* डॉक्टर भारती तनेजा, संचालक, एलप्स ब्युटी क्लिनिक अँड अकॅडमी
लग्नसोहळा म्हटले म्हणजे स्वाभाविकपणे तुमच्या डोळयासमोर सिल्क, जरी, मोती, काचांच्या टिकल्या, चंदेरी आणि सोनेरी कलाकुसरीचा लेहेंगा परिधान केलेली नववधू उभी राहते. या पोशाखात ती एखाद्या अप्सरेलाही लाजवेल अशीच दिसत असते. जरदोसीने सजवलेल्या पोशाखात तुमचेही रूप खुलून दिसावे यासाठी मेकअप कसा करायला हवा, हे डॉ. भारती तनेजा यांच्याकडून माहिती करून घेऊया :
सर्वप्रथम हे ठरवा की, तुम्हाला नैसर्गिक रुप हवे आहे की जास्त उठावदार मेकअप करायचा आहे. आजकाल अनेक नववधूंना नैसर्गिक वाटेल असाच मेकअपच जास्त आवडतो. तुम्हालाही जर असे नैसर्गिक रूप हवे असेल तर त्यासाठी तुमच्या मेकअपच्या स्टेप्स पूर्णपणे उठावदार मेकअपसारख्याच असतील, पण मेकअपसाठी वापरलेले रंग सौम्य असतील. अन्य मेकअपचा अगदी थोडासाच वापर करून त्यावर पावडर लावून ती चेहऱ्यावर सर्वत्र व्यवस्थित पसरवली जाते, जेणेकरून संपूर्ण त्वचा एकसमान दिसेल.
नैसर्गिक मेकअप
आपले रूप नैसर्गिक वाटावे यासाठी आयशॅडो ब्लशर, लिपस्टिक आणि हायलायटरचे रंग सौम्य ठेवले जातात. या मेकअपमध्ये विंग्ड आयलायनर लावले जात नाही, फक्त डोळयांची आऊटलायनिंग केली जाते. याच्या मदतीने तुम्ही कपाळावर छोटी टिकलीही काढू शकता.
उठावदार मेकअप
* वधूचा मेकअप तासनतास कायम टिकून रहावा यासाठी वॉटरप्रुफ मेकअपचा वापर करावा, जेणेकरुन सासरी पाठवणीच्या वेळेपर्यंत चेहऱ्याची चमक कायम राहील. याशिवाय लग्नाच्या हॉलमधील झगमगत्या प्रकाशात तिच्या चेहऱ्यावरील लाली झाकोळली जाणार नाही.
* फक्त डोळे आणि ओठ या दोन ठिकाणीच गडद मेकअप करणे, ही आता भूतकाळातील गोष्ट झाली आहे. आता एकतर लिपस्टिक सौम्य रंगाची लावा आणि जर डोळयांचा मेकअप सौम्य केला असेल तर लिपस्टिक गडद रंगाची लावा. फक्त एक गोष्ट लक्षात ठेवा की, मेकअप तुमचा लेहेंगा किंवा लग्नाच्या पेहरावाशी जुळणारा किंवा त्याला पूरक दिसेल असाच हवा.
* डोळे मादक दिसावेत यासाठी बनावट मिळणारे पापण्यांचे केस तुम्ही तुमच्या पापण्यांवर लावू शकता. त्यांना पापण्यांच्या रंगाने कर्ल करा आणि मस्कराचा कोट लावा जेणेकरून ते तुमच्या पापण्यांसारखेच नैसर्गिक वाटतील. तुमची इच्छा असल्यास, तुम्ही तुमच्या लग्नाच्या २ दिवस आधी बनावट मिळणाऱ्या पापण्या या कायमस्वरूपी लावून घेऊ शकता.
* डोळयांचा आकार व्यवस्थित दिसण्यासाठी विरोधाभासी रंगांचे दोन प्रकारचे लायनर वापरू शकता. उदाहरणार्थ, पापणीच्या आतील कोपऱ्यावर इलेक्ट्रिक ब्लू आणि बाहेरील कोपऱ्यावर हिरव्या रंगाने विंग्ड लायनर लावा. डोळयांखालीही सौम्य हिरवा रंग लावा, सोबतच डोळयांखालील कडांना गडद जेल काजळ लावा.
* आजकाल कपाळावर मोठी टिकली व भांग भरण्याचा ट्रेंड आहे, अशा परिस्थितीत जर तुमच्या कपाळाचा निम्म्यापेक्षा जास्त भाग हा भांग भरल्यामुळे झाकला गेला असेल, तर लेहेंग्याच्या रंगाशी मिळतीजुळती बिंदी लावा. भांगेत कमी कुंकू लावले असेल तर कपाळाच्या मध्यभागी मोठी बिंदीही लावता येते.
* अशा प्रसंगी, वधू सतत मेकअप नीटनेटका करू शकत नाही, म्हणून आधीच ओठांवर आपल्या लेहेंग्याशी जुळणारी किंवा त्याला शोभेल अशी ओठांवर दीर्घकाळ टिकणारी लिपस्टिक लावा.
* केस म्हणजे जणू डोक्याचा मुकुट असतो. तो सजवण्यासाठी हेअरस्टाईलमध्ये डिझायनर नेक पीस, खडयांनी सजवलेली बनावट वेणी, त्यावर लावलेला कुंदनजडित पट्टा, सुंदर सजवलेली कृत्रिम फुले वापरता येतील. मात्र आजकाल फुलांचा ट्रेंड आहे, त्यामुळे केसांसाठी फक्त फुलांचाच वापर केला जात आहे.
