* नसीम अंसारी कोचर
आजकाल विविध आजारांचे प्रमाण वाढत आहे. ज्यांचे नाव यापूर्वी कधी ऐकले नव्हते असे आजार होत आहेत. कोरोना महामारीमुळे लोकांच्या शरीरात इतर अनेक आजार वाढले आहेत. काळी बुरशी, पांढरी बुरशी, रक्त गोठणे यासारख्या समस्या समोर येत असून, त्यावरील उपचारासाठी लाखो रुपये खर्च येतो. वाढत्या महागाईमुळे सर्वसामान्यांना रुग्णालयाचा खर्च करणे जवळपास अशक्य झाले आहे.
आरोग्य क्षेत्रात तंत्रज्ञान वाढत असल्याने आजारांवर होणारा खर्चही वाढत आहे. पूर्वी डॉक्टर तपासणी करून, रुग्णाची नाडी तपासून किंवा किरकोळ चाचण्या करून उपचार करायचे, पण आता ताप आला तरी सर्व प्रकारच्या रक्त आणि लघवीच्या चाचण्या लिहून देतात. गंभीर आजार झाल्यास रुग्ण आणि त्याच्या कुटुंबीयांना चाचण्या, क्ष-किरण, एमआरआय, थेरपी इत्यादी महागडया उपचारांचा सामना करावा लागतो.
एखादा मोठा आजार माणसाची सर्व बचत खाऊन टाकतो. अशा परिस्थितीत फॅमिली मेडिक्लेम असणे अत्यंत गरजेचे आहे. मेडिक्लेम पॉलिसी अर्थात वैद्यकीय विमा कठीण काळात तणावमुक्त आणि आर्थिकदृष्टया सुरक्षित राहण्यास मदत करतो. ही एक प्रक्रिया आहे ज्यामध्ये विमा कंपनीच्या जाळयाअंतर्गत येणाऱ्या रुग्णालयांमध्ये विमाधारकावर उपचार केले जातात. या अंतर्गत, विमा कंपनी दाव्याचा काही भाग किंवा संपूर्ण रक्कम रुग्णालयाला देते. त्यामुळे रुग्ण तसेच त्याच्या कुटुंबावर अचानक आर्थिक भार पडत नाही.
सुरक्षित पर्याय
अनपेक्षित वैद्यकीय गरज उद्भवल्यास, त्यावर होणारा प्रचंड खर्च भागवण्यासाठी मेडिक्लेम हा आजचा सर्वात सुरक्षित पर्याय आहे. ज्या व्यक्तीचा मेडिक्लेम असेल त्याला त्याच्या खिशातून पैसे भरण्याची आवश्यकता नसते. जर त्याला कोणत्याही आजारामुळे किंवा अपघातामुळे रुग्णालयात दाखल केले असेल तर सर्व खर्च मेडिक्लेम कंपनी उचलते.
तुमची मेडिक्लेम पॉलिसी अपघात, गंभीर आजार किंवा शस्त्रक्रिया इत्यादी बाबतीत रुग्णालयाचा खर्च उचलते, सोबतच रुग्णालयातून घरी पाठवल्यानंतर वेळोवेळी होणाऱ्या औषधांचा आणि चाचण्यांचा खर्चही करते. सर्व परिस्थिती मेडिक्लेम पॉलिसीमध्ये समाविष्ट असते. आज, वैद्यकीय आपत्कालीन परिस्थितीत मेडिक्लेम सेवा वरदान आहे.
मेडिक्लेमचे फायदे
मेडिक्लेम पॉलिसी ही आरोग्य विमा योजना आहे, ज्याचे अनेक फायदे आहेत :
* ही सोयीस्कर कॅशलेस हॉस्पिटलायझेशन प्रदान करते.
* तुमच्या वैद्यकीय आणीबाणीच्या काळात मोठी आर्थिक मदत करते.
* ती तुम्हाला आर्थिक ओझ्यात बुडण्यापासून वाचवते.
* विविध कंपन्यांमध्ये मेडिक्लेम पॉलिसी ऑनलाइन खरेदी करण्याची सुविधा आहे, ज्यामुळे वेळ आणि ऊर्जा वाचते.
* आयकर कायदा १९६१ अंतर्गत ती कर सवलतही मिळवून देते.
* ज्येष्ठ नागरिक मेडिक्लेम पॉलिसी अंतर्गत, ज्येष्ठांना अतिरिक्त फायदे दिले जातात. रुग्णालयात दाखल होण्यापूर्वी आणि नंतरचा वैद्यकीय खर्च काही अटींच्या अधीन राहून मेडिक्लेम पॉलिसींद्वारे केला जातो.
* नियमित वॉर्ड किंवा इंटेन्सिव्ह केअर युनिट (आयसीयु)साठी जो काही खर्च येतो तो मेडिक्लेम पॉलिसीद्वारे कव्हर केले जातो. भारतातील विविध आरोग्य विमा कंपन्या वैद्यकीय खर्चाच्या बाबतीत विविध प्रकारच्या पॉलिसी देतात. यामध्ये मोठया संख्येने लोक वैयक्तिक मेडिक्लेम पॉलिसी, फॅमिली फ्लोटर मेडिक्लेम पॉलिसी, ज्येष्ठ नागरिक मेडिक्लेम पॉलिसी, गंभीर आजार मेडिक्लेम पॉलिसी, ओव्हरसीज मेडिक्लेम पॉलिसी, लो कास्ट मेडिक्लेम पॉलिसी आणि ग्रुप मेडिक्लेम पॉलिसी काढतात.
कौटुंबिक आरोग्य योजना
कौटुंबिक आरोग्य योजना सर्वात चांगली आहे. उदाहरणार्थ, जर कुटुंबात ५ सदस्य असतील आणि प्रत्येक व्यक्तीच्या नावे प्रत्येकी १ लाख रुपयांचा स्वतंत्र विमा असेल तर कुटुंबातील कोणताही एक सदस्य विमा कंपनीकडून त्याच्यासाठी १ लाख रुपयांपेक्षा जास्त रकमेची मदत मिळवू शकत नाही. पाचही व्यक्तींसाठी हा विमा स्वतंत्र पॉलिसीनुसार काम करतो, पण तेच जर ५ लाख रुपयांची कौटुंबिक आरोग्य योजना म्हणून पॉलिसी घेतल्यास कोणताही सदस्य ५ लाख रुपयांपर्यंतची मदत मिळवू शकतो.
त्याचप्रमाणे, गंभीर आजार जसे की, कर्करोग, मूत्रपिंड निकामी होणे, हृदयविकाराचा झटका, शस्त्रक्रिया, अर्धांगवायू, स्ट्रोक, अवयव प्रत्यारोपण, बायपास शस्त्रक्त्रिया किंवा इतर अशा गंभीर आजारांसाठी मेडिक्लेम पॉलिसी खूप चांगले कव्हर मिळवून देते.
ज्येष्ठ नागरिक मेडिक्लेम पॉलिसी
ज्येष्ठ नागरिक मेडिक्लेम पॉलिसी वयाची ६० वर्षे ओलांडलेल्या ज्येष्ठ नागरिकांचा रुग्णालयाचा खर्च कव्हर करण्यासाठी तयार केली आहे. ज्येष्ठ नागरिक आरोग्य विमा पॉलिसी ज्येष्ठ नागरिकांच्या आरोग्यविषयक गरजा पूर्ण करण्यासोबतच अनेक गोष्टींची काळजी घेते.
याचप्रमाणे ग्रुप मेडिक्लेम हा भारतातील बहुतांश उद्योगांच्या कर्मचाऱ्यांसाठी काढला जातो. मोठ्या क्लब किंवा संस्थांच्या सदस्यांसाठीही ग्रुप मेडिकल क्लेम केले जातात. हे कॉर्पोरेट जगताचे धोरण आहे. यामध्ये कर्मचाऱ्यांच्या पगारातून काही टक्के रक्कम प्रीमियम पेमेंट म्हणून कापली जाते.
मेडिक्लेम नक्की काढा
मेडिक्लेममुळे तुम्हाला कठीण काळात तणावमुक्त आणि आर्थिकदृष्ट्या सुरक्षित राहण्यास मदत होते. आता लहानसहान आजारांवरही लाखोंचा खर्च होत आहे. आरोग्य विमा तुमच्या खिशावरचा भार कमी करण्यास मदत करतो. सतत वाढत असलेल्या वैद्यकीय खर्चाच्या या युगात, शक्य तितक्या लवकर मेडिक्लेम पॉलिसी घेणे शहाणपणाचे आहे.
केंद्रिय आरोग्य विभागाच्या आकडेवारीवरून असे दिसून येते की, वैद्यकीय आपत्कालीन परिस्थितीत ८० टक्के प्रकरणे आर्थिक अडचणींमुळे बिघडतात. अपघात झाल्यास तुम्हाला उपचारावर पैसे तर खर्च करावे लागतातच, पण तुमची कमाईची क्षमताही कमी होते. त्यामुळे अपघातग्रस्त व्यक्तीला दुहेरी धक्का बसतो.
जर तुमची मेडिक्लेम पॉलिसी असेल तर अशावेळी तुमची हिंमत खचणार नाही आणि तुम्हाला चांगले उपचारही मिळतील. आरोग्य विम्यासाठी तुम्ही ठराविक अंतराने थोडया प्रमाणात प्रीमियम भरून तुमच्यासाठी वैद्यकीय खर्चाची व्यवस्था करू शकता. आजच्या युगात हे फार महत्वाचे आहे.
