* पारुल भटनागर
फुलांचे सौंदर्य आणि सुगंधामुळे ताजेतवाने वाटते. जेव्हा आपण त्यांना स्पर्श करतो, त्यांचा सुगंध अनुभवतो तेव्हा आपल्याला प्रसन्न आणि खूप छान वाटते. त्यामुळे जरा विचार करा की, या फुलांचा सुगंध आणि गुणधर्मांचा वापर जर आपण आपल्या त्वचेच्या दैनंदिन सुरक्षेसाठी केला तर आपली त्वचाही या फुलांसारखी फुलेलं, शिवाय नेहमीच असा फुललेला चेहरा बाह्य सौंदर्य तर वाढवतोच, सोबतच आत्मविश्वासही जागवतो.
चला तर मग जाणून घेऊया त्या उत्पादनांविषयी, ज्यामध्ये फुलांचे गुणधर्म असतात आणि ते आपल्या त्वचेसाठी कसे फायदेशीर ठरतात :
त्वचेसाठी जादू
गुलाबाची पाने असोत किंवा तेल, दोन्ही त्वचेसाठी जादूसारखे काम करतात, कारण त्यात जीवनसत्त्वे, खनिजे आणि अँटिऑक्सिडंट असते. गुलाबामध्ये असलेले अँटिऑक्सिडंट्स त्वचेला फ्री रेडिकल्सपासून वाचवते आणि नेहमी चमकदार ठेवण्याचे काम करते.
हे सर्व प्रकारच्या त्वचेसाठी उपयुक्त ठरते. रुक्ष किंवा कोरडया त्वचेत ओलावा निर्माण करते, कारण यात मॉइश्चरायझिंगचे गुणधर्म असतात, जे त्वचेची आर्द्रता टिकवून ठेवण्याचे आणि त्वचेला पुरेसा ओलावा मिळवून देण्याचे काम करतात. यामुळे त्वचेची जळजळ होत नाही. यातील तुरट गुणधर्म त्वचेला मुरुम, लालसरपणा आणि जळजळ होण्यापासून वाचवण्याचे काम करतात, गुलाब त्वचेची नैसर्गिक पीएच पातळी संतुलित ठेवून त्वचेवर अतिरिक्त तेल तयार होण्यास प्रतिबंध करते. काय तर मग, आहे ना गुलाब त्वचेसाठी जादूसारखे?
यासाठी तुम्ही बाजारात उपलब्ध रोझ सिरम, रोझ टोनर, रोझ जेल, रोझ पॅक, रोझ वॉटर वापरू शकता. लक्षात ठेवा की तुम्ही जे काही घ्याल, त्यात गुलाबाची मात्रा भरपूर प्रमाणात असायला हवी, तरच तुम्हाला, तुमच्या त्वचेला त्याचा फायदा होऊ शकेल.
सूर्यफुलामुळे मिळते नैसर्गिक चमक
यात अनेक पोषक घटक असतात. त्यामुळेच नितळ आणि डागरहित त्वचेसाठी एक नैसर्गिक सौंदर्य प्रसाधन म्हणून पूर्वापारपासून सुर्यफुलाचा वापर केला जात आहे. ते त्वचेचा ओलावा मिळवून देतो आणि त्वचेला मुलायम बनवते. यात अ, क, ड, ई यासारखी आवश्यक पोषक द्रव्ये असतात, जी त्वचेचे फ्री रेडिकल्सपासून संरक्षण करतात, ज्यामुळे त्वचेवर सुरकुत्या पडत नाहीत.
म्हणूनच तुम्ही सूर्यफुलाचा वापर तुमच्या त्वचेचे सौंदर्य वाढवण्यासाठी करू इच्छित असाल तर त्यासाठी सूर्यफुलाचे तेल, क्रीम, सूर्यफुलाचे हायड्रेटेड लोशन, केसांसाठीचे तेल इत्यादींचा वापर करू शकता. याची किंमत ब्रँड आणि उत्पादनाच्या दर्जानुसार असते. हे थोडेसे जरी वापरले तरी त्वचेवर त्याचा खूपच सुंदर परिणाम दिसू लागतो.
गोंडा ठेवेल सुरकुत्यांपासून दूर
गोंडयात अँटीफंगल, अँटीबॅक्टेरियल आणि अँटी इन्फ्लेमेंटरी घटक असल्यामुळे तो अॅक्ने, त्वचेची जळजळ आणि फंगल इन्फेक्शनपासून त्वचेचे रक्षण करतो. सोबतच फ्री रेडिकल्सपासून दूर ठेवून त्वचेवर सुरकुत्या येण्यापासून वाचवतो. पूर्वापारपासून याचा वापर सौंदर्य आणि त्वचेच्या सुरक्षेसाठी केला जात आहे.
गोंडयाची काही फुले तुम्ही काही वेळ गरम पाण्यात भिजवून ठेवली आणि त्यानंतर या पाण्याचा वापर केल्यास हे पाणी त्वचेसाठी सर्वोत्तम टोनर ठरते. तुम्हाला पुळया आणि सुरकुत्यांपासून त्वचेला दूर ठेवायचे असेल तर गोंडयाचा वापर करून तयार केलेली सौंदर्य प्रसाधने खास तुमच्यासाठीच असतात.
यासाठी तुम्ही गोंडयाचे फेस क्रीम, बटर बॉडी लोशन वापरू शकता. इतकेच नव्हे तर गोंडयापासून बनवलेले अँटीसेफ्टिक क्रीमही बाजारात उपलब्ध असते. ते त्वचेला ओलावा मिळवून देते आणि मुलायम बनवते. ते बाजारात सहजपणे मिळते किंवा तुम्ही ऑनलाईनही खरेदी करू शकता.
कमळाचे नैसर्गिक मॉइश्चरायझर
ब्लू लोटस अर्थात कमळाचे निळे फूल हे नैसर्गिक मॉइश्चरायझरचे काम करते. यामुळे कोरडया, रुक्ष आणि सालपटे निघालेल्या त्वचेला खूपच आराम मिळतो. याशिवाय ते त्वचेतील तेलाचा समतोल राखून अॅक्ने दूर ठेवण्यासही मदत करते.
यात अँटीऑक्सिडंट, पॉलिफिनोल आणि भरपूर जीवनसत्त्वे असल्यामुळे ते फ्री रेडिकल्सपासून वाचवते. सुरकुत्यांपासून त्वचेचे रक्षण करते. ‘कोरियन जर्नल ऑफ केमिकल इंजिनीअरिंग’मध्ये प्रकाशित झालेल्या संशोधनानुसार, कमळाचे फूल आणि पानांमध्ये त्वचेची लवचिकता वाढवण्याची क्षमता असते. यामुळे त्वचेच्या पेशी निरोगी राहतात आणि त्यामुळेच त्वचेला सुरकुत्यांपासून दूर ठेवता येते. साहजिकच त्वचा खुलते.
यातील विशेष गुणधर्म असा की, हे त्वचेची नैसर्गिक आर्द्रता नष्ट न करता सीबम म्हणजे त्वचेतील नैसर्गिक तेल नियंत्रित करण्याचे काम करते, ज्यामुळे लहान छिद्र्रांसह मुरुमांची समस्याही कमी होते.
तुम्ही कमळाचा टोनर, सनस्क्रीन, फेस वॉश, क्रीम, कमळाचे ब्राइटनिंग जेल क्रीम, एसपीएफ असलेले बॉडी लोशन, मॉइश्चरायझर लावू शकता. हे पर्समध्ये सहज ठेवता येते, शिवाय त्वचाविज्ञान शास्त्रज्ञांनी याची चाचणी केलेली असल्यामुळे त्वचेसाठी सुरक्षित असते.
जास्वंदीमुळे मिळते चिरतरुण सौंदर्य
जर तुम्ही त्वचेसाठी हिबिस्कस अर्थात जास्वंदीच्या फुलांचा वापर केल्यास तुम्हाला कमी वेळेत चिरतरुण सौंदर्य मिळू शकते. यात अल्फा हायड्रॉक्सी अॅसिडचा चांगला स्रोत असल्याने, ते त्वचेला एक्सफोलिएट करते आणि उजळ बनवते. निरोगी त्वचेच्या पेशींना चालना देण्यासोबत, ते हायपरपिग्मेंटेशनही कमी करते, ज्यामुळे त्वचेचा पोत सुधारतो आणि नितळ त्वचा मिळते. जास्वंद त्वचेवरील जखमाही लवकर भरून काढण्याचे काम करते.
जर तुम्हाला चिरतरुण सौंदर्य हवे असेल आणि त्वचेच्या समस्यांपासून सुटका मिळवायची असेल तर तुम्ही जास्वंदीची फेस पावडर, क्रीम, टोनर वापरू शकता. ती तुम्ही घरच्या घरी बनवू शकता किंवा बाहेरूनही खरेदी करू शकता. तुम्ही ही पावडर चहासारखी पिऊन याचे फायदे मिळवू शकता.
चमेलीमुळे होतो कोरडेपणा दूर
त्वचा लवचिक बनवण्यासोबतच त्वचेची आर्द्र्रता टिकवून ठेवण्याची क्षमता चमेलीत असते. यामुळे त्वचेचा कोरडेपणा हळूहळू दूर होतो. चमेली त्वचेवरील बॅक्टेरियाच्या वाढीस प्रतिबंध करते. जखमा बऱ्या करून त्वचेची प्रतिकारशक्ती वाढवण्यास मदत करते. काळे डाग कमी करून त्वचेला एकसमान चमक मिळवून देते आणि त्वचेला त्रास न होऊ देता तिचा कोरडेपणा दूर करते.
लॅव्हेंडर करते त्वचेला डिटॉक्स
लॅव्हेंडर आरामदायी आणि थंड गुणधर्मांसाठी ओळखली जाते. म्हणूनच सहसा स्पा उपचार आणि सुगंधित थेरपीमध्ये वापरले जाते. इतकेच नाही तर यामुळे पेशींच्या निर्मितीला चालना मिळते. त्वचेवरील डाग, सुरकुत्या दूर होण्यास मदत होते. जर तुमची त्वचा खूप कोरडी असेल तर तुम्ही तुमच्या चेहऱ्यावर लॅव्हेंडर बॉडी बटर लावू शकता.
लॅव्हेंडरमुळे त्वचेच्या आर्द्रतेचा समतोल राखला जातो. यामुळे त्वचा खूप तेलकट किंवा खूप कोरडी होत नाही. म्हणजेच दोन्हीमध्ये समतोल राखण्यास मदत होते. यामधील दाहविरोधी गुणधर्म अतिनील किरणांमुळे किंवा बॅक्टेरियांच्या संसर्गामुळे त्वचेवर येणारा लालसरपणा लवकर बरा करण्याचे काम करतात. लॅव्हेंडर थेरपीचे बाथ प्रोडक्ट बाजारात उपलब्ध आहेत. तुम्ही त्याचा नियमित वापर केल्यास ते त्वचा डिटॉक्स करण्याचे काम करतात.
यासाठी तुम्ही तुमच्या ब्युटी किटमध्ये लॅव्हेंडर बॉडी लोशन, क्रीम, लॅव्हेंडर तेलाचा समावेश करू शकता. जरी ही उत्पादने थोडी महाग असली तरी त्यांचा परिणाम इतका आश्चर्यकारक असतो की, तुम्ही पुन्हा विचार न करता त्यांच्यावर पैसे खर्च करण्यास नक्कीच तयार व्हाल.
कॅमोमाइन सुधारते त्वचेचा टोन
अँटीऑक्सिडंट्सने समृद्ध असल्याने, कॅमोमाइन त्वचेचे फ्री रेडिकल्सपासून संरक्षण करते. हे त्वचेचा रंग उजळवण्याचे आणि त्वचेला एकसमान चमक देण्याचे काम करते. यामध्ये दाहविरोधी आणि जंतुनाशक गुणधर्म असल्याने, ते मुरुमांवर नियंत्रण ठेवण्याचे तसेच त्यांचे डाग कमी करून ते वेळीच नष्ट करण्याचे काम करते.
हे पेशी आणि टिश्यूज म्हणजे उतींच्या पुनर्बांधणीसाठी, छिद्र्रांना बंद करण्यासाठी आणि वृद्धत्वाची प्रक्रिया मंदावण्यासाठी मदत करते. तुम्हाला चिरतरुण ठेवते.
यासाठी तुम्ही कॅमोमाइन फेस वॉश, कॅमोमाइन व्हिटॅमिन ई मॉइश्चरायझर, तेल, फेस वॉश, डे आणि नाईट क्रीम वापरू शकता. बाजारात विविध ब्रँडस कॅमोमाइन तयार करत आहेत.
