* प्रतिनिधी
1) मेवा मोदक
साहित्य
* २५० ग्रॅम गव्हाचे पीठ
* २०० ग्रॅम काजू, बदाम व पिस्त्याचे तुकडे
* २५ ग्रॅम मनुका
* २५ ग्रॅम मगज
* २५ ग्रॅम डिंक
* १०० ग्रॅम किंवा चवीनुसार पिठीसाखर
* २०० ग्रॅम देशी तूप.
कृती
कढईत तूप गरम करून डिंक तळून घ्या. डिंग फुलताच तो तुपातून काढून घ्या. त्याच कढईत पीठ घालून मंद आंचेवर सोनेरी रंगावर भाजून घ्या. आता यात काजू, बदाम, पिस्ता, मनुका, बिया व डिंक मिसळून वाटून मिक्स करा. २-३ मिनिटे अजून परता. मग साखर मिसळून गॅसवरून खाली उतरा. थोडं गरम असतानाच या मिश्रणाचे मनपसंत आकाराचे मोदक बनवा.
2) लच्छा रोल
साहित्य
* २००ग्रॅम खवा
* ६० ग्रॅम पिठीसाखर
* अर्धा कप अक्रोड
* १ कप बदामाचा कूट
* २०-२५ खारका
* अर्धा कप पिस्त्याचा चुरा
* १५-२० बादाम.
कृती
खारका ४-५ तास पाण्यात भिजवा. मऊ झाल्यानंतर बिया काढून मिक्सरमध्ये वाटून पेस्ट बनवा. अक्रोडही जाडसर वाटा. खवा कढईमध्ये टाकून मंद आचेवर चांगल्याप्रकारे भाजून घ्या. खारकांची पेस्ट व अक्रोड पावडर मिसळून सतत ढवळत अजून थोडे परतून घ्या. जेव्हा मिश्रणाला तूप सुटू लागेल, तेव्हा आचेवरून खाली उतरा. थोडं थंड झाल्यावर साखर मिसळा. तयार खव्याचे मनपसंत आकारात रोल बनवा. ताटात बदामाचा कूट व पिस्ता चुरा पसरवा. रोल्स ताटात ठेवून चांगल्याप्रकारे फिरवा. जेणेकरून बदामाचं कूट व पिस्त्याचा चुरा त्यावर चिकटेल. प्रत्येक रोलवर बदाम ठेवून सर्व्ह करा.
3) काजू स्टार्स
साहित्य
* २०० ग्रॅम खवा
* ५० ग्रॅम साखर
* १ मोठा चमचा काजूचा चुरा
* चिमूटभर खाण्याचा पिवळा रंग
* ८-१० केशरच्या काड्या
* आवश्यकतेनुसार पिस्त्याचे काप.
कृती
खवा कुस्करून कढईमध्ये मंद आचेवर भाजून घ्या. साखरेत थोडेसे पाणी, पिवळा रंग व केशरच्या काड्या मिसळून घट्ट पाक बनवा. मग यात भाजलेला खवा व काजूचा चुरा मिसळून जोपर्यंत मिश्रणाचा एक गोळा बनत नाही, तोपर्यंत परता. मग गॅसवरून उतरवून तूप लावलेल्या ट्रेमध्ये थंड करा. स्टार कटरने कापून स्टार्सचा आकार द्या. प्रत्येक स्टारवर पिस्ता लावा.