* सोमा घोष
‘कॉलेज डायरी’ या चित्रपटातून अभिनय क्षेत्रात पदार्पण करणारी मराठी अभिनेत्री म्हणजे प्रतिक्षा शिवणकर. ती गडचिरोलीची आहे. तिची आई भारती सुनील शिवणकर आणि वडील सुनील एकनाथ शिवणकर हे दोघेही शिक्षक असून कलाप्रेमी आहेत. त्यामुळेच त्यांनी मुलींना लहानपणापासूनच कलेच्या क्षेत्रात जाण्यासाठी प्रोत्साहन दिले. प्रतिक्षा शिवणकर सध्या आपल्या कुटुंबासोबत मुंबईत राहते. प्रतिक्षाचे लग्न नोव्हेंबर २०१९ मध्ये डॉ. अभिषेक साळुंके यांच्यासोबत थाटामाटात झाले. ते मूळचे बारामतीचे असून मुंबईत रेडिओलॉजिस्ट आहेत. प्रतिक्षाला अभिनयासोबतच नृत्याचीही प्रचंड आवड आहे. महाविद्यालयात असताना ती कायम सांस्कृतिक कार्यक्रमात भाग घ्यायची. अभिनयाची प्रचंड आवड तिला प्रशांत दामले यांच्या टी स्कूलपर्यंत घेऊन गेली. प्रशांत दामले यांच्या मार्गदर्शनाखाली तिने अभिनयाचे प्रशिक्षण घेतले.
सोनी मराठीवरील ‘जिवाची होतिया काहिली’ या मालिकेत प्रतिक्षा रेवतीची प्रमुख भूमिका साकारत आहे, ज्यामध्ये ती कन्नड कुटुंबातील मुलगी आहे. ही मुलगी घरात काहीही बोलायला घाबरते, पण बाहेर बिनधास्तपणे वागते.
लहानपणापासूनच प्रतिक्षाला कलेची प्रचंड आवड आहे, मात्र भविष्यात अभिनेत्री होऊ, असे तिला वाटले नव्हते. ही भूमिका तिच्या व्यक्तिगत आयुष्याशी मिळतीजुळती आहे, कारण ती घरात कोणाला काही बोलत नसली तरी बाहेर बिनधास्त राहाते. मालिकेतील रेवती हे पात्र बरेचशे प्रतिक्षासारखे आहे. या मालिकेसाठी प्रतिक्षाने बरेच ऑडिशन्स दिले होते. तिच्या अभिनयाला प्रेक्षकांची पसंती मिळत आहे. चित्रिकरणात व्यस्त असूनही प्रतिक्षाने वेळात वेळ काढून ‘गृहशोभिका’शी गप्पा मारल्या. त्यातील हा काही खास भाग :
तू अभिनय क्षेत्रात येण्याचा विचार कसा केलास?
माझ्या कुटुंबातील कोणीही अभिनय क्षेत्रातील नाही. माझे पालक शिक्षक आहेत. लहानपणापासूनच मी नृत्य शिकले. शाळेच्या कोणत्याही कार्यक्रमात मी माझ्या वडिलांनी लिहिलेल्या छोटया एकांकिका स्टेजवर सादर करायचे. माझे आई-वडील खूपच हौशी आहेत आणि त्यांनी मला लहानपणापासूनच क्रीडा, नृत्य, नाटक इत्यादींमध्ये भाग घेण्यासाठी प्रोत्साहन दिले. माझी लहान बहीणही खूप चांगली नृत्यांगना आहे.
तुला कुटुंबीयांचे किती सहकार्य मिळाले?
सुरुवातीला माझ्या आई-वडिलांना आश्चर्याचा धक्का बसला, पण हळूहळू त्यांनी माझी इच्छा समजून घेतली. माझे आजोबाही शिक्षक होते, त्यामुळे हे क्षेत्र समजून घेणे त्यांच्यासाठी अवघड होते, कारण त्यांना वाटत होते की, मी चुकीचे काहीतरी बोलत आहे. नंतर सर्वांनीच सहकार्य केले. आता मी मराठी मालिकेसह ‘एका लग्नाची पुढची गोष्ट’ या नाटकातही आहे. तिथे मला पहिला ब्रेक मिळाला तेव्हा माझे घरचेही आनंदी झाले, कारण मी प्रशांत दामले यांच्या नाटकात काम करणार होते. अशा महान दिग्दर्शकासोबत नाटकाच्या माध्यमातून अभिनयाचे थेट सादरीकरण करणे माझ्यासाठी खूप मोठी गोष्ट आहे.
तूला पहिला ब्रेक कधी मिळाला?
मला ‘कॉलेज डायरी’तून ब्रेक मिळाला. त्यानंतर ‘एका लग्नाची पुढची गोष्ट’ या नाटकातून मला खूप मोठा ब्रेक मिळाला. यात खूप मोठमोठे कलाकार आहेत आणि मला त्यांच्यासोबत काम करण्याची संधी मिळाली. खूप काही शिकायला मिळाले. त्यानंतर मला मालिका मिळाली. त्यासाठी मी अनेक ऑडिशन्स दिल्या.
तूला किती संघर्ष करावा लागला?
संघर्ष करावाच लागतो, पण मला तो जास्त करावा लागला नाही, कारण जेव्हा मी नाटकात काम करत होते, त्यावेळी माझ्याकडे अनेक मालिकाही होत्या. त्यामुळे त्यावर लक्ष केंद्रित केले होते. मला मालिका शोधण्याची गरज भासली नाही. त्यामुळे मला जास्त संघर्ष करावा लागला नाही.
डॉ. अभिषेक साळुंके यांना तू कशी भेटलीस?
हे एक अॅरेज्ड कम लव्ह मॅरेज आहे. मी २०१७ मध्ये प्रशांत दामले यांच्या पुण्यातील टी स्कूलमध्ये अभिनयाचे प्रशिक्षण घेण्यासाठी गेले होते. तिथे अभिनय, गाणे आणि नृत्य शिकवले जायचे. तिथे अभिषेकही गाण्यासाठी आला होता. तेथेच आमची ओळख झाली. त्याच दरम्यान मी एका नाटकाच्या निमित्ताने अमेरिकेत गेले. तिथून आल्यावर अभिषेकने मला लग्नासाठी मागणी घातली. आम्हाला फिरायला जाण्याची फारशी संधी मिळाली नाही, कारण ६ महिन्यांतच आमचे लग्न झाले.
तुला लग्नानंतर अभिनयाच्या क्षेत्रात काम करताना काही अडचणी आल्या का?
ज्याप्रमाणे माझ्या घरातील कोणी अभिनय करत नाही, त्याचप्रमाणे अभिषेकच्या घरातही कोणी अभिनय क्षेत्रात नाही. त्यामुळेच त्याला माझा अभिमान असून माझा गर्व वाटतो. माझी प्रत्येक मालिका तो आवडीने पाहातो आणि नातेवाईकांनाही मालिका पाहाण्यास सांगतो.
हिंदी मालिका, वेब सिरीज, चित्रपटांमध्ये काम करण्याची तुझी इच्छा आहे का? एखादे स्वप्न आहे का?
हिंदीबाबत अजून विचार केलेला नाही, कारण मी एकावेळी एकच काम करते, जेणेकरून त्या कामाकडे शंभर टक्के लक्ष देऊ शकेन. हिंदीतली एखादी चांगली स्क्रिप्ट आली तर मला आवडेल. रणवीर सिंहसोबत एखादा हिंदी चित्रपट करायला मिळाला तर मला खूप आवडेल. त्याला पाहताच मी एकतर जोरजोरात उडया मारायला किंवा रडायला लागेन.
पावसाळयात तू त्वचेची आणि केसांची काळजी कशी घेतेस?
मला जेव्हा सुट्टी मिळते तेव्हा मी त्वचेला आणि केसांना दही लावते. याशिवाय बेसन, हळद आणि त्यात दूध मिसळून पेस्ट तयार करून ती चेहऱ्याला लावते. भरपूर पाणी पिऊन स्वत:ला हायड्रेट ठेवते. हायड्रेशन सीरमही लावते.
तू किती खवय्यी आणि फॅशनेबल आहेस?
मला खायला प्रचंड आवडते. चायनीज, मेक्सिकन, पंजाबी, दक्षिण भारतीय, महाराष्ट्रीयन पद्धतीने केलेले मासे, चिकन खूप आवडतात. आईने बनवलेली डाळ-खिचडी खूपच आवडते. फॅशन मला आवडते. मी स्वत: पुरणपोळी आणि वडापाव चांगला बनवते. मला पारंपरिक लुक जास्त आवडतो. साडी आणि पंजाबी ड्रेस आवडतात. मला नृत्यही फार आवडते, पण वेळेअभावी मी ते फारच कमी करते. मी कथ्थक शिकायचा खूप प्रयत्न केला, पण वेळ मिळत नाही.
आवडता रंग – काळा.
आवडता पेहेराव – पारंपरिक, पंजाबी ड्रेस आणि साडी.
आवडते पुस्तक – ययाती.
आवडता परफ्यूम – अत्तर.
आवडते पर्यटन स्थळ – देशात केरळ आणि विदेशात अमेरिकेतील सेन हौजे.
वेळ मिळाल्यावर – झोपणे आणि स्वयंपाक बनवणे.
जीवनातील आदर्श – माझ्यामुळे कोणी दुखावले जाऊ नये.
सामाजिक कार्य – वृद्धाश्रम आणि अनाथाश्रम एकत्र उघडणे.
ड्रीम प्रोजेक्ट – स्पोर्ट्स परसन आणि शिवाजी महाराजांच्या पहिल्या पत्नीचे बायोपिक.