*प्रतिनिधी
मँगो कोल्ड सूप
साहित्य
* २ आंबे
* अर्धा छोटा चमचा जलजीरा
* ६० ग्रॅम दही
* १ मोठा चमचा लोणी
* पाव छोटा चमचा पांढरी मिरीपूड
* शेव इच्छेनुसार
* १ मोठा चमचा क्रीम
* अर्धा छोटा चमचा गुलाबपाणी
* मीठ व साखर चवीनुसार.
कृती
आंब्याचा गर काढून घ्या. मिक्सरमध्ये आंब्याचा गर, दही, साखर, मीठ, जरजीरा, काळीमिरी पूड, गुलाबपाणी व क्रीम घालून मिक्समधून फिरवून घ्या. कढईत लोणी गरम करून त्यात हे तयार मिश्रण ओतून शिजवून घ्या. फ्रिजमध्ये थंड करून मँगो कोल्ड सूपवर आंब्यांचे तुकडे, जलजीरा पावडर, शेव व क्रीम घालून सर्व्ह करा.
मँगो भल्ले
साहित्य
* २ आंबे
* १०० ग्रॅम मूगाची डाळ
* अर्धा छोटा चमचा आले किसलेले
* २०० ग्रॅम दही
* १ मोठा चमचा चिंचेची चटणी
* १०० ग्रॅम तेल
* अर्धा छोटा चमचा भाजलेले जिरे पूड
* १ मोठा चमचा बेसन पीठ
* १ मोठा चमचा चिरलेली कोथिंबीर चटणी
* साखर व लाल तिखट चवीनुसार
* मीठ चवीनुसार.
कृती
मूगाची डाळ ३ तास पाण्यात भिजवून ठेवा. त्यानंतर अर्धी डाळ भरड व अर्धी डाळ व्यवस्थित बारीक वाटून घ्या. एक आंब्याचा गरही मिक्सरवर फिरवून घ्या. एका भांड्यात डाळ, २ मोठे चमचे आंब्याचा गर, आले, बेसनपीठ व इतर मसाल्याचे साहित्य घालून व्यवस्थित मिसळून घ्या. कढईत तेल गरम करून भल्ले सोनेरी रंगावर तळून घ्या. गरम पाण्यात तयार भल्ले टाका. दह्यामध्ये आंब्याचा गर व मसाले घालून फेटून घ्या. दह्यात मँगो भल्ले पाणी निथळून घेऊन घाला. त्यावर चिंचेची चटणी, मीठ, जिरे, मिरची पूड, आंब्याचा गर, कोथिंबीरीची चटणी घाला. फ्रिजमध्ये थंड करा. सर्व्ह करताना पुन्हा थोडी चिंच व कोथिंबीर चटणी, आंब्याचे काप व जिरेपूड घालून सर्व्ह करा.