* इंजी आशा शर्मा
आजकाल प्रत्येक कपलला आपले प्री वेडिंग शूट इतरांपेक्षा चांगले करायचे असते. त्यांची इच्छा असते की हा थाटमाट सोहळयाला आलेल्यांच्या आठवणीत कायमचा राहावा. लग्नानंतरही त्याचीच चर्चा व्हावी आणि फोटोग्राफरनेही त्यांचेच शूट उदाहरणादाखल इतरांना दाखवावे. चला, जाणून घेऊया की याला शानदार आणि संस्मरणीय कसे बनवायचे ते.
लग्नानंतर जवळीक वाढविण्यासाठी जसा हनीमून गरजेचा आहे, तसेच एकमेकांना चांगल्याप्रकारे समजून घेण्याच्या प्रक्रियेत प्री वेडिंग शूट उपयोगी ठरू शकते. कारण सोबत राहिल्यामुळे तुम्हाला तुमच्या जोडीदाराच्या बऱ्याच गोष्टी समजतात. त्याच्या सवयी लक्षात येतात.
यासोबतच सामान्यत: प्री वेडिंग शूट करणारा फोटोग्राफरच लग्नाचे शूटिंग करतो. साहजिकच त्या जोडप्याशी त्याचे चांगले टयूनिंग जुळते. त्यामुळे शूट करणे त्याच्यासाठी सहज सोपे होते. आणि याच सहजतेमुळे लग्नाचे फोटो आणि व्हिडिओ शानदार आणि संस्मरणीय ठरतात.
कोठे कराल
प्री वेडिंग शूटसाठी सर्वप्रथम योग्य ठिकाणाची निवड करणे खूपच गरजेचे आहे. प्रत्येकाची स्वत:ची अशी आवड असते. कुणाला नदी, पर्वत आवडतात, तर कुणाला समुद्र किंवा किल्ले, महाल. काहींना थीम शूटिंग आवडते.
वरवधूने एकमेकांची आवड आणि सोय लक्षात घेऊन ठिकाण निवडले पाहिजे. देशात आणि देशाबाहेर अशी बरीच ठिकाणे आहेत, जी आजकाल प्री वेडिंग शूटसाठी तरुणांची पहिली पसंती आहेत. जसे महाल, किल्ल्यांसाठी राजस्थानातील जयपूर आणि उदयपूर, समुद्र किनाऱ्यांसाठी गोवा, केरळ आणि पाँडेचेरी व उद्याने, वनांसाठी नॅशनल पार्क इत्यादी.
आपल्या बजेटचा विचार करून तुम्ही आसपासच्या एखाद्या रमणीय ठिकाणाचीही निवड करू शकता.
अजून बरेच पर्याय आहेत
वेडिंग फोटोग्राफर नरेश गांधी सांगतात की छोटया शहरांतील तरुण-तरुणी जे डेस्टिनेशन शूट करू शकत नाहीत, त्यांच्यासाठी सेट्सचा एक नवा ट्रेंड आला आहे. होय, चित्रपट आणि मालिकांप्रमाणेच आजकाल प्री वेडिंग शूटसाठीही खास सेट बनवले जात आहेत. याचा फायदा असा होतो की तुम्हाला एकाच ठिकाणी सर्व लोकेशनचे बॅकग्राउंड मिळते. एकटयाने बाहेर जावे लागेल, हा संकोच दूर होतो आणि खिशावर बजेटचा भारही पडत नाही. सर्वात महत्त्वाचे म्हणजे आउट डोअर शूटिंगवेळी कपडे बदलताना येणाऱ्या अडचणीतूनही सुटका होते.
शूट कसे असावे
स्टिल फोटोग्राफी आणि व्हिडिओ शूट बहुतांश कपल्सची इच्छा असते की एखाद्या चित्रपटाच्या जोडप्याप्रमाणे त्यांची गोष्टही सर्वांसमोर यावी. जसे की एखाद्या विशिष्ट ठिकाणी त्यांचे भेटणे किंवा फिल्मी स्टाईल एकमेकांना धडकणे. मग थोडे लटके, भांडण. त्यानंतर प्रपोज आणि होकार इत्यादी आणि हे सर्व केवळ व्हिडिओ शूटद्वारे शक्य आहे, पण हे प्रत्यक्ष त्याच लोकेशनवर शूट करणे कठीणच नाही तर बजेटच्या बाहेरचेही होऊ शकते.
व्हिडिओ शूटसाठी तुम्ही तुमच्या जोडीदारासोबत कम्फर्टेबल असणे खूपच गरजेचे आहे, कारण एका व्हिडिओ शूटमध्ये १०-१५ सेकंदांपर्यंत कम्फर्टेबल राहावे लागते.
काय खास असावे
प्री वेडिंग शूटमध्ये सर्वात महत्त्वाची गोष्ट म्हणजे दोघांमधील केमिस्ट्री. तुम्ही दोघे मेड फॉर इच अदर वाटायला हवात. यासाठी गरजेचे आहे की तुम्ही दोघांनी एकमेकांसोबत काही वेळ एकांतात घालवायला हवा. तुम्ही फोनवर गप्पा मारल्या असाल किंवा व्हिडिओ चॅटद्वारे एकमेकांची आवडनिवड समजून घेतली असेल, ते भाव तुमच्या देहबोलीतून जाणवायला हवेत.
अशा प्रकारच्या शूटमध्ये मित्रमैत्रिणींनाही सोबत घेता येईल. तुम्ही सर्व डान्स करत किंवा सहलीत मौजमजा करत असताना दिसलात तर ते क्षण निश्चितच अतिरिक्त ऊर्जेने भरलेले दिसतील.
पावसात भिजतानाच्या तुमच्या शूटमध्ये नॅचरल रोमान्स दिसेल. विविध प्रकारचे प्रॉप्स वापरुनही तुम्ही तुमच्या शूटला युनिक बनवू शकता.
थोडेसे रोमँटिक व्हा
नेहमीच्या आणि पारंपरिक शूटपेक्षा वेगळे असे काही व्हिडिओ जे थोडे रोमँटिक आणि सेक्सी असतील तर सोन्याहून पिवळे होईल. गरजेचे नाही की हे फोटो किंवा व्हिडिओ सर्वांसमोर पाहिले जावेत. यांना भविष्यातील त्या क्षणांसाठी सांभाळून ठेवता येईल, जेव्हा लग्नाच्या काही वर्षांनंतर आपसात मतभेद किंवा पती-पत्नीत वाद होतील. आपल्या फोटोग्राफरशी बोलून असे खासगी सेक्सी व्हिडिओ शूट करून घेता येईल.
