⚲

अनपेक्षित भेटवस्तू जिंकेल मन

* सोमा घोष

सुभाष आणि स्नेहाचं लग्न होऊन ८ वर्षं झाली. त्यांच्या जीवनात असे अनेक प्रसंग आले की, ज्यावेळी त्यांनी एकमेकांना अनपेक्षितपणे भेटवस्तू देऊन आश्चर्यचकित केलं होतं. ते दिवस अजूनही त्यांना आठवतात. सुभाषला तो दिवस अजून आठवतो, ज्यावेळी त्याच्याजवळ त्याच्या नातेवाइकाच्या लग्नाला जाण्यासाठी नवे कपडे घेण्यासाठी पैसे नव्हते. सुभाषने निराश होऊन जुने कपडेच घालून जाण्याचं मनात ठरविलं होतं. परंतु लग्नाचा दिवस जवळ आल्यावर स्नेहाने आपल्या जमवलेल्या पैशांतून त्याच्यासाठी नवे कपडे खरेदी केले व त्याला भेट दिले. हे सुभाषला अनपेक्षित होतं व ही गोष्ट आजही आठवल्यानंतर सुभाषच्या डोळ्यांत पाणी येतं. अशी अनपेक्षित भेटवस्तू परस्परांतील प्रेम द्विगुणित करते. भेटवस्तू देणाऱ्यात व घेणाऱ्यात एक प्रकारचा नवा उत्साह संचारतो आणि एकमेकांतील स्नेहबंध अधिकच दृढ बनतात.

भेटवस्तू देणंघेणं

भेटवस्तू देण्याघेण्यामुळे आपल्या जीवनात अधिक आनंद येतो. आपापसांतील नाती दृढ होण्यामध्ये तिची प्रमुख भूमिका असते. भेटवस्तू एकमेकांविषयीचं प्रेम, आदर व सद्भावना व्यक्त करतात. त्यातसुद्धा जर अनपेक्षित भेटवस्तू मिळाली तर मिळणाऱ्या आनंदाचं वर्णन काय करावं? कारण यामुळे व्यक्तिला अपूर्व सुख मिळतं. रंगमंचांवर काम करणारी मंजुळा म्हणते, ‘‘माझ्या पतीकडून मला नेहमीच अनपेक्षित भेटवस्तू मिळाली आहे, जिचं मोल माझ्या दृष्टीने खूपच अधिक आहे. कारण यावरूनच त्यांची माझ्याविषयीची आत्मीयता दिसून येते.’’

तुम्हाला तुमचा पती जर अनपेक्षित भेटवस्तू देत असेल तर त्याचा अर्थ स्पष्ट आहे की, तुम्ही तुमच्या पतीला मनापासून आवडता.

उद्योजिका लीना सांगते, ‘‘लग्नाच्या पहिल्या वाढदिवसाला मला माझ्या पतीने ज्वेलरीच्या दुकानात नेऊन एक सोन्याचं ब्रेसलेट खरेदी केलं, पण त्याची ऑर्डर त्यांनी आधीच नोंदविली होती. त्यावेळी मी आश्चर्यचकित झाले. मला असं वाटतं की, अनपेक्षित भेटवस्तू देऊन तुम्ही आपल्या रागावलेल्या जोडीदाराला मनवू शकता किंवा जोडीदाराचा गैरसमजही दूर करू शकता.

भेटवस्तू निवडताना

एका पाहाणीत दिसून आलं की, अनपेक्षित भेटवस्तू केवळ एक साधी वस्तू नसते, तर तुमच्याबद्दल वाटणाऱ्या आत्मीयतेचं ते प्रतीक असतं. परंतु तुम्ही जेव्हा जोडीदाराला अनपेक्षित भेटवस्तू द्याल त्यावेळी पक्कं लक्षात घ्या की, ती वस्तू त्याच्या उपयोगाची आहे की नाही व तुम्हा दोघांची अधिक जवळीक त्याने साधेल की नाही?

काही वेळेला अगदी विचार करून दिलेली वस्तूसुद्धा त्यावेळी तुमच्या जोडीदारास जरुरीची वाटत नाही अथवा त्याला ती तितकीशी पसंत पडत नाही. अशा वेळी तुमचे पैसेही अनाठायी खर्च होतात व जोडीदारास वस्तूही आवडत नाही. यासाठी जोडीदाराच्या आवडीनिवडीकडे नीट लक्ष द्या.

अनपेक्षित भेटवस्तूमध्ये किमतीला तितकंसं महत्त्व नसतं. फक्त प्रेम व आत्मीयतेला महत्त्व असतं म्हणून गिफ्ट खरेदी करणाऱ्याला गिफ्ट घेताना पूर्ण उत्साहाने खरेदी करावी लागते आणि हेसुद्धा दर्शवायला हवं की ही भेटवस्तू त्याच्या दृष्टीने कशी अनमोल आहे.

एका कंपनीत काम करणाऱ्या पूनमला तिचा पती ती प्रत्येक वेळी रागावल्यानंतर अनपेक्षित भेटवस्तू देऊनच खूष करतो.

भेटवस्तू अनमोल आहे हेच खरं. पण कोणती भेटवस्तू व त्याची निवड कशा तऱ्हेने करावी हे जाणून घ्यायला हवं. जेव्हा तुम्ही एखादी भेटवस्तू जोडीदाराला देता तेव्हा त्याची प्रतिक्रिया तुम्हाला लगेचच दिसून येते. यामुळे आपला जोडीदार पती असो अथवा पत्नी तिची अथवा त्याची पसंती वा नापसंती जाणून घेण्याचा प्रयत्न केला पाहिजे व त्यानुसारच भेटवस्तूची निवड केली पाहिजे.

काही अनपेक्षित भेटवस्तू

* फोटो अल्बम : जोडीदाराच्या बालपणीच्या फोटोंसह, मित्रमैत्रिणींबरोबरचे फोटो (एखाद्या घटनेशी संबंधित) अशा तऱ्हेने एकत्र केलेले फोटो लावलेला अल्बम.

* ग्रीटिंग कार्ड : जे तुम्ही स्वत: बनवलेलं अथवा खरेदी केलेलं असेल. त्यामध्ये चांगलं चित्रसुद्धा तुम्ही लावू शकता.

* सोन्याचांदीच्या वस्तू तर सर्वांनाच आवडतात. परंतु जोडीदाराच्या आवडीनिवडीकडे विशेष लक्ष पुरवून त्यांची खरेदी करावी.

* प्रवासाचं ट्रॅव्हल वाउचर.

* जरुरीचं सामान, रेसिपी बुक, पुस्तकं, घरसजावटीच्या वस्तू किंवा काही अशा वस्तू ज्याची अपेक्षा तुमच्या जोडीदाराने कधीच केली नसेल. सरळच आहे की, त्यायोगे तो अगदी संतुष्ट होईल व त्याचा अंशत: फायदा तुम्हालाही मिळेल.

जेव्हा भेटवस्तू द्यायची असेल

* एखादं नवपरिणीत जोडपं एखाद्या नव्या शहरात जाणार असेल तर त्यांना त्यांच्या नव्या घरासाठी उपयुक्त वस्तू जशा की, टीव्ही, फ्रिज, मायक्रोवेव, इस्त्री, फूड प्रोसेसर याप्रमाणे गृहोपयोगी उपकरणं भेटवस्तू म्हणून देऊ शकता.

* फर्नीचरसुद्धा एक उत्तम भेटवस्तू होऊ शकते. त्यांच्या घरासाठी डायनिंग सेट, सोफा सेट इत्यादी सामान देऊ शकता. त्यांचं घर किती मोठं आहे याचा विचार करूनच निर्णय घ्या.

* क्रॉकरी व कटलरीसुद्धा नवदाम्पत्यांसाठी चांगल्या भेटवस्तू होऊ शकतात.

* नवदाम्पत्यांसाठी काही वेगळं म्हणून, घड्याळ, परफ्यूमसुद्धा देऊ शकता.

* याव्यतिरिक्त सजावट म्हणून काचेच्या वस्तू, अॅण्टिकपीस, ऑइलपेंटिंग, नाइट लॅम्प, फोटोफ्रेम इत्यादी भेटवस्तूंचासुद्धा तुम्ही विचार करू शकता.

* प्रवासी सामान नवदाम्पत्यांसाठी चांगली भेटवस्तू होऊ शकते. कित्येक प्रकारच्या सूटकेसेस, व्हॅनिटी केस यामधून तुम्ही निवड करू शकता.

* ब्लँकेट, ब्रेडशीट इत्यादी वस्तूसुद्धा भेट म्हणून देऊ शकता. हवामानानुसार या वस्तूसुद्धा योग्य वेळी देऊ शकता.

मास्क ब्युटीचा नवा ट्रेंड

– रितु वर्मा

तब्बल दोन महिन्यांनी भावना ऑफिसमध्ये गेली होती. पण तिला स्वत:ला तिचा चेहरा एखाद्या कार्टूनप्रमाणे वाटत होता. भावनाला वाटले की जर आता मास्कच लावून राहायचे आहे तर मेकअपची काय गरज आहे? तिने असा विचार करून आपले केस विंचरले, मास्क लावला आणि निघाली. ऑफिसमध्ये प्रत्येकजण तिला विचारत होते, ‘‘अरे काय झाले, एवढी उदास का वाटते आहेस?’’ भावनाला समजात नव्हते की हे असे का विचारत आहेत?

जेव्हा तिने घरी येऊन मास्क काढला, तेव्हा तिला कळले की ते बरोबर म्हणत होते. असे वाटत होते जणूकाही चेहऱ्यावर शोककळा पसरली आहे. भावनाला कळत नव्हते की या अशा दु:खी चेहऱ्याने ती छान कशी दिसेल?

रविताचे प्रकरण वेगळेच आहे. लॉकडाऊन सुरु होता, वेतन कपात सुरु झाली. रविताच्या डोक्यात भूत शिरले होते की कशाप्रकारे बचत करायची. म्हणून तिने स्वस्त दराचे मास्क खरेदी करून बचत करून फायदा मिळवला. मास्क लावूनच राहायचे आहे तर काय गरज आहे लिपस्टिक, सनस्क्रिन वा अन्य प्रसाधनांची. एका आठवडयाच्या आत रविताच्या चेहऱ्यावर अॅलर्जी व काळे चट्टे उमटले. जेव्हा रविता डॉक्टरकडे गेली, तेव्हा कळले की मास्कच्या मटेरिअलमुळे चेहऱ्यावर अॅलर्जी आली आणि सनस्क्रिन न लावल्याने काळे चट्टे उमटले.

लॉकडाऊन उठत आहे आणि यासोबत ऑफिसही सुरु होऊ लागले आहे. जर तुम्ही बाहेर जात असाल तर मास्क लावणे अनिवार्य झाले आहे. पण याचा अर्थ हा नाही की मास्क तुमच्या सौंदर्याच्या मधला अडथळा आहे. जर आपण लहानसहान गोष्टींकडे लक्ष दिले तर तुम्ही मास्क ब्युटीचा नवा ट्रेंड सुरु करू शकता.

रंगीबेरंगी मास्क

बाजारात २० रुपयांपासून ते ४५० रुपयांपर्यंत मास्क उपलब्ध आहेत. पण रोज रोज एकच मास्क लावणे महिलांना डल व कंटाळवाणे वाटते. तुम्ही काही रंगीबेरंगी मास्क आरामात घरातच बनवू शकता. प्रत्येक दिवसासाठी एक नवीन मास्क. घरात तुमच्या पडलेल्या जुन्या टीशर्टच्या बाह्यांपासून तुम्ही अतिशय सहजतेने मास्क बनवू शकता. सुती जयपुरी दुपट्टयांपासूनसुद्धा तुम्ही मनाजोगते मास्क बनवू शकता. पण मास्क बनवताना हे अवश्य लक्षात ठेवा. कापडाचा दर्जा मऊ आणि रंग पक्का असावा. मास्क तुमच्या चेहऱ्यावर एक नवे तेज आणतील.

अॅक्सेसरीजकडे दुर्लक्ष करू नका

मोकळया केसांवर मास्क लावल्यास केस खूपच वाईट दिसतात. तसेही नंतर तुम्ही स्पा वा कॅराटिन करू शकणार नाही. म्हणून केसांचा पोनीटेल बांधून मास्क लावा. मास्कच्या रंगाला मिळत्या जुळत्या अॅक्सेसरीज तुम्हाला एक वेगळाच लूक प्रदान करतील.

डोळयांना एक वेगळीच परिभाषा द्या

आता जोवर चेहऱ्यावर मास्क राहील तोवर सगळे काम डोळयांनीच करावे लागेल. चांगल्या कंपनीच्या वॉटरप्रुफ लायनरने आपल्या डोळयांचे सौंदर्य वृद्धिंगत करा. उष्ण हवामान असल्याने काजळ वापरणे टाळा. आयब्रोजना घरीच कात्री व प्लकरने आकार द्या. लक्षात ठेवा डोळयांभोवती जमा झालेले जंगल कोणालाही आकर्षक वाटत नाही.

ओठांकडेसुद्धा लक्ष द्या

मास्क लावलेला असल्याने लिपस्टिक लावणे टाळले तरी चालेल, पण ओठांची काळजी घेणे नाही. रोज रात्री ओठांवर ग्लिसरीन अवश्य लावा. मास्क लावण्याआधी ओठांवर न्यूड लीपबाम अवश्य लावा. हे ओठांच्या आरोग्यासाठी आवश्यक आहे.

सनस्क्रीनशी मैत्री कायम ठेवा

सनस्क्रिन न लावता घरातून चुकूनही बाहेर निघू नका. मास्क केवळ कोरोना व्हायरसपासून आपले रक्षण करेल, सूर्याच्या किरणांपासून नाही.

अशाच काही लहान सहान टीप्स अवलंबून तुम्ही मास्कच्याबाबतीत एक नवा ब्युटी ट्रेंड आणू शकता.

ऑफिसवेअरमध्ये करू नका या चूका

– मोनिका गुप्ता

कुठला उत्सव असो किंवा घरात कुठले फंक्शन, महिला आपण सर्वांमध्ये उठावदार दिसावं यासाठी प्रयत्नरत असतात. यावरून स्पष्ट कळतं की प्रत्येक महिलेला नटणेथटणे छान जमते. लग्नसमारंभ किंवा घरातील इतर कार्यक्रमात बऱ्याचदा महिलांकडे विचार करण्याचा वेळ असतो आणि त्याचा व्यवस्थित उपयोग करून त्या स्वत:ला परफेक्ट लूकमध्ये दर्शवतात.

आज बऱ्याच महिला नोकरदार आहेत. नोकरदार असल्यामुळे घर आणि ऑफिस यात त्या एवढया व्यस्त होऊन जातात की आपल्या वेषभूषेकडे योग्यप्रकारे लक्ष्य देऊ शकत नाहीत. दुसरीकडे अशाही काही महिला असतात, ज्या ऑफिसला थोड्या जास्तच सजूनधजून जातात. महिलांना फॅशनचे ज्ञान तर असते, परंतु ते योग्यप्रकारे कॅरी कसे करायचे, यांत अधिकतर महिला कन्फ्यूज असतात. अशास्थितीत एकीकडे काही महिला अगदी सिंपल लुकमध्ये ऑफिस जाणे पसंत करतात तर दुसरीकडे काही महिला भडक रंगाचे कपडे आणि किंमती दागिने घालूनही ऑफिसला जातात.

नोकरदार महिलांसाठी त्यांची वेशभूषा खूप महत्वाची असते. एका नोकरदार महिलेसाठी वेशभूषा अशी असावी, जी कामात बाधा बनू नये आणि जवळपासच्या लोकांवरही चांगला प्रभाव टाकू शकेल. सादर आहेत काही टीप्स :

व्यावसायिकासारखी असावी वेशभूषा
जर आपण आपल्या करिअरबद्दल गंभीर असाल तर आपण फॅशनेबल दिसण्याऐवजी व्यावसायिक दिसण्याचा प्रयत्न करा. आजकाल लोक कामाबरोबरच आपल्या बोलण्याच्या अंदाजावर व वेषभूषेवरही लक्ष्य देतात. म्हणून नोकरदार महिलांना ऑफिसात स्वत:ला व्यवस्थितपणे सादर करणे खूप गरजेचे आहे. ऑफिसला जाताना आपल्या वेषभूषेवर अवश्य लक्ष्य द्या. जास्त भडक रंग, अधिक दागिने व चमकणारे कपडे आपल्या प्रतिमेला बिगडवू शकतात. जर आपला ड्रेस अनुकूल असेल तर याचा आपल्या कामावर प्रभाव पडतो. आपल्या ऑफिसात आपले सहयोगी आपल्या ड्रेसवर चर्चा करू लागतात, ज्यामुळे आपले कामात लक्ष्य लागत नाही. काही काळापूर्वी महिला सुटसलवार व साडी घालून कामावर जात असत. परंतु आता त्या खूप स्मार्ट झाल्या आहेत. आजच्या नोकरदार महिलांनी ट्राऊजर, शर्टसारखी वेशभूषा स्वीकारली आहे. आता अधिकतर महिलांच्या वार्डरोबमध्ये सूट, साडी कम फॉर्मल जास्त दिसून येत आहेत.

जेव्हा मिटिंग असेल
जर ऑफिसात एखादी मिटिंग असेल तर अशा स्थितीत आपण साडीकडे दुर्लक्ष्य करून ट्राऊजर, फॉर्मल शर्ट वा टॉप घालून जावे, साडी सांभाळण्यापेक्षा जास्त कर्म्टेबल फॉर्मल ड्रेस आहे. यामुळे आपले लक्ष्य विचलित होणार नाही आणि एकाग्रता टिकून राहील.

पेहराव असा, जो आराम देईल
असं बऱ्याच वेळा होतं की आपण ऑफिसात असा ड्रेस घालून जाता, ज्यामुळे पूर्ण दिवस आपण कंफर्ट फील करत नाहीत. म्हणून कपडे असे निवडा, जे आवश्यकतेपेक्षा जास्त टाइट नसावेत. नेहमी टाइट कपडयांत आपण कामापेक्षा जास्त कपडयांवर लक्ष्य देतो. अधिक फॅशनेबल कपडे घालू नयेत, जे कुठून कापलेल्या डिजाइनवाले किंवा गरजेपेक्षा जास्त शॉर्ट असतील.

ऑफिससाठी कुर्ती वा सूट खूप सिंपल घ्या. हे जास्त द्ब्रागमगीत नसावे. आपण ब्लॅक किंवा सफेद कुर्तीबरोबर रंगबेरंगी दुपट्टा कॅरी करू शकता. जर कुर्ती बुटिकमध्ये शिवून घालणार असाल तर जास्त डिपनेक घेऊ नये आणि ना ही जास्त डिपबॅकही घेऊ नये. कुर्तीची डिजाइन जेवढी सिंपल असेल ऑफिस लुकसाठी तेवढेच चांगले असेल.

कंफर्टच ट्रेंड आहे
नोकरदार महिलांसाठी कंफर्ट ट्रेंड आहे. फॅशन डिझाइनर अंजली बेदीचे म्हणणे आहे, ‘‘वर्किंग महिलांनी फॅशनपेक्षा जास्त कंफर्ट लेव्हल बघितली पाहिजे. जर आपण आपल्या ड्रेसमध्ये कंफर्ट आहात तर आपल्याला स्वत: चांगले फील होऊ लागते आणि आपण जास्तीत जास्त वेळ आपल्या कामाला देऊ शकता. ऑफिससाठी नेहमी फॉर्मल लुकच ठेवला पाहिजे. वाटल्यास आपण डार्क ब्लू जीन्सबरोबर व्हाईट शर्ट घालू शकता. ब्राउन ट्राऊजरबरोबरसुद्धा व्हाईट शर्ट मॅच होऊ शकते. फिटेड पँट बरोबर टीशर्ट घालू शकता. स्ट्रेट स्कर्टसोबत  सेमी फॉर्मल टॉप कॅरी करू शकता.’’

कंफर्टच्सोबत स्टाइलही आवश्यक
नोकरदार महिलांना कंफर्टबरोबरच स्टाईलची काळजी घ्यावी लागते. नेहमी असा ड्रेस घाला, जो ना अधिक एक्सपोज करणारा असेल वा ना अधिक टे्डिशनल लूक देणारा असेल. ड्रेस प्रॉपर इस्त्री केलेला असावा. त्याच्यावर चुण्या पडलेल्या असू नयेत. असं वाटायला नको की आपण तो बळजबरीने घातले आहे. योग्य पेहराव आपल्या व्यक्तिमत्वाला दर्शवितो. जर आपणास ज्वेलरी घालणे पसंत असेल तर कानातील सिंपल रिंग घालू शकता किंवा गळयात सिंपलसे लॉकेट घालू शकता.

एक तास फक्त स्वत:साठी

– अमरजीत साहिवाल

एका प्रसिद्ध लेखकाच्या मते तुम्ही कितीही व्यस्त असलात तरी २४ तासांपैकी जर १ तासही स्वत:साठी काढू शकला नाहीत तर तुमच्याकडे काय राहील? रुक्ष हात, वाढलेली नखे, कोमेजलेला चेहरा, ना टिकली, ना काजळ.

आपण स्त्रिया दिवसभरातून आपल्यासाठी एखादा तास तर नक्कीच काढू शकतो. जिथे मंद संगीताचा स्वर, गझलचा आनंद किंवा शेरोशायरी असेल, थोडेसे लोळणे असेल, हातापायांची मालीश असेल, फोनवर गप्पा मारणे असेल किंवा मग थोडेसे वाचन. फक्त हा वेळ केवळ तुमचा आणि तुमचाच असायला हवा.

सीमाला हे पाहून खूप आश्चर्य वाटले की रात्री १२ वाजता परदेशात राहून तिने जो मेसेज तिच्या वहिनीला पाठवला, तिने त्याला त्वरित उत्तर दिले. तिला आश्चर्य यासाठी वाटले की ती स्वत: घरकाम करते आणि नोकरीलाही जाते. मग तिला माझ्या मेसेजचे उत्तर द्यायला वेळ कसा मिळाला? विचारल्यावर समजले की कामावर जाण्यापूर्वी तिने १५-२० मिनिटांचा वेळ इ मेल, फेसबूकसाठी राखून ठेवला आहे, जेणेकरून काही क्षण आपल्या आवडीचे काम म्हणजे मित्रमैत्रिणींना हायहॅलो करून ऑफिसला फ्रेश होऊन जाता येईल आणि अधिक चांगल्याप्रकारे काम करता येईल.

कुल्लू खोऱ्यात राहणाऱ्या रीनाला एक दिवस आपल्या मैत्रिणीसोबत व्यास नदी किनारी घालविण्याची संधी मिळाली. हवेत हलकासा गारवा होता. सुंदर सजवलेला चहाचा ट्रे घेऊन कमलाबाई आल्या. सोबतच दुसऱ्या ट्रेमध्ये आरसा, नेलकटर, कॉटन बड्स आदी वस्तूही होत्या.

रीनाने हसतच विचारले, ‘‘सकाळी सकाळी चहासोबत ब्युटी ट्रीटमेंटचाही प्रोग्रॅम आहे का?’’

बाई नम्र स्वरात म्हणाल्या, ‘‘होय, चहाचा घोट घेण्यापूर्वी १० मिनिटे आपल्या शरीरासाठी दिली तर त्यात काय वाईट आहे? तुम्ही काहीच करत नाही का? आमच्या उषा मॅडम तर रोज सकाळी १५-२० मिनिटे याच कामासाठी देतात. या वेळेत त्या अंडे, मधाचा लेप लावतात. फेशियलही होते आणि चहा पिण्याचा आनंदही घेता येतो. त्यानंतर नदी किनारी दगडावर बसून पाण्यात पाय सोडून आरामही करतात आणि थंड पाण्यात चेहराही धुतात.’’

आता रीनाला आपल्या मैत्रिणीच्या उषाच्या तजेलदार त्वचेचे रहस्य समजले.

हे वाचल्यानंतर कदाचित तुम्हाला नवीन काहीच वाटणार नाही. प्रत्येकाला माहीत असते की आपण स्वत:साठी थोडा वेळ नक्की काढायला हवा, पण अनेकदा इतर काय म्हणतील, असा विचार आपण करतो. हिला पाहा, घरसंसार, कामकाज सोडून स्वत:साठी वेळ काढून खोली बंद करून बसली आहे.

पण कोणी काहीही म्हटले म्हणून काय झाले? नैराश्यग्रस्त होण्यापेक्षा, तणावात राहण्यापेक्षा थोडा वेळ स्वत:साठी काढणे कधीही चांगले. ‘‘कल करे सो आज कर, आज करे सो अब’’ हे लक्षात ठेवूनच वागा :

झोपायला जा

नोकरदार स्त्री असो किंवा गृहिणी, अनेकदा झोप पूर्ण होत नसल्याची तिची तक्रार असते. यामागचे कारण असते ते मुले, रात्री उशिरा होणारे जेवण, ऑफिसची ड्युटी किंवा घरातील ज्येष्ठांना हवे नको ते पाहणे. जेव्हा तुम्हाला थोडा वेळ मिळेल तेव्हा लगेच झोपायला जा किंवा सोफ्यावरच थोडी विश्रांती घ्या. एका डुलकीमुळे बरेच ताजेतवाने वाटेल, मग पुन्हा कामाला लागा.

शॉपिंगची यादी बनवा

बऱ्याचदा स्वयंपाकघरात किंवा घरी काम करत असताना अचानक असे लक्षात येते की अमुक एक सामान संपले आहे. तेव्हा पती किंवा मुलांना त्वरित ते सामान आणण्यासाठी विनंती करणे भाग पडते. म्हणून वेळ मिळाला की काळजीपूर्वक खरेदीची यादी बनवा. असे केल्याने केवळ वेळच वाचणार नाही तर पैशांचीही बचत होईल.

आवडी पूर्ण करा

प्रत्येकाला काही ना काही आवड असतेच. पण काही असे घडते की छंद जोपासता येत नाही. अशावेळी स्वत:लाच दुषणे दिली जातात. परिस्थितीला दोष देत स्वत:ची समजूत काढली जाते. पण असे करू नका. स्वत:साठी काढलेल्या त्या एका तासात छंदाला वेळ देण्याचा प्रयत्न करा. उदाहरणार्थ तुम्हाला पुस्तक, मासिके, वृत्तपत्रातील काही चांगल्या विचारांची कात्रणे कापून संग्रहित करायला आवडत असतील तर त्यासाठी वेळ द्या. डायरी फक्त याच कामासाठी वापरा. म्हणजे वाढदिवस, मॅसेज अॅनिव्हर्सरीसाठी कुणाला शुभेच्छा द्यायच्या असल्यास आपल्या हाताने छानसे कार्ड बनवून त्यावर ते सुंदर विचार तुम्ही लिहू शकता. म्हणजे आपल्या आवडीनुसार आपला वेळ असा घालवा, जेणेकरून काहीही कंटाळवाणे वाटणार नाही, फक्त आनंद मिळेल.

स्वप्न पाहा

होय, उघडया डोळयांनी स्वप्न पाहा. हा हक्क सर्वांना आहे. झिरो फिगरची अभिनेत्री करिना कपूर ९० किलो वजन कमी करू शकते तर तुम्ही आणि आम्ही का नाही? गरज आहे ती फक्त दृढनिश्चयाची. तुम्हीही स्वत:ला वेळ द्या.

सुसंवाद कायम ठेवा

मित्र, मैत्रीण, वहिनी, नणंद किंवा जवळच्या नातेवाईकांसह संबंध बिघडले असतील तर स्वत:साठी राखून ठेवलेल्या त्या तासाभरातील काही वेळ हे संबंध सुधारण्यासाठी द्या. फोन करा, मेसेज पाठवा, ई-मेल, व्हॉट्सअप करा किंवा सोशल मिडियाचा वापर करा. फक्त प्रयत्न एवढेच असायला हवेत की तुम्ही संबंधात गोडवा आणून त्यांना सुंदर करायला हवे.

पुढील दिवसाचे प्लॅनिंग करा

कामाला जात असाल, कामातील क्षमता वाढवायची असेल तर दुसऱ्या दिवसाचे शेड्युल चेक करा. ते अपडेट करा. त्यावर फोकस करा. कामाचा प्राधान्यक्रम ठरवा. हे सर्व नियोजनबद्धरित्या करण्यासाठी स्वत:साठी वेळ काढायलाच हवा. २४ तासांतील काही क्षण स्वत:साठीही राखून ठेवा. प्रयत्न करून पाहा. कामाचा दर्जा पहिल्यापेक्षा उत्तम होईल.

दिसण्याकडे लक्ष द्या

काहीही घालण्यापेक्षा किंवा कपडयांसोबत मॅचिंग ज्वेलरी मग ती कॉस्च्युम ज्वेलरी का असेना, चप्पल, स्कार्फ योग्य पद्धतीने घातल्याने थोडा नाही तर बराच फरक पडतो. तुम्ही नोकरदार असाल तर याकडे लक्ष देणे जास्तच गरजेचे आहे. रिकाम्या वेळेत ज्वेलरी बॉक्स चेक करत राहा. काही तुटले असेल तर त्याकडे लक्ष द्या. मॅचिंग क्लिप्स, पिना, हेअर अॅक्सेसरीज अधुनमधून नीट लावून ठेवा. उद्या जे घालणार आहात, त्याची तयारी आधीच रिकाम्या वेळेत अवश्य करून ठेवा. यामुळे तुमचे व्यक्तिमत्त्व खुलून दिसण्यासोबतच तुमचा आत्मविश्वासही वाढेल, ज्यामुळे तुमचे कामही अधिक चांगले होईल.

कामावर, घरी, घराबाहेर तुमचे, तुमच्या सुंदर व्यक्तिमत्त्वाचे कौतुक होईल, त्यावेळी मोकळया वेळेत आरामात खुर्चीवर टेकून गुलाबजल टाकलेल्या पाण्यात पाय बुडवून निवांत बसल्याचा आंनद याची जाणीव करून देईल की तो १ तास स्वत:साठी खूप छान असतो.

अनलिमिटेड कहानियां-आर्टिकल पढ़ने के लिएसब्सक्राइब करें