* मोनिका गुप्ता
मेंदी लावणे प्रत्येक स्त्रीला आवडते. लग्न असो वा इतर कोणता उत्सव मेंदीविना तो अपूर्ण आहे. प्रत्येक आनंदात सहभागी होणाऱ्या या मेंदीची सगळे प्रशंसा करत असतात, पण यामुळे होणाऱ्या त्रासाकडे आपण दुर्लक्ष करतो.
पूर्वी मेंदी घरातच वाटून तयार केली जायची. पण आजकाल ही बाजारात सहज उपलब्ध होते आणि बहुतांश महिला याचाच वापर करतात. पण बाजारात मिळणारी रेडिमेड मेंदी आपल्या त्वचेसाठी हानिकारक असते. तसे पाहता, बाजारात मिळणाऱ्या मेंदीत अनेक प्रकारची रसायने मिसळलेली असतात, जी तुमच्या त्वचेला नुकसान पोहोचवू शकतात.
रसायने असलेली मेंदी
गडद रंगाची मेंदी जेव्हा हातावर काढली जाते, तेव्हा स्त्रिया खूपच खुश होतात. पण याच्या गडद रंगामागे धोकादायक रसायनं असतात. पीपीडी, डायमिन, अमोनिया, हायड्रोजन यासारखी धोकादायक रसायनं मेंदीत मिसळलेली असतात. यामुळे हात शुष्क होतात, शिवाय सूज, जळजळ, खाज यासारखे त्राससुद्धा सुरु होतात. जर भयानक रसायनांनी तयार केलेली मेंदी सूर्यकिरणांच्या संपर्कात आली तर यामुळे कर्करोग व्हायची भीती असते.
विचार करून लावा केसांना मेंदी
आज मेंदी लावणे म्हणजे भयानक रसायनांशी मैत्री करणे आहे. जसे आपण मेंदीचे सुंदर सुंदर डिझाइन्स हातांवर काढतो, तसेच केसांचे सौंदर्य वाढवायलासुद्धा याचा वापर करतो. पण केसांना मेंदी लावल्याने अनेक प्रकारच्या समस्या उद्भवू शकतात, ज्याकडे आपण कधी लक्ष देत नाही.
या जाणून घेऊ, मेंदी केसांना का लावू नये :
हेअरस्टाईलिस्ट हेमंत सांगतात, ‘‘अलीकडे हर्बल मेंदीच्या नावावर केमिकल विकण्यात येत आहे, ज्यामुळे केस थोडया काळासाठी चमकदार तर दिसतात, पण शेवटी त्यातील आर्द्रता कमी होऊ लागतो, ते शुष्क आणि निर्जीव दिसू लागतात.’’
आजच्या काळात तुम्ही स्टायलिस्ट आणि सुंदर दिसणे आवश्यक झाले आहे, जेणेकरून तुमचे केसही सुंदर दिसावे, कॉलेजमधील युवती असो वा काम करणारी स्त्री असो, आजच्या काळात प्रत्येकजण हायलाईट, केराटिन, स्मूदनिंग, रिबॉण्डिंग करून घेण्याला प्राधान्य देतात. जर तुम्हाला आपल्या केसांवर वेगवेगळे प्रयोग करायचे असतील तर सर्वात आधी तुम्हाला तुमच्या केसांना मेंदीपासून दूर ठेवावे लागेल.
तसे पाहता, मेंदी आपल्या केसात दीर्घ काळ राहते. जर कोणी मेंदीचा वापर हायलाईट, कॅराटीन वगैरेसाठी करणार असेल, तर यामुळे केसांवर त्याचा कधीही चांगला परिणाम मिळणार नाही.
आपल्या केसांना समजून घ्या
हेमंत सांगतात, ‘‘केसांचे ३ थर असतात. क्युटिकल, कॉर्टेक्स आणि मेड्युला. मेंदी केसांच्या पहिल्या थरावर आवरण टाकण्याचे काम करते. ज्या स्त्रिया वर्षातून १० वेळा मेंदी लावतात, त्यांच्या केसात ६-७ आवरण राहून जातात. अशा वेळी केसांवर कोणतेही रसायन काम करत नाही आणि जर करत असेल तर त्याचा परिणाम चांगला नसतो, जे केसांना नुकसानच पोहोचवते.’’
बाह्य उपायांनी स्वत:ला सुंदर दाखवण्याचा प्रयत्न करण्यापेक्षा आपले व्यक्तिमत्व समृद्ध करा. मग मेंदीचा वापर कारायचाच असेल, तर एखाद्या तज्ञाच्या देखरेखीखाली करा.
या गोष्टींकडे लक्ष ठेवा
* जर तुम्हाला मेंदीचा वापर करायचा असेल तर बाजारात मिळणारी मेंदी घेण्याऐवजी पानांच्या मेंदीचा वापर करा.
* मेंदीची ताजी पानं बारीक करून केसांना लावल्यास थंडावा जाणवतो. यामुळे केसांचे कोणतेही नुकसान होत नाही.
* जर तुम्हाला भविष्यात केसांवर काही प्रयोग करायचे असतील तर तुम्ही मेंदी लावू नका.
* कधीच मेंदी केसात अर्ध्या तासाहून अधिक वेळ ठेवू नका.
* हातांवर मेंदी लावण्याआधी मोहरीचे तेल अवश्य लावा.
* जर मेंदी लावल्यावर तुमच्या शरीरावर पुटकुळ्या आल्या वा इतर कोणते नुकसान झाले, तर थंड पाण्याने धुवून टाका आणि नंतर खोबरेल तेलाचा लेप लावून चांगले मालिश करा. आणखी एक विशेष गोष्ट म्हणजे मेंदी चांगल्या ब्रॅण्डची खरेदी करा.
