* सोमा घोष
मराठी इंडस्ट्रीमधील ग्लॅमरस आणि सुंदर अभिनेत्री रिना मधुकरने मराठी आणि हिंदी मालिका, चित्रपट आणि वेब सीरिजमध्ये काम करून स्वत:ची वेगळी ओळख निर्माण केली आहे. रिनाचा जन्म पुण्यात झाला. तिथे आपले शिक्षण पूर्ण केल्यानंतर ती मॉडलिंग करू लागली. तिथूनच तिला सुरुवातीला मराठी आणि नंतर हिंदी इंडस्ट्रीत काम करण्याची संधी मिळाली. ‘क्या मस्त है लाईफ’ या हिंदी मालिकेत काम केल्यानंतर तिला लगेचच ‘अजिंठा’ या मराठी चित्रपटात काम करण्याची संधी मिळाली. यात तिला अभिनेत्री सोनाली कुलकर्णीसोबत काम करण्याची संधी मिळाली. त्यानंतर तिने ‘तलाश’ या चित्रपटात अभिनेता आमिर खानसोबत पोलिसाची भूमिका साकारली. सध्या ‘मन उडू उडू झालं’ या झी मराठीवरील मालिकेत ती ‘सानिका देशपांडे’ नावाची भूमिका साकारत आहे, जी प्रेक्षकांमध्ये लोकप्रिय ठरत आहे. या मालिकेमुळेच ती घराघरात पोहोचली आहे. विनम्र आणि स्पष्टवक्ती असलेल्या रिनाने खास ‘गृहशोभिके’सोबत गप्पा मारल्या. त्यातील हा काही खास भाग :
अभिनय क्षेत्रात यायची प्रेरणा तुला कोणाकडून मिळाली?
अभिनय क्षेत्रात अपघातानेच आली, पण काही दिवसांनंतर मला असे वाटू लागले की, मला येथेच काम करायचे आहे. या क्षेत्रातील माझी सुरुवात नितीन चंद्रकांत देसाई यांच्या ‘अजिंठा’ या मराठी चित्रपटाने झाली. मुळात मी लोकनृत्य करणारी डान्सर आहे. माझी नृत्याची कंपनीही होती. मराठी इंडस्ट्रीतील एका आंतरराष्ट्रीय स्तरावर झालेल्या पुरस्कार वितरण सोहळयात नितीन देसाई यांच्याशी माझी ओळख झाली. तिथे मला त्यांच्यासोबत एक फोटो काढायची इच्छा होती. तुला अभिनयाची आवड आहे का, असे तिथेच त्यांनी मला विचारले. मी कधीच अभिनय केला नव्ह्ता. त्यांनी मला प्रयत्न करून बघ, असे सांगितले. मला त्यांचा नंबर दिला आणि मुंबईत येऊन भेटायला सांगितले. मराठी चित्रपट ‘अजिंठा’साठी त्यांना एका चांगल्या डान्सरची गरज होती. मला ऑडिशनसाठी बोलावले आणि माझी निवड झाली. तिथूनच मला अभिनयाची आवड निर्माण झाली आणि या क्षेत्रातील माझी वाटचाल खऱ्या अर्थी सुरू झाली.
तू नृत्याच्या क्षेत्रात कसे पदार्पण केलेस?
मी लोकनृत्यामध्ये मास्टरी केली आहे. शाळेत असल्यापासूनच मला नृत्याची आवड होती, पण त्याचे शास्त्रशुद्ध प्रशिक्षण मी वयाच्या १५ व्या वर्षापासून घ्यायला सुरुवात केली. भारतीय संस्कृतीचे आंतरराष्ट्रीय स्तरावर प्रतिनिधित्व करण्यासाठी मी १६ वर्षे अमेरिका, लंडन, मॉरिशस इत्यादी अनेक ठिकाणी मी नृत्य सादर केले. राष्ट्रीय स्तरावरही मी कार्यक्रम करू लागले.
तुला कुटुंबाचे किती सहकार्य मिळाले?
कुटुंबाचे सहकार्य नेहमीच मिळत गेले, कारण मी कधीच चुकीचे काम करणार नाही, असा त्यांना पूर्ण विश्वास होता. या आधी मी अनेकदा परदेशात एकटी गेले आणि तिथे माझी कला सादर केली. कुटुंबाच्या संपूर्ण पाठिंब्याशिवाय काम करणे कधीच शक्य होत नाही. माझे वडील वायुदलात अधिकारी होते, आता सेवानिवृत्त झाले आहेत.
तूला पहिला ब्रेक मिळाल्यानंतर प्रवास किती सोपा झाला?
पहिला ब्रेक मला २०११ मध्ये ‘अजिंठा’ या चित्रपटामुळे मिळाला. त्यानंतर अभिनेता आमिर खानची प्रमुख भूमिका असलेला ‘तलाश’ या हिंदी चित्रपटात काम मिळाले. त्यानंतर कधी मराठी तर कधी हिंदी, अशा प्रकारे काम सुरूच राहिले. सोबतच नाटकातही काम करते. सध्या ‘मन उडू उडू झालं’ ही माझी मराठी मालिका सुरू आहे. अशा प्रकारच्या मालिकेत काम करण्यासाठी मी खूप 11 वर्षांपासून वाट पाहत होते. चांगले आणि आव्हानात्मक काम करण्याची माझी पहिल्यापासून इच्छा होती. मी कधीच स्वत:ला मर्यादेत बांधून घेतले नाही.
तुला किती संघर्ष करावा लागला?
पहिला आणि दुसरा चित्रपट अगदी सहज मिळाला. त्यानंतर मात्र काम मिळणे अवघड झाले, कारण मी दोन मोठया प्रोडक्शन हाऊससोबत काम केले होते. त्यामुळेच त्यापेक्षा चांगले किंवा त्या तोडीचे काम मिळणे माझ्यासाठी अवघड झाले होते. संघर्ष नेहमीच खूप मोठा आणि तणावपूर्ण असतो, पण मी वाट पाहते.
एखादी अशी मालिका जिने तुझ्या आयुष्याला कलाटणी दिली?
माझ्या सर्वच कामांना प्रेक्षकांनी पसंतीची पोचपावती दिली, पण ‘मन उडू उडू झालं’ ही मालिका सर्व महाराष्ट्रीयन प्रेक्षक, जे विदेशातही आहेत त्यांनाही आवडत आहे. अमेरिकेहूनही मला चांगली प्रतिक्रिया मिळत आहे. सर्व जण मला सानिका म्हणून ओळखू लागले आहेत.
तू सध्या अभिनय क्षेत्रात काम करत आहेस. अशा वेळी नृत्याची आठवण येते का?
नृत्याची आठवण अनेकदा येते. नृत्य हे माझे पहिले प्रेम आहे. जेव्हा कधी मी कोणाला एखाद्या पुरस्कार वितरण सोहळयात व्यासपीठावर नाच करताना पाहते तेव्हा मलाही नाचावेसे वाटते. मी त्या संधीची वाट पाहत आहे आणि मला खात्री आहे की, ही संधी मला नक्की मिळेल. मीही कधीतरी अशा एखाद्या व्यासपीठावर नक्कीच नाचेन.
पुढे काय करायचा तुझा विचार आहे?
लग्नातील संगीतासाठी कोरिओग्राफी म्हणजे नृत्य शिकवणे हे माझे वैशिष्टय आहे. यात मी नवरा किंवा नवरीचे वडील, आई, आत्ये, काका, काकी इत्यादींना नृत्य शिकवते, कारण त्यांनी कधी स्टेजवर नृत्य केलेले नसते. त्यांना नृत्य शिकवणे आणि त्यासाठीचा आत्मविश्वास मिळवून देणे, हे मला मनापासून आवडते. ज्याला आधीपासूनच नाचता येते त्याला शिकवण्यात काहीच मजा येत नाही. नृत्य शिकवणे ही माझी आवड आहे.
तू किती फॅशनेबल आणि खाद्यप्रेमी आहेस?
माझे आईवडील मला लहानपणापासूनच खूप छान ड्रेस घालायचे. माझ्याकडे चपलांचे १५० ते २०० जोड आहेत. मला फॅशन करायला आवडते. कुठल्याही प्रसंगी चांगले कपडे घालायला मनापासून आवडते. माझी पर्सनल स्टायलिस्ट निकिता बांदेकर आहे. मी कुठल्याही कार्यक्रमाला जाण्यापूर्वी ती मला तयार करते. खाद्यप्रेमाबद्दल सांगायचे तर, माझी आई कोकणातली आहे. मला तिच्या हातचे मालवणी पद्धतीने केलेले मासे खायला खूपच आवडतात.
चित्रपटात अंतरंग दृश्य तू किती सहजतेने करू शकतेस?
मी स्क्रिप्ट वाचल्यानंतरच निर्णय घेते. गरज नसल्यास अंतरंग दृश्य करत नाही. याशिवाय ज्यांच्यासोबत मी काम करत आहे ते माझे सहकारी आणि दिग्दर्शक कसे आहेत, हेही पाहते. स्विमिंग कॉस्ट्यूम घालायला मला काहीच हरकत नाही, कारण त्यासाठीच मी माझा बांधा कमनीय बनवला आहे. स्विमिंग कॉस्ट्यूममध्ये कोणी अश्लील तर कोणी निखळ सुंदरही दिसू शकते. या दोघांमध्ये एक अस्पष्ट रेषा असते. यात दिग्दर्शक आणि कॅमेरामनचा सर्वात मोठा हात असतो.
मेकअप करायला तुला किती आवडते?
सेटवर मेकअप करावा लागतो, पण सेटच्या बाहेर मला मेकअप करायला अजिबात आवडत नाही. मात्र डोळयात काजळ घालायला आवडते. सेटच्या बाहेर मी लिपस्टिक लावत नाही. लिप बाम लावते.
लग्नाला तुझ्या आयुष्यात किती महत्त्व आहे? लग्न टिकून रहावे यासाठी काय गरजेचे आहे?
लग्नाला माझ्या आयुष्यात खूपच महत्त्व आहे. मी लग्न केले आहे आणि माझा नवरा जसा मला हवा होता त्यापेक्षाही खूप जास्त चांगला आहे. लग्न म्हणजे नवऱ्याच्या रूपात तुम्हाला समजून घेणारा जोडीदार हवा. जात, धर्म आणि ठिकाण याला कसलेच महत्त्व असता कामा नये. नवरा आणि त्याच्या कुटुंबाचे विचार चांगले असतील तर तुम्ही कुठलाही विचार न करता बिनधास्तपणे लग्न करायला हवे. याशिवाय नवरा हा दोघांमधील छोटया-छोटया समस्या सोडवणारा आणि तुम्हाला समजावणारा माणूस असणे खूप गरजेचे आहे.
आवडता रंग – पिवळा.
आवडता पोशाख – भारतीय पोशाखात साडी आणि पाश्चिमात्य पोशाखात आरामदायी वाटेल असे कुठलेही ड्रेस.
वेळ मिळाल्यास – चांगली झोप घेणे आणि सीटू (मांजर) बरोबर खेळणे.
आवडता परफ्युम – बबरी ब्लश.
आवडते पर्यटन स्थळ – भारतात चंदिगढ आणि दिल्ली. परदेशात स्वित्झर्लंड.
जीवनातील आदर्श – तेच काम करावे जे घरातले आणि स्वत:लाही योग्य वाटेल.
एखादे स्वप्न – बाजीराव मस्तानीमध्ये मस्तानीची भूमिका साकारणे.
बेस्ट कॉम्प्लिमेंट – माझ्या डोळयांसाठी मिळालेली, याशिवाय पालकांनी मुलांना दिलेला माझ्यासारखे बनण्याचा सल्ला.
सामाजिक कार्य – मांजरे, भटकी कुत्री आणि प्राण्यांसाठी काम करणे.
