* गरिमा पंकज
दिवाळी सुरू होताच लोकांच्या मनात उत्साह, नवी उमेद जागी होते. अशावेळी प्रत्येक मुलीला असे वाटत असते की, आपला मेकअप खूपच विशेष असावा, ज्यामुळे ती इतरांहून वेगळी, सुंदर दिसेल. चला, एल्प्स ब्युटी क्लिनिक अँड अकॅडमीच्या संचालक भारती तनेजा यांच्याकडून माहिती करून घेऊया फेस्टिव्ह म्हणजे दिवाळी काळातील डीआयवाय टिप्स :
मेकअप प्रायमर
मेकअपची सुरुवात आपल्या त्वचेचे क्लिंजिंग आणि टोनिंग करून करा. दिवाळीच्या काळात दगदग वाढते. त्यामुळे घामही भरपूर येतो. त्यामुळे मेकअप वॉटरप्रुफ असणे गरजेचे आहे. म्हणूनच दिवाळी काळातील मेकअपसाठी तुम्ही वॉटरप्रुफ सौंदर्य प्रसाधनांचाच वापर करा.
त्वचेचे क्लिंजिंग आणि टोनिंग केल्यानंतर तुम्ही मेकअप सिरम किंवा प्रायमर (प्री बेस) लावा. त्यानंतर अतिशय सौम्य मेकअप बेस लावा, जेणेकरून संपूर्ण त्वचेचा पोत एकसमान दिसेल. मेकअप बेससाठी बाजारात अनेक प्रकारचे फाऊंडेशन उपलब्ध आहेत. ते त्वचेच्या रंगानुसार निवडता येतात. फाऊंडेशन हे तुमच्या त्वचेच्या रंगापेक्षा जास्त सौम्य किंवा जास्त गडद नसावे. त्याचे काही थेंब हाताच्या बोटांवर घेऊन ते ठिपक्यांप्रमाणे चेहऱ्यावर लावा. त्यानंतर ब्लेंडिंग स्पंज घेऊन ते चेहऱ्यावर व्यवस्थित पसरवा.
डोळयांचा उठावदार मेकअप
मेकअपचा बेस तयार केल्यानंतर वेळ येते ती डोळयांचा मेकअप करण्याची. दिवाळीत उठून दिसेल असा मेकअप बिनधास्तपणे करा, कारण दिवाळीत असाच उठावदार मेकअप खुलून दिसतो. काजळ, आयलायनर आणि आयशॅडोचा वापर करून डोळयांना जास्त सुंदर बनवा. डोळयांच्या आजूबाजूची काळी वर्तुळे लपविण्यासाठी कन्सिलरची आणखी एक गडद शेड लावा.
ज्या रंगाचे कपडे असतील त्याच रंगाचा आयशॅडो लावायला हवा असे मुळीच नाही. सौम्य शिमरी शॅडो प्रत्येक पेहराववर चांगला दिसतो. याव्यतिरिक्त तुम्ही नैसर्गिक तपकिरी, बेज आयशॅडोही लावू शकता. अशा आयशॅडोसह तुम्ही रंगीत लायनर लावू शकता. आयशॅडोच्या ब्रशने ते तुमच्या पापण्यांवर लावा आणि ब्लेंड करा. जर याहून अधिक आकर्षक दिसावे असे वाटत असेल तर एक गडद शेडशॅडो डोळयांच्या बाहेरील कडांपासून ते डोळयांच्या टोकंपर्यंत व्यवस्थित लावा.
कन्सिलर
मेकअप करताना चेहऱ्यावरील काळे डाग, सुरकुत्या त्रासदायक ठरतात. एका चांगल्या कन्सिलरच्या मदतीने डोळयांखालील काळी वर्तुळे किंवा सुरकुत्या लपविता येऊ शकतात. कन्सिलर डोळयांखाली त्रिकोणी आकारात लावा. यामुळे पाहणाऱ्यांचे लक्ष तुमच्या डोळयांवर केंद्रित होईल, शिवाय चेहराही उजळदार दिसेल. तुम्ही ओठांच्या कडांवरही कन्सिलर लावू शकता. ते लावल्यामुळे त्वचा एकसमान दिसते. कन्सिलर लावण्यापूर्वी चेहऱ्यावर जे डाग दिसत होते तेही दिसेनासे होतील.
हायलायटर
चेहरा जास्त आकर्षक दिसावा यासाठी तुम्ही एका चांगल्या हायलायटरचाही वापर करू शकता. चेहऱ्यावरील उठून दिणारे भाग जसे की, गालांचे उंचवटे, नाकाचा शेंडा, हनुवटीवर थोडेसे हायलायटर लावा. पण हो, तुम्हाला जर उन्हातून जायचे असेल तर याचा जरा जपूनच वापर करा.
ब्लशर
ब्लशरचा सौम्य वापर तुमच्या चेहऱ्याला मुलायम आणि उजळदार करेल. पण ब्लशर कधीच गालांच्या मधोमध लावू नका. ते गालांच्या वरच्या उंचवटयांवर लावा. यासाठी तुम्ही एका सोप्या पद्धतीचा वापर करू शकता. त्यासाठी ब्रशवर अगदी सौम्य ब्लश घ्या. ब्रश झटकून जास्त झालेला ब्लश झटकून टाका व त्यानंतरच ते लावा. आकर्षक मेकअपमुळे तुमच्या चेहऱ्यावरील हास्यही खुलून दिसेल.
