* एनी अंकिता
हण्डबॅगेमध्ये तुम्ही तुमच्या गरजेच्या सर्व वस्तू ठेवता जेणेकरून गरज भासल्यास लगेच ती वस्तू वापरता येईल. पण तुम्हाला कल्पना नाही की तुमच्या बॅगेत तुम्ही दुसरंही काही तरी घेऊन फिरत असता? हो, तुमच्या पर्समध्ये अनेक प्रकारचे विषाणू तयार होत असतात, जे तुम्हाला आजारी करू शकतात.
एका नवीन संशोधनानुसार, ९० टक्यांहून अधिक विषाणू तयार होतात. संशोधनात असं आढळलं आहे की स्वयंपाकघर, स्नानगृह अशा ठिकाणांच्या तुलनेत पर्समध्ये अधिक बॅक्टेरिया तयार होतात, जे आरोग्यासाठी घातक आहेत.
डेली मेलने जनरल अॅडव्हान्स बायोमेडिकलच्या आधारे हे स्पष्ट केलं आहे की महिलांमध्ये व पुरुषांमध्येही संसर्गजन्य आजार पसरण्याचे मुख्य कारण त्यांची बॅग हे असू शकतं. वास्तविक संशोधनानुसार पुरुषांच्या तुलनेत स्त्रियांच्या पर्समध्ये अधिक बॅक्टेरिया असतात.
संशोधनात असंही आढळून आलं आहे की २.१ टक्के स्त्रियाच महिन्यातून एकदा आपली पर्स स्वच्छ करतात व ८१.५ टक्के स्त्रिया कधीच आपली पर्स स्वच्छ करत नाहीत.
अलीकडच्या काळात तसंही आजारांचे प्रमाण वाढलेलं आहे. त्यासाठी तुम्ही सृहृढ राहू इच्छित असाल तर तुमच्या हॅण्डबॅगची स्वच्छता नक्की करा. बॅगेत फक्त गरजेच्या वस्तूच ठेवा व त्याही योग्यपद्धतीने ठेवा.
हॅण्डबॅगची सफाई कशी कराल?
* कोमट पाण्यात थोडा लिक्विड साबण मिसळा व त्याने हॅण्डबॅग बाहेरून स्वच्छ करून घ्या. लिक्विड साबणाऐवजी तुम्ही शाम्पूसुद्धा वापरू शकता. यामुळे बाहेरील भागाची स्वच्छता होईल.
* वाइन्स किंवा इतर कुठल्याही घरगुती वस्तू बॅगेच्या स्वच्छतेसाठी वापरू नका. या उत्पादनांमध्ये रसायनांचा वापर असल्याने बॅगेचा रंग खराब होण्याची शक्यता असते.
* लेदर पर्स सुती कपाड घेऊन हलक्या हाताने स्वच्छ करा. पेट्रोलियम जेलीसुद्धा तुम्ही वापरू शकता.
* बॅगेतील कोपरे स्वच्छ करण्यासाठी टूथपिकचा वापर करावा.
* बॅग स्वच्छ केल्यानंतर लगेचच वस्तू भरू नयेत. काही वेळ तशीच हवेत राहू द्यावी.
हे करू नये
* सौंदर्य प्रसाधनांनी बॅग भरू नये. रोज ज्या वस्तूंचा तुम्ही वापर करता त्याच वस्तू ठेवाव्यात व त्याही एखाद्या पाऊचमध्ये व्यवस्थित बांधून ठेवाव्यात किंवा त्याही वेळोवेळी स्वच्छ कराव्यात.
* खाण्यापिण्याच्या वस्तू बॅगमध्ये ठेवू नयेत. खासकरून तेव्हा जेव्हा तुम्ही खाण्याचे पाकीट उघडलेले असेल. यामुळे बॅगेला मुंग्या लागू शकतात.
* बॅग कुठेही ठेवू नका. ज्या ठिकाणी जिवाणू तयार होतात अशा ठिकाणी बॅग ठेवू नये.
* हॅण्डबॅगला कचऱ्याचा डबा बनूव नये. काही स्त्रियांना आपल्या सगळ्या वस्तू बॅगेत ठेवायची सवय असते.
हेही लक्षात ठेवा
* नेहमी वॉटरप्रूफ बॅगच विकत घ्या कारण साध्या बॅगेमधून पावसाळ्यात आतील सामान ओले होण्याची शक्यता असते, त्यामुळे बॅक्टेरिया तयार होतात.
* बॅग विकत घेताना पट्ट्याकडेही लक्ष ठेवा. कारण पातळ व कडक पटट्यायांमुळे खांद्यांच्या मांसपेशी दुखावू शकतात. नेहमी रूंद व मऊ पटट्यांच्या बॅग घ्या.
* बॅगेचे वजनदेखील पाहा, कारण काही बॅग आधीच वजनाने जड असतात व त्यात वस्तू ठेवल्या की त्या जास्तच जड होतात.
* हॅण्डबॅग कधीही प्लास्टिक पिशवीत ठेवू नयेत. यामुळे बॅग लवकर खराब होते. यासाठी जुन्या उशीच्या अभ्यांचा वाप करा किंवा सुती पिशवीचा वापर करा.
* जेव्हा बॅगेचा वापर करायचा असेल तेव्हा त्यातील सर्व सामान काढून टाकून टिशू पेपर घालून ठेवावेत म्हणजे बॅगेचा आकार बिघडत नाही व त्यात बॅक्टेरियाची निर्मिती होत नाही.
* बॅगेमध्ये ओलसरपणा राहू देवू नये, यामुळे बॅक्टेरिया उत्पन्न होतो.
