* गरिमा पंकज
नवीन वर्ष, नवी पहाट, नवीन इच्छा आणि सर्वात सुंदर दिसण्याची इच्छा. भलेही सोहळा कोणताही असो आणि पार्टी कुठेही असो, सर्वांत सुंदर दिसावे अशी प्रत्येक मुलीची इच्छा असते. काही मुलींना निसर्गानेच अतुलनीय सौंदर्य दिलेले असते तर काहींना त्यांच्या शारीरिक कमतरतांशी तडजोड करावी लागते. या उणीवा दूर करण्याच्या किंवा त्याहूनही सुंदर दिसण्याच्या प्रयत्नात अनेकदा त्यांना मोठा फटका बसतो.
तुम्हीही या नवीन वर्षात स्वत:ला अधिक सुंदर बनवण्याचा प्रयत्न जरूर करा, पण अतिशयोक्ती नकोच. याचा अर्थ असा की, आपल्या नैसर्गिक सौंदर्याशी अशा प्रकारे छेडछाड करू नका की, त्याचा आरोग्यावर दुष्परिणाम होईल.
अशा अनेक नोकऱ्या किंवा काम असते जिथे महिलांना नीटनेटके दिसणे गरजेचे असते आणि याच नादात त्यांना त्यांच्या आरोग्याशी तडजोड करावी लागते. उदाहरणार्थ, हवाई सुंदरींना अनेकदा १२ तासांपेक्षा जास्त काळ उंच टाचांच्या चपला घालाव्या लागतात, ज्यामुळे त्यांच्या आरोग्यावर वाईट परिणाम होतो. त्यामुळेच नुकताच एक निर्णय घेण्यात आला, त्यानुसार, युक्रेनच्या स्काय अप एअरलाइन्सच्या महिला क्रु मेंबर्स आता पेन्सिल स्कर्ट, हाय हिल्स आणि ब्लेझरऐवजी आरामदायी ड्रेस पँट, सूट आणि स्नीकर्समध्ये दिसतील.
अशाच प्रकारे अभिनेत्रींना तासन्तास पूर्ण मेकअपमध्ये राहावे लागते, त्यामुळे त्यांचा चेहरा खराब होतो. करीना कपूरचाच चेहरा घ्या, अलीकडच्या काळात तिचे असे अनेक फोटो सोशल मीडियावर व्हायरल झाले, ज्यामध्ये तिचा चेहरा मेकअपशिवाय खूपच खराब दिसत आहे. इतर अनेक अभिनेत्रींसोबतही असेच घडले आहे. वास्तविक, वर्षानुवर्षे सतत मेकअप केल्यामुळे त्वचेचे नुकसान होते.
अशाच प्रकारे ब्रेस्ट इम्प्लांटसारख्या कृत्रिम सौंदर्यामुळेही अनेकदा महिलांचे आरोग्य बिघडते. कधी महिला जाणूनबुजून तर कधी वर्क कल्चरमुळे पुरुषांना आकर्षित करण्यासाठी स्वत:ला अधिक सुंदर, आकर्षक आणि कामुक बनवतात. सुंदर दिसण्याच्या हव्यासापोटी मुली काहीही करायला तयार असतात.
काही शस्त्रक्रियांवर करोडो रुपये खर्च करतात तर काही अनेक प्रकारच्या क्रीम्स आणि औषधे खरेदी करतात. स्वस्तच्या नादात अनेक मुली स्वत:चे खूप नुकसान करून घेतात. अनेकदा आधीच सुंदर असलेल्या अनेक मुली अधिक सुंदर दिसण्याच्या नादात आपला चेहरा आणि आयुष्य उद्धवस्त करून घेतात.
सौंदर्य वाढण्याऐवजी ठरली चेष्टेचा विषय
असेच काहीसे इंग्लंडमधील लँकशायरमध्ये राहणाऱ्या २१ वर्षीय ऑलिव्हिया मॅककॅनसोबत घडले. व्यवसायाने हवाई सुंदरी असलेल्या ऑलिव्हियाने तिच्या चेहऱ्याचे सौंदर्य वाढवण्यासाठी ओठांची शस्त्रक्रिया करण्याचा निर्णय घेतला, मात्र शस्त्रक्रियेनंतर तिचे ओठ तिप्पट मोठे झाले.
ऑलिव्हियाचा चेहरा पाहून लोक हसू लागले. तिची चेष्टा करू लागले. खरेतर, २१ वर्षीय हवाई सुंदरी ऑलिव्हियाने १० हजार रुपयांमध्ये तिच्या ओठांची शस्त्रक्रिया करून घेतली होती. तिला थोडेसे मोठे ओठ हवे होते. सौंदर्य तज्ज्ञांनी सांगितले की, शस्त्रक्रियेनंतर तिच्या ओठांवरची सूज कमी होईल आणि तिचे ओठ नैसर्गिकरित्या सुंदर दिसतील, पण असे झाले नाही. सुंदर दिसण्यासाठी तिने शस्त्रक्रिया केली खरी, पण या शस्त्रक्रियेमुळे तिचा चेहरा विद्रुप होईल आणि तिचे ओठ तिप्पट मोठे होतील याची तिला कल्पना नव्हती.
शस्त्रक्रियेनंतर, ऑलिव्हियाच्या ओठांवर फोड आले होते जे खूप वेदनादायक होते. अनेक महिने तिची अवस्था अशीच बिकट होती. त्यानंतर हळूहळू ती थोडी बरी झाली. ऑलिव्हियाने सुंदर दिसण्यासाठी तिच्या ओठात आधीच फिलर्स लावले होते.
बनावट सर्जनची लबाडी
स्वत:ला बार्बी सर्जन म्हणवणारी ओलगिसा अनेकदा तिचे ग्लॅमरस फोटो इंस्टाग्रामवर पोस्ट करत असे. त्याचवेळी मुलींना तिच्यासारखे सुंदर बनवण्याचे आमिष दाखवून प्लास्टिक सर्जरीसाठी प्रवृत्त करत असे. तिच्याकडे या व्यवसायाची कोणतीही पदवी नव्हती. परिणामी, ओलगिसाचे अनेक रुग्ण आज अत्यंत वाईट अवस्थेत आहेत.
पीडित महिलेच्या म्हणण्यानुसार, ओलगिसाची छायाचित्रे पाहून ती प्रभावित झाली. त्यानंतर तिला भेटली आणि स्वत:चे नाक तसेच भुवया उंचावण्यासाठी शस्त्रक्रिया करण्यास तयार झाली. ओलगिसाने तिची शस्त्रक्रिया केली.
मात्र त्यानंतर तिच्या चेहऱ्याच्या डाव्या बाजूला जळजळ सुरू झाली. याचा परिणाम असा झाला की, तिला ७ दिवस डोळे उघडता आले नाहीत. अशाच समस्या घेऊन सुमारे ११ महिला पुढे आल्या. अनेक तक्रारी समोर आल्यानंतर, ओलगिसा तिच्या दवाखान्यातून पळून गेली.
सौंदर्याच्या नादात गमवावे लागले दोन्ही पाय
असेच काहीसे सविंक सेक्लिक नावाच्या मुलीसोबत घडले. सुंदर चेहऱ्याच्या हव्यासापोटी तिला नाकाची शस्त्रक्रिया करणे महागात पडले. तुर्कीच्या प्लास्टिक सर्जरी क्लिनिकमध्ये नाकाची शस्त्रक्रिया केल्यानंतर तिला तिचे दोन्ही पाय गुडघ्याखालून कापून टाकावे लागले. २५ वर्षीय सविंक सेक्लिकने तिचे नाक लहान करण्यासाठी इस्तंबूलमधील एका खासगी रुग्णालयात शस्त्रक्रिया केली.
सुमारे २ तास चाललेल्या या शस्त्रक्रियेनंतर डॉक्टरांनी तिला घरी पाठवले. घरी गेल्यावर सेविंकला ताप येऊ लागला, मात्र, ही सामान्य लक्षणे आहेत, घाबरण्याचे काहीही कारण नसल्याचे रुग्णालयाने ठामपणे सांगितले, पण तिची प्रकृती दिवसेंदिवस बिघडत चालली होती.
तिने खाणे-पिणे सोडले. ती सतत आजारी पडू लागली. तिच्या पायाचा रंग काळा झाला होता. प्रकृती गंभीर झाल्यानंतर तिला पुन्हा रुग्णालयात दाखल करण्यात आले. सविंकला रक्तात विषबाधा झाली होती. अखेर तिचा जीव वाचवण्यासाठी तिचे पाय कापण्याशिवाय दुसरा पर्याय नव्हता. तिचे गुडघ्याखालचे पाय कापावे लागले. सौंदर्याच्या नादात तिने सामान्य जीवन जगण्याचा आनंदही गमावला.
हातातून गेल्या अनेक भूमिका
अशाच प्रकारे चिनी अभिनेत्री आणि गायिका गाओ लिऊ हिने नुकतीच कॉस्मेटिक सर्जरी केली, पण तिलाही ही शस्त्रक्रिया करणे महागात पडले. अभिनेत्रीने तिच्या शस्त्रक्रियेपूर्वीचे आणि नंतरचे काही फोटो सोशल मीडियावर तिच्या ५० लाख फॉलोअर्सना शेअर केले, ज्यामध्ये कॉस्मेटिक सर्जरीनंतर तिच्या नाकावर डाग दिसत आहेत. नाकाचा पुढचा भाग काळा आणि सपाट दिसतो.
खरेतर, एका मित्राच्या सांगण्यावरून, अभिनेत्रीने अधिक सुंदर दिसण्यासाठी कॉस्मेटिक क्लिनिकमध्ये नाकाची शस्त्रक्रिया केली होती. सुमारे ४ तासांच्या शस्त्रक्रियेनंतर अभिनेत्रीला तिच्या नाकासाठी हवा असलेला आकार तर मिळाला नाहीच, शिवाय तिच्या नाकातील काही उती मृत झाल्या. अभिनेत्रीला नंतर कळले की, तिने ज्या क्लिनिकमध्ये शस्त्रक्रिया केली होती त्यांच्याकडे शस्त्रक्रिया करण्याची परवानगी नव्हती.
गाओ लिऊच्या म्हणण्यानुसार तिला वाटत होते की, शस्त्रक्रियेनंतर तिला अधिक भूमिका मिळू लागतील, पण आता चेहरा बिघडल्यामुळे तिच्या मनात आत्महत्येसारखे विचार येत असून अनेक भूमिका हातातून निसटून गेल्या आहेत. गाओ सांगते की, या शस्त्रक्रियेमुळे तिला ६१ दिवस रुग्णालयात दाखल करण्यात आले. चुकीच्या शस्त्रक्रियेमुळे तिला दोन चांगले प्रोजेक्ट गमवावे लागले, त्यामुळे तिचे करोडोंचे नुकसान झाले.
प्लास्टिक सर्जरी करणाऱ्यांपैकी बहुतांश तरुणी आहेत. सोशल मीडियावर सुंदर दिसण्यासाठी आणि प्रभावशाली वाटण्यासाठी सुरू असलेल्या धडपडीमुळे शस्त्रक्रियेची ही बाजारपेठ झपाटयाने वाढत आहे. सुंदर दिसण्यानेच आपल्याला इच्छित ध्येय गाठता येईल, अशी अनेक मुलींची मानसिकता असते. नातेसंबंध असोत किंवा करिअर असो, त्यांच्या दृष्टीने सौंदर्य ही यशाची सर्वात महत्त्वाची पायरी असते.
त्यामुळेच सुंदर दिसण्यासाठी त्या कोणतेही पाऊल उचलण्यास मागेपुढे पाहत नाहीत. पुढे जेव्हा याचे दुष्परिणाम समोर येतात तेव्हा खंत करण्याशिवाय दुसरे काहीच हाती उरत नाही. म्हणूनच मुलींनी समजून घेतले पाहिजे की, निसर्गाने बहाल केलेले सौंदर्य जपण्यातच शहाणपण आहे आणि जे मिळाले ते इतरांच्या लालसेपोटी वाया घालवू नये. असे अनेक मार्ग आहेत ज्याद्वारे तुम्ही स्वत:ला अधिक चांगले बनवू शकता आणि नैसर्गिक पद्धतीने तुमचे सौंदर्य खुलवू शकता.
स्वत:ला निरोगी आणि स्मार्ट बनवा
सौंदर्याचे पहिले प्रमाण म्हणजे तुमचे निरोगी व्यक्तिमत्व. जर तुम्ही निरोगी असाल, शारीरिकदृष्टया अपंग नसाल, साहसी असाल, खूप लठ्ठ नसाल आणि खूप बारीकही नसाल, तुमचे खांदे उतरलेले नसतील आणि तुम्ही जे काही घालता ते तुम्हाला शोभत असेल तर तुमचे शरीर संतुलित आहे असे समजावे. असे असेल तर तुमच्यापेक्षा सुंदर दुसरा कोण असू शकतो? आकर्षक व्यक्तिमत्व आणि सौंदर्यासाठी नाक, ओठ किंवा स्तनाचा आकार महत्त्वाचा नसून तुम्ही निरोगी आणि स्मार्ट असणे जास्त महत्त्वाचे असते.
डोळयात हवी काहीतरी करण्याची चमक
सौंदर्य डोळयात दिसते. तुमचे डोळे सकारात्मक ऊर्जा आणि उत्साहाने भरलेले असतील, तुम्ही तुमच्या डोळयांनी हसत असाल आणि डोळयांनी समोरच्या व्यक्तीवर प्रभाव टाकण्यास सक्षम असाल, तर तुम्हाला सौंदर्याची काळजी करण्याची गरज नाही. एखादी गोष्ट करण्याचा विश्वास आणि जिद्द डोळयात दिसली तर लोक स्वत:च तुमच्याकडे आकर्षित होतील. तुम्हाला तुमच्या कामातून ओळख मिळेल. तुमच्या डोळयात आत्मविश्वास दिसला पाहिजे तरच तुम्ही करिअरच्या वाटेवर वेगाने वाटचाल करू शकाल.
सकारात्मक दृष्टिकोन
काही लोकांचे बोलणे असे असते की, समोरच्या व्यक्तीला ते ऐकल्यावर खूप बरे वाटते. दोघांमध्ये सकारात्मक ऊर्जा निर्माण होते. आजूबाजूचे वातावरणही सकारात्मक होते. मग तो कर्मचारी असो किंवा मित्र, प्रत्येकाला अशा व्यक्तीशी नाते जपायचे असते. म्हणूनच तुमच्या सौंदर्यापेक्षा तुमच्या वृत्तीवर काम करणे जास्त महत्त्वाचं असते. दृष्टिकोन सकारात्मक असेल तर तुम्हाला प्रत्येक क्षेत्रात यशस्वी होण्यापासून तुम्हाला कोणीही रोखू शकत नाही.
