* कॉस्मोटोलॉजिस्ट अधिरा जे. नायर
आपल्या खास दिवशी म्हणजे लग्नाच्या दिवशी आपण खूप सुंदर दिसावे असे प्रत्येक वधूचे स्वप्न असते जेणेकरून प्रत्येकाची नजर तिच्यावरच खिळून राहील. म्हणूनच प्रत्येक वधूला त्या खास दिवशी सुंदर दिसण्यासाठी तिच्या मेकअपची चिंता असते, कारण हा दिवस आयुष्यात एकदाच येतो. चांगली त्वचा आणि इवन बेसशिवाय कोणताही मेकअप लुक चांगला दिसू शकत नाही, पण याचा अर्थ असा अजिबात नाही की, तुमच्या चेहऱ्यावर मुरुम किंवा इतर डाग असतील तर तुम्ही तुमच्या खास दिवशी उठून दिसणार नाही. तुम्हाला लग्नाच्या दिवशी उठून दिसायचे असेल तर सर्वप्रथम तुमच्या त्वचेची काळजी घ्या, त्यानंतर मेकअपकडे लक्ष द्या.
लग्न सोहळयाला जाताना आणि त्यासाठीची तयारी करताना तुम्ही स्वत:ला तणावापासून दूर ठेवा. सोबतच पुरेशी झोप घ्या. तुमच्याकडे सौंदर्य तज्ज्ञांना भेटायला वेळ नसेल किंवा तुम्हाला ते परवडत नसेल तर तुम्ही लग्नाच्या काही दिवस आधी चुकूनही तुमच्या त्वचेवर कोणताही प्रयोग करू नका.
येथे प्रत्येक वधूसाठी उपयोगी पडतील असे काही पर्याय सुचवले आहेत. ते खालीलप्रमाणे :
प्रोफेशनल ट्रीटमेंट
हाय फ्रिक्वन्सी मशीन : तुम्हाला मुरूम किंवा पुरळ, पुटकुळयांची समस्या असेल तर हाय फ्रिक्वन्सी मशीन तुमच्यासाठी सर्वोत्तम आहे, कारण ती त्वचेला संसर्गविरहित ठेवते, पुळया दूर करून त्वचा निरोगी ठेवण्यासह त्वचेचे तापमान वाढवण्यासाठी आवश्यक असलेली उष्णता मिळवून देतो.
हाय फ्रिक्वन्सी मशीनचे फायदे पुढीलप्रमाणे :
* मुरूम किंवा पुळया कमी करून थंडावा मिळवून देते.
* त्वचेवरील मोठया रंध्रांना छोटे करते.
* त्वचेतील नैसर्गिक तेलाचे प्रमाण कमी करण्यास उपयुक्त ठरते.
* लिम्फेटिक ड्रेनेज म्हणजे लसिका संस्थेच्या कार्यास प्रोत्साहन देते.
* डोळयांची सूज आणि वर्तुळे कमी करते.
फेस वॅक्यूम
हे उपचार त्या महिलांसाठी सर्वोत्तम आहेत ज्या त्वचेला खराब होण्यापासून वाचवू इच्छितात. ही मशीन तुमच्यातील रक्ताभिसरण वाढवून तुम्हाला नितळ, चमकदार त्वचा मिळवून देण्याचे काम करते. त्वचा निरोगी बनवून लसिका आणि रक्ताभिसरण दोन्ही वाढवण्याचे काम करते.
गॅल्वेनिक
ही त्वचेच्या खोलवर जाऊन तिला स्वच्छ करणारी उपचार पद्धती आहे, जी फोलिकलमध्ये सिबम आणि केराटिनला मुलायम बनवते. तेलकट त्वचा असणाऱ्या महिलांसाठी ही उत्तम उपचार पद्धती आहे. याचे फायदे पुढील प्रमाणे :
* मुरूम तयार करणाऱ्या तेलाला नष्ट करते.
* त्वचेची खोलवर स्वच्छता करते.
* रुक्ष त्वचेला टवटवीत बनवते.
* रक्ताभिसरण वाढवण्यास मदत करते.
केमिकल पीलिंग
या उपचार पद्धतीत त्वचेला एक्सफॉलिएट करण्यासाठी अॅसिडचा वापर केला जातो. ते त्वचेच्या नुकसानग्रस्त पेशींना काढून टाकते. यामुळे त्वचेवरील डाग, पिगमेंटेशनची समस्या कमी होऊन त्वचा उजळते. याचे फायदे पुढीलप्रमाणे :
* चेहऱ्यावरील डाग कमी करण्यासाठी उपयुक्त ठरते.
* यूव्ही म्हणजे अतिनील किरणांमुळे होणाऱ्या नुकसानापासून त्वचेचे रक्षण होते.
* त्वचेचा पोत सुधारतो.
मायक्रोडर्माबेशन
हीदेखील केमिकल पीलप्रमाणेच करण्यात येणारी एक्सफॉलिएट प्रक्रिया आहे. फरक एवढाच की, यात अॅसिड किंवा रसायने वापरली जात नाहीत. यात एका मशीनचा वापर केला जातो.
घरगुती उपचार पद्धती
* योग्य फेसवॉशची निवड करा.
* केमिकल एक्सफॉलिएटचा वापर करा.
* तुम्ही मेकअप केला असेल तर तोंड दोनदा स्वच्छ करा.
* तुमच्या त्वचेला सुयोग्य ठरत असेल तर रेटिनॉलचा अवश्य वापर करा.
* त्वचेच्या प्रकारानुसार आठवडयातून १-२ वेळा मास्क नक्की लावा.
