश करा. यामुळे ओठ स्वच्छ, मऊ आणि गुलाबी दिसतील.
कोपर आणि गुडघ्यांवरील काळपटपणा
कोपर आणि गुडघे काळवंडणे, हे बहुतेकदा कडक त्वचेमुळे होते. या भागांवर नेहमीच घर्षण होते, ज्यामुळे तेथील त्वचा जाड आणि काळी पडते.
उपाय
लिंबू आणि बेकिंग सोडा : कोपर आणि गुडघ्यांवरील काळे डाग सौम्य करण्यासाठी लिंबू आणि बेकिंग सोडा यांचे मिश्रण प्रभावी ठरते. अर्ध्या लिंबावर बेकिंग सोडा पसरवा आणि प्रभावित भागांवर चोळा. ते मृत त्वचेच्या पेशी काढून टाकून काळे डाग सौम्य करते.
कोरफड जेल : कोरफड जेल केवळ त्वचेचा रंग सुधारत नाही तर त्याला ओलावा आणि पोषणदेखील मिळवून देते. कोरफड जेल थेट गुडघ्यावर आणि कोपरांवर लावा आणि २० मिनिटांनी धुवा. ते दररोज वापरा.
मानेचा काळपटपणा
बहुतेकदा अशुद्धता आणि धुळीमुळे मान काळवंडते. त्वचा स्वच्छ न करणे किंवा नियमित काळजी न घेतल्याने देखील मानेचा रंग असमान होऊ शकतो.
उपाय
दूध आणि बेसन : दूध हे एक नैसर्गिक क्लिंजर आहे तर बेसन त्वचेला खोलवर स्वच्छ करते. दूध आणि बेसन मिसळून पेस्ट बनवा आणि ती मानेवर लावा.
लिंबू आणि गुलाबजल : लिंबाचा रस आणि गुलाबजल एकत्र मिसळून दररोज रात्री झोपण्यापूर्वी मानेवर लावा. यामुळे त्वचेचा रंग सुधारण्यास मदत होते आणि काळे डाग दूर होतात.
काख काळी पडणे
अतिरिक्त घाम येणे, काखेतील केस काढणे आणि कडक डिओडोरंट्सचा वापर यासारख्या अनेक कारणांमुळे अंडरआर्म्स म्हणजे काख काळी पडू शकते.
उपाय
बटाट्याचा रस : बटाटा हा एक नैसर्गिक ब्लीचिंग एजंट आहे. बटाट्याचा रस काखेत लावा आणि १५-२० मिनिटांनी धुवा. यामुळे काळेपणा दूर होण्यास मदत होते.
अॅपल सायडर व्हिनेगर : अॅपल सायडर व्हिनेगरमध्ये आम्लयुक्त गुणधर्म असतात, जे त्वचा स्वच्छ करण्यास आणि मृत पेशी काढून टाकण्यास मदत करतात. ते पाण्यात मिसळून काखेतील काळपट भागावर लावा आणि काही वेळाने धुवा.
टी ट्री ऑईल आणि पाणी : टी ट्री ऑईल म्हणजे चहाच्या झाडाच्या तेलात अँटीसेप्टिक आणि जीवजंतूविरोधक गुणधर्म असतात, जे काखेच्या आतील भागांना ताजेतवाने करतात तसेच त्वचेचा रंग सुधारतात. पाण्यात चहाच्या झाडाच्या तेलाचे काही थेंब मिसळा आणि काखेच्या आतील भागांवर लावा.
