– मधु शर्मा कटिहा
हनिमूनला जिथे पती आपल्या पत्नीवर प्रेमाची उधळण करू इच्छितो, तिथे पत्नीला वाटत असते की तिचा जोडीदार तिच्या रुपावर फिदा व्हावा. तिला फक्त आपल्या जोडीदारासाठीच नटायचे-सजायचे असते, पण तिच्याकडे मेकअप करण्यासाठी वेळ फारच कमी असतो आणि लग्नात खूप नटल्यामुळे त्यानंतर विना मेकअप सौंदर्याची चमक फिकी वाटू लागते. हनिमूनला मेकअपसाठी जास्त सामान घेऊन जाणेही शक्य नसते.
काही खास टीप्स खास तुमच्यासाठी ज्यामुळे कमी वेळेतही तुम्ही आकर्षक दिसू शकता :
चंद्रासारखा उजळ चेहरा
मेकअपपूर्वी बीबी, सीसी किंवा डीडी क्रीम लावा. यांचे वैशिष्टय हे आहे की अनेक प्रकारच्या क्रीमचे काम हे एकटेच करते. हे लावल्यानंतर प्रायमर, कंसीलर, फाऊंडेशन किंवा सनस्कीन लावण्याची गरज नाही.
बीबी क्रीमला ब्लेमिश बाम किंवा ब्यूटी बाम असेही म्हणतात. ते चेहऱ्याला पूर्णपणे कव्हर करते आणि चेहरा चमकू लागतो. चेहऱ्याचा रंग एकसारखा नसेल तर सीसी क्रीम वापरा. हे त्वचेवर सहजपणे एकरूप होते आणि चेहऱ्याचा रंग उजळतो. हेच कारण आहे की याला कलर कंट्रोल क्रीम असेही म्हणतात. जर चेहऱ्यावर पिग्मेंटेशन किंवा डाग असतील तर डायनॅमिक डू ऑल किंवा डेली डिफेन्स म्हणून ओळखल्या जाणाऱ्या डीडी क्रीमचा वापर योग्य ठरेल. चेहऱ्यासोबतच मानेवरही क्रीम लावणे योग्य ठरते.
गुलाबी गाल
आपल्या त्वचेनुसार ब्लशरचा वापर करून गाल सुंदर बनवता येतात. नववधू हनिमूनला गेली असेल तर पीच किंवा चेरी पिंक कलरच तिच्या गालावर जास्त खुलून दिसतो. फिकट रंगाच्या कपडयांसह प्लम किंवा मरून आणि गडद रंगाच्या ड्रेससह फिकट तपकिरी किंवा बदामी रंग चांगला दिसतो. त्वचेनुसार शुष्क किंवा सर्वसामान्य त्वचेसाठी केक आणि क्रीम बेस्ड ब्लशर, तर तेलकट त्वचेवर पावडर बेस्ड ब्लशर सुंदर दिसू शकतात. ब्लशसाठी जास्त वेळ लागत नाही पण याच्या वापरामुळे गालांसह चेहऱ्यावरही लाली येऊन तो गुलाबासारखा खुलतो.
काळेभोर डोळे
डोळयांना काजळ लावा. ते वॉटरप्रुफ असेल तर अधिक चांगले. जर मेकअप करण्यास पुरेसा वेळ असेल तर ड्रेसच्या रंगाशी मिळतीजुळती आयशॅडो लावा. हनिमूनला जाताना सोबत चांगल्या कंपनीच्या २ किंवा ३ शेड्सचा पॅक पुरेसा ठरतो. यात फिके आणि गडद दोन्ही छटा असतात. ज्या दिवशी वेळ कमी असेल त्यादिवशी आयलायनरचा वापरही करता येईल. भुवया नीट नसतील आणि ट्रीम करायला वेळ नसेल तर त्यांना आयब्रो पेन्सिलने नीट आकार देता येईल.
मस्कारा डोळयांचे सौंदर्य वाढवते, पण लक्षात ठेवा की हनिमूनवेळी केवळ पारदर्शक आणि वॉटरप्रुफ मस्कराच वापरा. पारदर्शक मस्कारा लावल्याने मेकअप हलका होईल आणि पापण्याही दिसतील.
दरवळेल तनमन
लग्नाच्या वेळी नववधूच्या रुटीन मेकअप ट्रीटमेंटदरम्यान नको असलेले केस काढून टाकले जातात. तरीही हनिमूनवेळी ते अडसर ठरत असतील तर वॅक्सिंग क्रीम वापरून काढून टाका. यासाठी डेपिलेटरी क्रीमही वापरता येईल.
स्वच्छ शरीरावर डिओ किंवा परफ्यूम लावा. जोडीदाराची आवड लक्षात घेऊन परफ्यूमची निवड केल्यास उत्तमच. चॉकलेट किंवा वुडी परफ्युम सर्वांनाच आवडतो.
ओलसर ओठ
विविध प्रकारच्या लिपस्टिकच्या अनेक शेड्स सध्या बाजारात उपलब्ध आहेत. प्रसंगानुरूप वेगवेगळया प्रकारच्या लिपस्टिकची निवड केली जाते.
हनिमूनच्या काळात ओठ आकर्षक दिसण्यासाठी योग्य शेड आणि योग्य प्रकारच्या लिपस्टिकची निवड करून ओठांचे सौंदर्य वाढवा.
अशावेळी किस-प्रुफ लिपस्टिक हा सर्वात चांगला पर्याय आहे. बाहेर फिरायला जाताना दीर्घकाळ टिकणारी लिपस्टिक वापरणे चांगले. कुठल्याही प्रकारच्या त्वचेसाठी गुलाबी, कोरल आणि कॉफी शेड्स चांगले दिसतात.
ओठांना अधिक आकर्षक बनविण्यासाठी शिमर किंवा ग्लॉस लिपस्टिकचा वापर केला जाऊ शकतो. या प्रकारात, गडद व्हायलेट, चॉकलेटी, गडद लाल आणि लाल तसेच तपकिरी रंगाने बनवलेली मरसाला शेड खूप सुंदर दिसते.
ओठ सुंदर आणि चमकदार दिसण्यासाठी तसेच दीर्घकाळ रंगवलेले ठेवण्यासाठीचा उत्तम पर्याय लिप स्टेन हा आहे. हे बहुतेक द्रव स्वरूपात येते, जे तेल आणि रंग एकत्र करून बनविलेले असते. हे लावल्यानंतर ओठ कोरडे होतात, त्यामुळे याचा वापर करण्यापूर्वी क्रीम किंवा लिप बाम लावणे चांगले असते.
हनिमूनवेळी ओले ओठ पतिला मोहित करतील आणि अशा मदभऱ्या ओठांनी प्रेम व्यक्त करण्यातली मजा काही वेगळीच असेल.
सुंदर हात
हातांचे सौंदर्य मोठया प्रमाणात नखांवर अवलंबून असते. आजकाल नेल आर्ट ट्रेंडमध्ये आहे. हनिमूनवेळी नखे सजवण्यासाठी बराच वेळ देणे शक्य नसते, पण त्याकडे दुर्लक्ष केले जाऊ शकत नाही. अशावेळी सर्वात चांगला पर्याय म्हणजे रेनबो, मिंट ग्रीन किंवा मॅट ब्लॅक अशा काही वेगळया पण आकर्षक नेलपेंट्स स्वत:सोबत घेऊन जाणे.
हातात लग्नाचा लाल चुडा असेल तर फिकट रंगाच्या नेलपेंटही चांगल्या दिसतात. जर चुडयाऐवजी हातात ब्रेसलेट किंवा थोडया बांगडया असतील तर नेल पॉलिशनंतर ‘ग्लिटर डस्ट’ वापरता येईल. ते वापरणे सोपे आहे.
रेशमी केस
केसांचे सौंदर्य नेहमीच स्त्रीच्या सौंदर्यात भर घालते. स्वत:सोबत शाम्पूसह कंडिशनर ठेवायला विसरू नका. छोटे केस दररोज धुता येतात, पण लांब केसांसाठी हे शक्य नाही. म्हणून ओला कंगवा किंवा ब्रशने केस सोडवून त्यांना हेअर क्रीम लावा.
वेळेअभावी सुंदर हेअरस्टाईल करणे शक्य नसते. केस कुरळे असल्यास मोकळे सोडा. सरळ असलेले केसदेखील मोकळे सोडलेलेच चांगले दिसतात. पण जर तुम्हाला केसांना वेगळा लुक द्यायचा असेल तर वरचे केस घेऊन फ्रेंच टेल किंवा हाफ बन किंवा अर्ध्या केसांचा पोनी हा चांगला पर्याय आहे.
एक सोपी पद्धत म्हणजे दोन्ही बाजूंचे थोडे थोडे केस घ्या, ते गुंडाळून बांधा आणि त्यावर क्लिप लावा. काळया किंवा आयवेरी रंगाचे क्लिप कुठल्याही रंगाच्या ड्रेसवर शोभून दिसतात.
सुंदर पाय
पायांना लावलेली चमकविरहीत गडद नेलपॉलिश प्रत्येक ड्रेसवर शोभून दिसते. स्कर्ट किंवा कॅपरीसह एका पायात पैंजणही घालता येईल. सॅन्डल अँकलेट घातले असाल तर प्रियतमाला म्हणावेच लागेल की हे सुंदर पाय जमिनीवर ठेवू नकोस. याची जागा नेहमीच माझ्या हृदयात राहील.
हनिमूनचा आनंद वाढविण्यात मेकअपची असलेली भूमिका नाकारता येत नाही. पण याकडे लक्ष द्या की मेकअपचे दर्जेदार सामानच खरेदी करा. स्वस्त आणि खराब प्रोडक्ट्समुळे त्वचा आणि ओठांना अॅलर्जी होते, यामुळे हनिमूनची मजा खराब होऊ शकते.